1 Mikoka 18 - Tonga Bible 1986

Davidi wabaya ŵaFilisti ŵaMoabu, ŵaAramu, ndi ŵaEdomu

¹ Pavuli paku ivi Davidi wangupunda ŵaFilisti, ndi kuŵathereska, ndipo wanguto Gati ndi mizi yake kutuwa mu manja gha ŵaFilisti.

² Ndipo wangupunda Moabu, ndipo ŵaMoabu ŵanguŵa ŵanthu ŵaku Davidi ndi ŵamuthuliyanga vithulu.

³ Davidi wangupunda so Hadadezere karonga waku Zoba, kurupi ndi Hamati wachiruta kwachiŵika chikumbusku chake pa msinji wa Efrate.

⁴ Ndipo Davidi wanguronda magareta kwaku iyo chikwi chimoza (1,000); ŵanthu ŵapa ŵakavalo vikwi vinkhonde ndi viŵi (7,000) ndi ŵasilikali ŵakwenda pasi vikwi machumi ghaŵi (20,000) Davidi wangudumuwa misipi ya ŵakavalo wose ŵa magareta, kweni wangusungako ŵakavalo ŵakuyana ndi magareta machumi pe chumi (100).

⁵ Ndipo penipo ŵaSiriya ŵaku Damasko ŵanguza kuzachiwovya Hadadezere karonga waku Zoba, Davidi wangubaya ŵaSiriya vikwi machumi ghaŵi pachanya viŵi (22,000).

⁶ Viyo Davidi wanguŵika mzinda wa ŵasilikali ŵankhondo mu Siriya wa Damasko ndipo ŵaSiriya ŵanguŵa ŵanthu ŵaku Davidi, ndi ŵamuthuliyanga vithulu, Ambuya angupaska upundi kwaku Davidi kose ko wanguruta.

⁷ Davidi wanguronda nguru za golide zo ŵangupinga ŵateŵeti ŵaku Hadadezere ndi ŵanguza nazo ku Yerusalemu.

⁸ Viyo pe ku Tabihati ndi ku Kuni, misumba yaku Hadadezere, Davidi wangutoko mikuŵa yinandi yeniyo Solomoni wangupanga nayo nyanja, mizati ndi viyaŵi vya mkuŵa.

⁹ Tou karonga waku Hamati wanguti wavwa kuti Davidi wangupunda nkhondo yose yaku Hadadezere, karonga waku Zoba,

¹⁰ wangutuma mwana wake Hadoramu ku karonga Davidi, kwachimtauzga ndi kumuthokoza chifukwa wangurwana ndi Hadadezere ndi wangumpunda; pakuti Hadadezere kaŵi-kaŵi warwananga ndi iyo Tou, ndipo nayo wangutuma vyakuteŵete vya mitundu yinandi, vya golide, vya siliva, ndi vya mkuŵa;

¹¹ yivi navyo karonga Davidi wanguvipaturiya ku Ambuya, pamoza ndi siliva ndi golide vyo wangupinga kutuwa ku mitundu yose, kutuwa ku ŵaEdomu, ŵaMoabu, ŵaFilisti ndi ŵaAmeleke.

¹² Ndipo Abishai, mwana waku Zeruya wangubaya ŵaEdomu vikwi chumi pachanya vinkhonde ndi vitatu (18,000) mu dambo la mche.

¹³ Ŵanguŵikamo ŵasilikali ŵa nkhondo ŵanandi mu Edomu, ndipo ŵaEdomu wose ŵanguŵa ŵanthu ŵaku Davidi. Ndipo Ambuya angupaska upundi kwaku Davidi kose ko wanguruta.

¹⁴ Viyo Davidi wanguwusa Yisraele yose; ndi wangweruzga ndi urunji ndi uneneska ŵanthu ŵake wose.

¹⁵ Yoabu mwana waku Zeruya wenga nduna ya ŵankhondo; ndipo Yehoshafati mwana waku Ahiludi wenga mlembi;

¹⁶ ndipo Zakoki mwana waku Ahitubu ndi Ahimeleki mwana waku Abiyatara ŵenga ŵazukuru; Shavisa wenga mlembi;

¹⁷ Benaya mwana waku Yehoyada wenga murongozgi wa ŵaKerete ndi ŵaPelete; ndipo ŵana ŵaku Davidi ŵenga ŵakudanga mu uteŵeti wa karonga.