1 Samuele 12 - Tonga Bible 1986

Samuele walayira ku ŵaYisraele

¹ Samuele wangunena ndi ŵaYisraele, “Awonani, ndamuvwiyani mwaku vyose vyo mwandinene, ndipo ndamika karonga pachanya pinu.

² Sono, ehe, karonga watenda paurongo pinu, Ine ndakota ndendi nyivu, awonani, ŵana ŵangu ŵe pamoza namwe; ndipo ndenda paurongo pinu kutuwa pa unyamata wangu mpaka zuŵa linu.

³ Ndepano, ndisimikizgiyeni paurongo pa Ambuya ndi pa wakupakika wake. Ndato ng'ombe yaku yani? Pamwenga ndato mbunda yaku yani? Ndapusika yani? Ndakandirizga yani? Pamwenga nkhu janja laku yani ko ndaronde chimbundi kuti ndijari nacho maso ghangu? Ndisimikizgiyeni ndipo ndikawerezgiyangapo.”

⁴ Ŵanthu ŵanguti, “Kuti mwatipusika chingana nkhutikandirizga cha, kuti mwatoko kanthu ku janja la munthu cha.”

⁵ Ndipo wanguŵamuka, “Ambuya ndi kaboni paku imwe, wakupakika wake ndi kaboni pa zuŵa linu, kuti imwe mulivi kusaniya kaheni mu janja langu.” Ŵanthu ŵanguti, “Mba kaboni.”

⁶ Samuele wanguti, “Ambuya ndi kaboni, yo wangusankha Mosese ndi Aroni yo wangutuzga auskemwe mu charu cha Egipiti.

⁷ Viyo sono sokani chisisi, mwakuti ndikuŵeyeriyeni paurongo pa Ambuya kwakuyana ndi nchitu za utaski wa Ambuya zo anguchitiya auskemwe pamoza ndi imwe.

⁸ Po Yakobe wanguya ku Egipiti, ŵaEgipiti ŵanguŵakandirizga, ndipo auskemwe ŵanguliriya ku Ambuya, Ambuya angutuma Mosese ndi Aroni wo ŵangutuzga auskemwe mu Egipiti, kwaziŵajarika mu malo yagha.

⁹ Kweni ŵanguruwa Ambuya Chiuta wawo; rekani anguŵaguliska mu janja laku Sisera, nduna ya nkhondo yaku Yabini karonga waku Hazoro, ndimu janja la ŵaFilisti, ndimu janja la karonga waku Moabu; wangurwa kwakumikana nawo.

¹⁰ Ndipo ŵanguliya ku Ambuya, wanguti, ‘Talakwa chifukwa taŵapata Ambuya, ndipo tateŵete Bala ndi Ashitaroto; kweni sono tipozomoskeni ku janja la ŵarwani ŵidu ndipo tikamuteŵetiyaninga.’

¹¹ Ambuya angutuma Yerubala, Baraki, Yefta, ndi Samuele, ŵangumupozomoskani ku janja la ŵarwani ŵinu kwakuzunguliya; ndipo munguja umamphavi.

¹² Ndipo po munguwona Nahashi karonga wa Amoni wachiza kumikana namwe mungundinene kuti, ‘Awa, tikumba karonga pachanya pidu,’ penipo Ambuya Chiuta winu ndiyo wenga karonga winu.

¹³ Sono awonani karonga yo mwasankha ndi mweniyo mungufumba; ehe, Ambuya amupaskani.

¹⁴ Asani mopenge Ambuya, kuŵateŵete ndi kuvwiya mazu ghawo kwambura kupatukako ku marangu ghawo, asani mose imwe ndi karonga yo wausa paku imwe murongonge Ambuya Chiuta winu, kukaŵanga umampha;

¹⁵ kweni asani murekenge kuvwiya mazu gha Ambuya, ndi kuthaŵako ku marangu gha Ambuya, janja la Ambuya liŵenge lakumikana namwe, imwe ndi karonga winu.

¹⁶ Chifukwa ichi sokani muje chisisi ndipo onani chinthu chikuru ichi, cho Ambuya akamuchitiyaninga pa maso pinu.

¹⁷ Asi nchivuna cha trigu msana wale? Ndidanenge ku Ambuya, mwakuti atumi chidiririzi ndi vuwa; ivi viziŵiskenge imwe kuti uheni winu ngukuru ukongwa, wo mwachita mu maso gha Ambuya, pakujipemphe imwe mwija karonga.”

¹⁸ Ndipo Samuele wangudana ku Ambuya, ndi Ambuya angutuma chidiririzi ndi vuwa zuŵa liya viyo ŵanthu wose ŵanguŵa ndi mantha ghakuru pa Ambuya ndi paku Samuele.

¹⁹ Sono ŵanthu ŵangunena ndi Samuele, “Tirombe taŵateŵeti ŵako ku Ambuya Chiuta wako, kuti tireke kufwa; pakuti tasazgiyako uheni uwu nawo ku mauheni ghidu ghanandi, pakujipemphe karonga.”

²⁰ Samuele wanguti, “Rekani kopa mwachita uheni uwu wose, viyo sono rekani kupatukako kukurondo Ambuya, muteŵetiyeni ndi mtima winu wose;

²¹ rekani kupatukiya ku vinthu vyawaka vyo vilivi chanduwu nanga mbutaski, pakuti vyawaka.

²² Ambuya kuti amudikeninge cha, pa chifukwa cha zina lawo likuru pakuti kwaŵakondweska Ambuya kumumikani imwe kuŵa ŵanthu ŵake.

²³ Ndipo nge nkhwaku ine, chindiŵiyi kutali kuti ndi lakwi kumikana ndi Ambuya pa kureka ku murombiyani; ndipo ndimusambizgeninge nthowa yamampha ndi yakurunjika.

²⁴ Opani Ambuya ndipo ŵateŵetiyeni kwamagomekezgeka ndi mtima winu wose, ghanaghanani pa vinthu vikuru vyo ŵamuchitiyani.

²⁵ Kweni asani mweche kurutiliya mu viheni, mukaparghang'ikanga mose, imwe ndi karonga winu.”