1 Mikoka 10 - Tonga Bible 1986

Nyifwa yaku Sauli ndi ŵana ŵake

¹ Sono ŵaFilisti ŵangurwana ndi ŵaYisraele; ndipo ŵaYisraele ŵanguthaŵa kuŵa Filisti, ŵangubayika pa phiri la Gilboa.

² Ndipo ŵaFilisti ŵangumusaniya Sauli ndi ŵana ŵake; ŵaFilisti ŵanguŵabaya Jonafani ndi Abnadabu ndi Malkishua, ŵana ŵaku Sauli.

³ Nkhondo yingulimba ukongwa paku Sauli, ndipo ŵakuskoma mauta ŵangumusaniya; wangulasika ndi ŵakupong'a mivwe.

⁴ Sono Sauli wangunene wakupinga vidya vyake, wanguti, “Solo lipanga lako undigwazi nalo, vinu ŵambura kuchinjika yaŵa ŵangaza ndi kunditombozga.” Kweni wakupinga vidya wangukana; chifukwa wangopa ukongwa. Viyo Sauli wanguto lipanga la mweneko ndipo wanguwiya paku lo, wangufwa.

⁵ Penipo wakupinga vidya vyake wanguwona kuti Sauli wafwa, nayo wanguwa pa lipanga lake ndi wangufwa.

⁶ Ndimu Sauli wangufwiya; iyo, ŵana ŵake ŵatatu, ndi wose ŵa nyumba yake ŵangufwiya pamoza.

⁷ Ndipo po ŵaYisraele wose wo ŵenga mu dambo ŵanguwona kuti nkhondo yathaŵa ndi kuti Sauli ndi ŵana ŵake ŵafwa, ŵangusiya mizi yawo ŵanguthaŵa: sono ŵaFilisti ŵanguza ndi kuja mwenimo.

⁸ Ndipo ku mlenji, po ŵaFilisti ŵanguza kuzachizuwa ŵakubayika, ŵangusaniya kuti Sauli ndi ŵana ŵake ŵawa pa phiri la Gilboa.

⁹ Ŵangumuzuwa, wangucheketa mutu wake ndi kuto vidya vyake, viyo ŵangutuma mathenga mu charu chose cha ŵaFilisti, kuti ŵapingi makani ghamampha ku ŵangoza ŵawo ndi ku ŵanthu wose.

¹⁰ Ndipo vidya vyake ŵanguŵika mu kasopi wa ŵachiuta ŵawo mutu wake ŵanguwukhoma mu kasopi waku Dagoni.

¹¹ Kweni ŵanguti ŵavwa wose ŵamu Yebeshi-Gileada vyo ŵaFilisti ŵanguchitiya Sauli

¹² vinkhara vyose vingusoka, ŵangwachito thupi laku Sauli ndi mathupi gha ŵana ŵake, ŵanguza nagho ku Yabeshi. Ŵanguŵika viwanga vyawo musina mu muti wa nthunthu mu Yabeshi, ndipo ŵangufunga kwa mazuŵa ghankhonde ndi ghaŵi.

¹³ Viyo Sauli wangufwa mu kwananga kwake; wanguŵa wambura magomekezgeka ku Ambuya chifukwa chakureka kusunga marangu gha Ambuya ndipo so pa chifukwa chakupenja urongozgi ku ŵakuwukwa,

¹⁴ kuti wangufumba urongozgi ku Ambuya cha. Chifukwa cho Ambuya angumubaya, ndipo angung'anamuliya ufumu kwaku Davidi mwana waku Jese.