Mataio 12 - Tokelauan New Testament

Ko te Fehili e uiga ki te Hāpati

¹ I te taimi tēnā, na havali atu ai ia Iehu kui loto o he togāhaito i te aho Hāpati. Kua fia kakaia ona hoko, oi kāmata ai kua tau e ki lātou nā uluhaito ma kai nā fuāhaito.

² Kae i te kitea atuga o te mea tēnei e nā Falehaio, oi lea vē atu ai ki a Iehu, “Kikila, e fai e nā hoko o koe te mea e fakahā i te Tūlāfono, ke fai i te Hāpati!”

³ Kua vāgana atu ia Iehu ki a te ki lātou, “E hēki faitau nei koutou ki te mea a Tavita na fai, i te mauaga i te fia kaia, ko ia ma ki lātou nae fakatahi ma ia:

⁴ i te fanoga ki loto o te fale o te Atua, ma kai nā falaoa kua uma te fakapaia mo te Atua? E hē fakataga ia i te Tūlāfono ke kai ki ei vēnā foki ma iētahi nae fakatahi ma ia, kae nā ko nā ohitāulaga oioti te mafai ke kakai ki ei.

⁵ Pe hēki faitau koutou ki te Tūlāfono a Mohe e lea mai, i Hāpati uma lava, ko te tūlāfono o te Hāpati e holi e nā ohitāulaga i loto o te Mālumalu kae e hē hala lele ai ki lātou?

⁶ E lea atu au ki a te koutou, ei kinei te mea e hili atu tona tāua i lo te Mālumalu.

⁷ E lea mai te tuhituhiga paia, ‘Ko te agalelei te fofou au ki ei, kae hē ko nā tāulaga e fai i nā manuvaefa.’ Ka na iloa lelei e koutou te uiga o te mea tēnei, e hēki fakahalagia e koutou nā tino e hēai ni a lātou holi tūlāfono;

⁸ auā ko te Ataliki o te Tagata, ko te pule ia o te Hāpati.”

Ko te Tamāloa e Mate te Lima

⁹ Kua tukua e Iehu ia kinā, ma kua fano ki he hūnako,

¹⁰ e i ei ai he tamāloa e mate te lima. Nae i kinā ai foki ma ni tino nae taumafai ke ki lātou mōliagia ia Iehu i hana holitūlāfono, ma kua fehili vē atu ki lātou ki a te ia, “E fakataga i te tātou Tūlāfono ke fakamālōlō he tino i te Hāpati?”

¹¹ Kua tali mai ia Iehu, “E vēhea kāfai he tino o koutou e i ei hana māmoe e pakū ki loto o he lua loloto i te Hāpati? Ka hē tago atu nei koe ki ei oi kavake ki luga!

¹² E hē hili atu lele nei te tāua o te tagata i lo te māmoe! Ko te mea ia, e fakataga i te tātou Tūlāfono ke fehoahoani ki he tino i te Hāpati.”

¹³ Oi vāgana atu ai ia Iehu ki te tamāloa e mate te lima, “Fakahako atu tō lima.” Kua fakahako te lima o te tamāloa oi toe lelei ai, kua vē lava ko tētahi ona lima.

¹⁴ Oi olo ai te kau Falehaio ki fafo, ma taupulepule ki he faiga ke tāmate ai ia Iehu.

Ko te Kaukauna Filifilia a te Atua

¹⁵ Kua iloa e Iehu nā taupulepulega kua fai agai ki a te ia, oi fano kehe ai loa ma te koga tēnā; kua taumulimuli atu foki ki a te ia he kaifenua e tokalahi, oi fakamālōlō ai e ia nā tauale uma lele,

¹⁶ ma fakatonu ai e ia ki lātou ke nahe ki lātou takua lele ki iētahi tino e uiga ki a te ia.

¹⁷ Na fai e ia te mea tēnei ke taunuku ai te kupu a te Atua na lea ai te pelofeta ko Ihaia;

¹⁸ “Ko taku kaukauna tēnei, kua kō filifilia, tē e alofa au ki ei, ma fiafia lahi ai au. Ka kō fakatumulia ia i toku Agaga, ma ka ia fakailoa atua ki mālō uma, ma ka ki lātou maua te fakaolataga mai ia te au.

