3 Yohane 1 - Tonga Bible 1986

Mazu ghamoyo ghawoneka mu nyama

¹ Mura yo kwaku Gayo wakwanjiwa yo, mweniyo nditanja mu uneneska.

² Wakwanjiwa, ndiromba kuti mwaku vyose usakatenge ndi uŵe umampha, uli ndimo mzimu wako usakatiya.

³ Chifukwa ndingukondwa ukongwa, penipo ŵabali ŵanguza ndi kusimikizga uneneska wako, uli ndimo utende iwe mu uneneska.

⁴ Ndirive likondwa likuru kwakuruska kuvwa kuti ŵana ŵangu mbakwenda mu uneneska.

Gayo warumbika

⁵ Wakwanjiwa we, uchita kwamagomekezgeka chose chenicho uŵachitiya ŵabali, ndi ukongwa ku ŵalendo wo,

⁶ ŵeniwo ŵangusimikizgiya chanju chako paurongo pa mpingu: ŵeni wopa kuŵapereke pa lwendo lawo uchitiye kwakwenere Chiuta:

⁷ chifukwa kuti, pa chifukwa chazina lo, waruta kwambura kuronde kanthu ku ŵaMitundu wo.

⁸ Viyo titenere ifwe kuŵaronde ŵaviyo alinga kuti tiŵe ŵanchitu ŵanase mu uneneska wo.

Diotrefe ndi Demetrio

⁹ Ndingulemba ku mpingu wo: kweni Diotrefe, yo watanja kuŵa mura mwaku wo, wakanakundivwiya.

¹⁰ Chifukwa chenichi, asani nthuza, ndichitenge chikumbusku cha milimu yake yo wachitiya pakuti bwebwete ndi mazu ghaheni: ndipo pakukhorwa ndi mazu gho cha, iyo yija wakana kuŵaronde ŵabali ndipo wakanizga ŵeniwo ŵakhumba kuŵaronde, watuŵadika mu mpingo wo.

¹¹ Wakwanjiwa we, ungezganga cha cho nchiheni, kwani cho nchamampha. Yo ngwakuchita umampha ngwa kwaku Chiuta: yo ngwakuchita uheni walive kumuona Chiuta.

¹² Kwaku Demetrio kwasimikizgikiya ndi wose, ndipo so ndi uneneska nawo: ndipo nafwe timsimikizgiya; ndipo uziŵa kuti chisimisimi chidu nchakuneneska.

Matauzgu

¹³ Ndinguwa ndi vinandi kulemba kwako, kweni kuti ndikhumba kuvilemba kwaku iwe ndi inke ndi peni cha,

¹⁴ kweni ndigomekezga kukuwona ruŵi, ndipo tazamkambiskana chisku ku chisku.

¹⁵ Chimangu chiŵe nawe. Ŵabwezi ŵakutauzga. Ŵatauzge ŵabwezi, zina ndi zina.