1 Samuele 29 - Tonga Bible 1986

Davidi ŵatumukana ŵaFilisti

¹ Sono ŵaFilisti ŵanguwunjika nkhondo yawo yose pa Afeke: ndipo ŵaYisraele ŵangugoŵa pafupi ndi chisima cho che mu Yezerele.

² Ndipo zinduna za nkhondo za ŵaFilisti zendanga mu machumi pe chumi ndi mu chikwi, Davidi ndi ŵanthu ŵake ŵendanga kuvuli ndi Akishi,

³ zinduna za ŵaFilisti zinguti, “Kumbi ŵaHebere aŵa ŵachitanji pano?” Akishi wanguŵamuka, “Asi uyu ndi Davidi, mteŵeti waku Sauli, karonga wa ŵaYisraele, yo sono waja nane kwa mazuŵa ndi virimika, ndipo kutuliya pa nyengo yo waziya kunu kuti ndamusaniya ndi kaheni cha mpaka zuŵa linu.”

⁴ Kweni nduna za nkhondo za ŵaFilisti zingukwiya nayo; zinguti, “Muwezgiyeni kuvuli waweriyenge ku malo gho mukumpaska; kuti wakasikiyanga nafwe ku nkhondo cha, vinu kokuli ku nkhondo wangachiŵa murwani widu. Pakuti iyo uyu wangaziŵa uli kujiphemaniska ku mbuyake?

⁵ Kumbi asi ndi Davidi uyu, kwakumweniyo ŵatumba yumoza ndi munyake mu kuvina, ‘Sauli wabaya vikwi vyake, kweni Davidi vikwi vyake vya machumi?’ ”

⁶ Penipo Akishi wangudana Davidi wangunena nayo, “Ambuya amoyo iwe waŵa muneneska, kwaku ine kunguŵa umampha kuti uskomenge kusere ndi kutuwa pamoza nane mu nkhondo; chifukwa kuti ndasaniyako kaheni cha kwaku iwe kutuliya pa zuŵa liya ukuziya mpaka sono. Kweni ndipuuli zinduna kuti zakwanja cha.

⁷ Viyo sono wenga; rutanga muchimangu mwakuti zinduna za ŵaFilisti zireke kukwiyiskika ndi iwe.”

⁸ Davidi wanguti kwaku Akishi, “Kumbi ndachitanji? Mwasaniyamo kane mwaku ndamteŵeti winu kutuwa pa zuŵa liya ndinguserere nchitu yinu mpaka sono, kuti ndireke kuruta kwachirwa ndi ŵarwani ŵa mbuyangu karonga?”

⁹ Akishi pakwamuka Davidi wanguti, “Ndiziŵa kuti we wambura kalema pa maso pangu nge ndi mungelo waku Chiuta; kweni ndipuuli nduna za ŵaFilisti zanena kuti, ‘Wangarutanga nafwe cha ku nkhondo.’

¹⁰ Sono uyuke ndi mlenji-lenji ndi ŵateŵeti ŵangu wo ŵanguza ndi iwe; usoke ndi chivivivi, asani kwataka ngwe.”

¹¹ Viyo Davidi ndi ŵanthu ŵake ŵangucherera, kuwere ku charu cha ŵaFilisti. Kweni ŵaFilisti ŵangukwere ku Yezerele.