Zona 2 - Godón Buk

Zonan Tóre

¹ Tai auma wapian dupidü, Zona tóre olgab ekorr ⌊Lodka⌋, tóba Godka

² wagó, “Kólba ini müpdü, Lod, ka marü ngimliarró, da ma kürü bóktan kuri salkomóla. Ini büdülab bwóbdügab, ka marüka tangbamtinüm górrgarró, da ma kürü kurrkrrua.

³ Lod, ma kürü kümaikürrü wirri buku bwóbdü, tai kókó ka malu tüp emrrarró, kürü blaman naea ne mamtae kotarr kónómórr, ó blaman marü ne arüng goblol kwarilürr, kürü kwitana arrgrrat kwarilürr.

⁴ Kürü gyagüpitótók igó yarilürr kamaka, ‘Ma kürü metatómpükü alzizi kümanika mobakagabi, ó ka marü ⌊Gyabi Müót⌋ sab myamem kokean eseno.’

⁵ Naea kürü ngakoklaorr, kürü ngónapükü batülürr. Malua kürü metatómpükü küdarükürr akó malu opopora kürü singül kórrgótónóp.

⁶ Ka abilürrü tai kókó podo zitülkus ne kwarilürr, ene büdülab bwóbdü. Da mató, Lod, kürü God, ma kürü arról kalkomóla ene kukurru bwóbdügab.

⁷ Ka kólba nóma küp bamkórró, wa, kürü arróla blakónóm kain yarilürr, da Lod, ka marüka tóre ekorró. Ma kürü kurrkrrurrü moba Gyabi Müótüdü.

⁸ Obae küp-koke godóm nidi tóredako, marü morroal tonarrbóka tai kuri imrükrre.

⁹ Ka sab marü wórri magürolo, ó ka marü eso akyanóm lar emkolo, ó ka sab kólba ⌊arüng alkamül-koke bóktan⌋ tórrmendó irrbuno. Lod, zidbaina marükagabi tótókda!”

¹⁰ Da Lod wapi arüng bóktan we ekyanórr, Zonan müzi alkomólóm, kórrgópdó.