¹⁹ Ka hē tauai kupu lele ia pe taukekē, pe lāuga leo lahi i nā auala.

²⁰ Ka hē ia honafaia nā tino vāivai, pe fakahāuā kinā tino kua hēai he fakamoemoe. Ka ia faia pea lava te mea tēnei ke pa lava ki te taimi e talia ai e tagata uma te fakaolataga e kō tuku atua ki a te ki lātou,

²¹ ma ka i ona luga foki ia fakamoemoega o mālō uma.”

Ko Iehu ma Pelehepulo

²² Oi kaumai e ni tino ki a Iehu he tamāloa e tāuaho ma gūgū, ona e ulufia e he tēmoni. Kua fakamālōlō e Iehu te tamāloa, ma na mafai ai te tamāloa ke tautala ma kitea e ona mata.

²³ Na ofo lele te kaifenua uma ki te mea kua fai e Iehu, ma lea vē, “E hē ko te Ataliki nei tēnei o Tavita?”

²⁴ I te lagonaga e nā Falehaio te mea tēnei, oi tali vē atu ai, “E tuli e ia nā tēmoni ki fafo auā e fōki ki ei e Pelehepulo, te takitaki o tēmoni, te pule ke ia mafaia ai.”

²⁵ Kua iloa e Iehu nā mea i o lātou māfaufau, oi vāgana atu ai ki ei, “Ho he mālō e fevaevaeaki ma tauai miha lava ki lātou, ka hē tūmau mataloa. Ma ho he nuku pe he kāiga e fevaevaeaki ma tauai miha lava ki lātou, ka mālepelepe.

²⁶ Kāfai la he vāega e tauai miha ma hētahi vāega i te mālō o Hātani, tona uiga kua uma te vāevāe vāega ma ka hē mataloa kae mālepelepe!

²⁷ Ma kāfai ko nā tēmoni e tuli e au ki fafo i te pule a Pelehepulo, e mai ia te ai la te pule e tuli ai ki fafo nā tēmoni e nā hoko o koutou? Ko nā mea e fai e nā hoko o koutou e fakamāonia ai ko koutou e hehē!

²⁸ Hēai, e hē ko Pelehepulo kae ko te Agaga o te Atua te fōki maia ki a te au te pule ke tuli ai nā tēmoni ki fafo, ma e fakamāonia ai ko te Mālō o te Atua kua i kinei ia te koutou.

²⁹ “E hē mafai he tino ke fano ki loto o te fale o he tagata mākeke ke kaihohoa ana mea; heiloga e mua noanoa e ia te tagata mākeke, oi fātoā ia mafaia ai oi kaihohoa nā mea uma i tona fale.

³⁰ “Ko te tino e hē kau mai ki a te au, e teteke ki a te au; ko te tino e hē fehoahoani ki a te au i te takitakiga o tagata ki te Atua, e fakatākapekape e ia.

³¹ Ko te mea ia e lea atu ai au ki a te koutou; ho he agahala pe he kupu fāifāi ki te Atua e mafai ke fakamāgalo, kae ko ai lava e fāifāi ki te Agaga Paia, ka hē fakamāgaloa lele ia e te Atua.

³² Ho he tino e fai hana kupu e teteke ai ki te Ataliki o te Tagata e mafai ke fakamāgalo; kae ko ai lava e fai hana kupu e teteke ai ki te Agaga Paia, ka hē fakamāgaloa lele ia e te Atua — i te ōlaga nei pe ko te ōlaga ka hau.

Ko te Lākau ma ona Fua

³³ “Ke mafai oi fua mai ni fua lelei, e tatau te lākau ke ola lelei; kāfai te lākau e ola kino, ka vēnā foki oi fua mai ai nā fua e kino. E iloa te lākau i nā fua e fua mai ai.

³⁴ Ko koutou e vē ko fānau a gata — e tautatala vēhea koutou ki ni mea lelei ka ko koutou e kino? Auā e tautala te gutu i nā mea e tumu ai te loto.

