2 ŴaKorinte 4 - Tonga Bible 1986

Kuŵika usambasi wa vyamuzimu mu ubende

¹ Chifukwa chenichi pakuŵa nawo uteŵeti wenuwu, uli ndimo tarondere lisungu laku Chiuta, kuti tidembereka cha.

² Kweni takana vyachibisibisi vyasoni, taŵakwendaendamu uchenjezi cha, pamwenga ŵakuchitiya kwafuzi ndi mazu ghaku Chiuta cha, kweni mu karongoroledu ka uneneska wakujirongo ku njuŵi za munthu yose paurongo paku Chiuta.

³ Kweni asani evangeli widu ngwakuburumutizgika, iku ngwakuburumutizgika mwaku wo mbakuyowa.

⁴ Mwaku ŵeniwo Chiuta wa mgonezi uno waburumutizga vinjeru vya ŵambura chivwanu, viyo kuti ungaŵaŵaliya cha ukweru wo wa evangeli wa unkhankhu waku Kristu, yo nchikozgu chaku Chiuta.

⁵ Chifukwa vyo titaula kuti vyaku taŵeni cha, kweni Kristu Yesu nge ndi Mbuya, ndi taŵeni ulaka mbateŵeti ŵinu pa chifwa chaku Yesu.

⁶ Pakuti ndi Chiuta yo wanguti, “Kutuwa mu mdima ukweru uŵalenge.” Ndiyo waŵaliya mu mitima yidu kungweruska mziŵiru wa unkhankhu waku Chiuta mu chisku chaku Yesu Kristu.

⁷ Kweni mbiku yeniyi te nayo mu viyaŵi vyadongo, kurongo kuti nthazi yo yijumpha vinthu vyose njakutuliya kwaku Chiuta, kuti njaku taŵeni cha.

⁸ Mosemose te ŵakusuzgika, kweni kuti te ŵakufyekeka cha; te ŵakutimbanizgika, kweni ŵakutondeka cha;

⁹ te ŵakuŵembeka, kweni ŵakujowoleka cha, te ŵakutesulika, kweni ŵakujowoleka cha, te ŵakutesulika, kwani ŵakwanangika cha;

¹⁰ nyengo yose tipinga mu liŵavu nyifwa yaku Yesu, alinga kuti umoyo so nawo waku Yesu ulongorekenge mu liŵavu lidu.

¹¹ Chifukwa nyengo yose taŵakuŵa ŵamoyo tiperekeka ku nyifwa chifukwa chaku Yesu, mwakuti umoyo nawo waku Yesu urongolekenge mu liŵavu lidu lachifweni.

¹² Viyo na, nyifwa yitakatakiya mwidu, kweni umoyo mwinu.

¹³ Kweni pakuŵa ndi mzimu wo waviyo pe wa chivwanu, kwakulingana ndimo kwalembeke, “Ndinguvwana, chifukwa chenichi ndingukamba,” nafwe so tivwane, ndipo chifukwa chenichi tikamba,

¹⁴ tiziŵa kuti mweniyo wanguyuska Ambuya Yesu, wamyuskaifwe so pamoza ndi Yesu, ndipo wakatitoriyanga ifwe pamoza namwe pamaso pake.

¹⁵ Chifukwa vyose vyo viŵiya chifukwa chinu, alinga kuti wo wezi, wakwandaniskikiya mu kuwonga kwa urapasi ufurwiyenge ku unkhankhu waku Chiuta.

¹⁶ Chifukwa cho kuti tidembereka cha. Inya chingana umunthu widu wakubwaro uvumuka, ndikweni wamkati wo uchitika ufya zuŵa ndi zuŵa.

¹⁷ Chifukwa suzgu yidu yiyuyu yakanyengo yititataliya kwakutaruliya taruliya uzituwa muyaya wa unkhankhu wambura mapimika.

¹⁸ Tichidaŵira ifwe vyakuoneka cha, kweni vyambura kuwoneka; chifukwa vyakuwoneka vye vyanyengo; kweni vyambura kuwoneka vyamuyaya.