³⁵ Ko te tino lelei, e fakaputu i tona loto nā mea lelei e vē ni koloa tāua, ma e tautala i nā kupu lelei mai te lahi o te lelei i tona loto; ko te tino kino e fakaputu i tona loto nā mea kino e vē ni koloa kino, ma e tautala i nā kupu kino mai te lahi o te kino i tona loto.

³⁶ “E takutino atu e au ki a te koutou, kāfai e fakamahino e te Atua ia tagata uma, ko te taimi tēnā ka tōlaulau ai e tagata nā kupu uma lele e hēki tatau ke tautatala ai ki lātou.

³⁷ Ko au kupu na tautala ai koe ka toe fakamahino ai lava koe — ka iloa ai pe hala koe pe hēai.”

Ko te Fakatagi mo he Fakailoga Ofoofogia

³⁸ Oi lea atu ai iētahi faiakoga o te Tūlāfono ma ni tino o te kau Falehaio ki a Iehu, “Te Faiakoga, ko ki mātou e fia kikila ki he fakailoga ofoofogia mai te Atua ke fakamāonia ai nā mea e lea ai koe.”

³⁹ Kae kua tali mai ia Iehu ki a te ki lātou, “Kai te kino ma te hē talitonu ki te Atua o tagata i nā aho nei! Ko koutou e lea mai ke fai he fakailoga ofoofogia? Hēai! Oioti lava te fakailoga e fai mo koutou, ko te fakailoga ofoofogia na fai ki te pelofeta ko Iona.

⁴⁰ E vēia ona i loto ia Iona i te manava o te tafolā i nā ao ma nā pō e tolu, ka vēnā foki oi i ei i te loloto o te kelekele te Ataliki o te Tagata i nā ao ma nā pō e tolu.

⁴¹ I te Aho Fakamahino, ka tutū mai ia tagata o Nineva ma mōlia koutou, auā na liliu kehe ki lātou mai a lātou agahala i te ki lātou lagonaga o te fekau a Iona; ma e lea atu au ki a te koutou, kua i kinei he mea e hili atu te tāua i lo Iona!

⁴² I te Aho Fakamahino, ka tū mai te Tupu fafine o Heepa ma mōlia koutou ke fakahala, auā ko ia na malaga mamao mai tētahi itū o te lalolagi ke fakalogo ki te poto o te Tupu ko Holomona; ma e takutino atu e au ki a te koutou, kua i kinei he mea e hili atu te tāua i lo Holomona!

Ko nā Mea e Kino ka Hili atu te Kino

⁴³ “Kāfai he agaga kino e fano ki fafo o he tino, e kui atu i nā kogāfenua mātūtū, ma taukikila ki he mea ke mapu ki ei. Kāfai e hē ia maua he mea,

⁴⁴ oi lea vē ai ki a te ia lava, ‘Ko au ka toe foki ki toku fale, te mea na hau ai nei au.’ Oi toe foki ai ma maua atu e ia te fale e gāogāo ma mamā ma kua toe hāuni lelei.

⁴⁵ Oi fano ai oi kaumai iētahi agaga e fitu e hili atu to lātou kino i lo ia, oi nonofo ai i kinā. E iku ake, kua hili atu te kino lahi o te tūlaga kua pa ia ki ei, i lo te mea nae i ei ai muamua. E vēnei foki lava te mea ka pa ki ei nā tino kino i nā aho nei.”

Ko te Mātua ma nā Uho o Iehu

⁴⁶ Koi tautala ia Iehu ki nā tino kae taunuku mai tona mātua ma ona uho. Kua tutū atu ki lātou i fafo kae kave te lātou faifekau ki a Iehu ko ki lātou e fia faitala ake ki a te ia.

⁴⁷ Oi lea atu ai he tino nae i kinā ki a Iehu, “Kikila, ko tō mātua ma ō uho e tutū i fafo, e fia faitala atu ki a te koe.”

⁴⁸ Kua tali mai ia Iehu ki ei, “Ko ai toku mātua? Ko ai oku uho?”

⁴⁹ Oi tuhi ai tona lima ki nā hoko o ia ma lea vē atu, “Kikila, iēnei oku mātua ma oku uho!

⁵⁰ Ko ai lava e ia faia te finagalo o toku Tamana i te lagi, ko toku uho tēnā, ko toku tuafafine tēnā ma toku mātua tēnā.”