Loma 3 - Tokelauan New Testament

¹ E i ei la he mea e hili atu ai ia tagata Iutaia i lo tagata nukukehe? Pe, he ā foki te aogā o te pelitome?

² E lahi, kāfai e kikila ki nā itū kehekehe. Muamua, na tuku e te Atua tana fekau ki nā tino Iutaia ke ki lātou taupaua.

³ Kae e vēhea kāfai e i ei ni tino o ki lātou e hē fakamāoni? Ko tona uiga ko te Atua foki la ka hē fakamāoni?

⁴ Hēai, e hē vēnā! E ui lava ko tagata uma lele e talapepelo, ka ko te Atua lava ia e fakamāoni, e vē oi lea mai ai te tuhituhiga paia, “E tatau ke kitea te hako o au kupu; e tatau ke mālō koe kāfai e fai hō fakamahinoga.”

⁵ Kae e vēhea kāfai ko te fai e ki tātou o nā mea hehē e fakaalia ai te hako o nā mea e fai e te Atua? E mafai nei ke lea ki tātou ko te Atua e hehē kāfai ki tātou e fakahala e ia? (Ko he fehili tēnei e tatau lava ke fehili ai.)

⁶ Hēai! Kāfai te Atua e hē fai meatonu, e vēhea ona fakamahino e ia te lalolagi?

⁷ Kae e vēhea kāfai ko toku talapepelo ka fai ma mea e fakaalia lelei ai te meamoni e uiga te Atua, ma lahi ai ona vīkiga e maua? He ā la te fakahalagia ai pea au e te Atua ko he tino agahala?

⁸ He ā te hē lea ai vē ki tātou, “Ōmamai ke ki tātou faia nā mea kino, kae ke tupu mai ai he lelei.”? E i ei ni tino kua ki lātou fakamātagāgia au i te lātou tala kua fai, ko nā fakakupuga iēnei e āku na fai. Ka fakahalagia ki lātou ma ko he mea tēnei e tonu ma hako.

E Hēai he Tino e Tonu i te Kikila a te Atua

⁹ E i ei nei la he mea e hili atu ai ki mātou tagata Iutaia i lo nā tino nukukehe? E hēai lele. Kua uma te fakailoa atu e au, e tutuha lava nā tino Iutaia ma nā tino nukukehe; ei lalo uma lava o te pule a te agahala.

¹⁰ E vē oi lea mai nā Tuhituhiga Paia; “E hēai lele he tino kua fakaleleia tona va ma te Atua,

¹¹ e hēai he tino e mālamalama i te mea e tonu pe hakilikili atu ke māfuta ma te Atua;

¹² Kua liliu kehe uma ki lātou ma te Atua; kua hehē uma ki lātou; e hēai he tino e faia te mea e tonu, e hēai he tino e fokotahi.

¹³ Ko o lātou gutu e vē ko he tugamau e matala; e fakaaogā o lātou laulaufaiva e fakahehē ai, ma o lātou laugutu e fakamātakutaku e vē ko te kona o te gata;

¹⁴ ko a lātou kupu e tumu i te ita ma te fetū.

¹⁵ E vave lele te ki lātou fakaogohia ma te tāmate tino;

¹⁶ ho he mea lava e olo ki ei, e nā ko te fakatāugā ma pagātia ai o tagata.

¹⁷ Ko hēki ki lātou iloa te auala o te fīlēmū,

¹⁸ ma ko hēki ki lātou iloa oi mātataku i te Atua.”

¹⁹ Nei, kua iloa e ki tātou ko ho he mea lava e lea mai ai te Tūlāfono, e fakaaga ki a te ki lātou e i lalo o te Tūlāfono, kae ke mafai ai ke tapuni ia gutu o tagata uma, ma kaumai ai te lalolagi kātoa ki lalo o te fakamahinoga a te Atua.

²⁰ Auā e hēai he tino e mafai ke fakalelei tona va ma te Atua, ona e mulimuli ki nā mea e lea mai ai te Tūlāfono; auā ko te Tūlāfono e maua ai e ki tātou te mālamalama e uiga ki te agahala.

Ko te Auala e Fakalelei ai e te Atua to tātou va ma Ia

²¹ Kae i te taimi nei, ko te auala e fakalelei ai e te Atua te va o tagata ma ia, kua uma te fakailoa mai. E hēki kui mai i te tūlāfono te mea tēnei, e ui lava na molimau te Tūlāfono a Mohe ma te kau pelofeta ki ei.

²² E fakalelei e te Atua te va o tagata ma ia e ala i te fakatuatua ki a Iehu Keliho. Ko te mea tēnei e fai e te Atua ki nā tino uma e talitonu ki a Keliho, auā ko tagata uma lele e tutuha.

²³ Ko ki tātou uma lele kua agahala, ma kua hē ki tātou mafaia ai oi fakailoa atu te mamalu o te Atua.

²⁴ Kae ona ko te alofa tūnoa o te Atua, tana meaalofa fōki fua mai, kua fakalelei ai te va o ki tātou uma ma ia, e ala i te togihala kua hāunia e Keliho Iehu, ke maua ai e ki tātou te haolotoga.

^25-26 Na ofo atu ia e te Atua kae ke kavea ai tona toto ma auala e fakamāgalo ai ia agahala a tagata, e ala i to lātou fakatuatua ki a te ia. Na fai e te Atua te mea tēnei ke fakakitea ai ko ia e āmiotonu. I nā aho kua teka, ko te Atua nae onohai ma ko te ala ia na hēki fia mātau ai e ia nā agahala a tagata; kae i nā aho nei, kua mātau e ia kae ke fakakitea ai tona āmiotonu. I te faiga tēnei, kua fakaalia ai e te Atua lava ia, ko ia e āmiotonu ma e ia fakaleleia te va o tagata uma ma ia.

²⁷ He ā la he mea ke fāfifia ai ki tātou? E hēai lele he mea! Aiheā? Ona nei ko ki tātou e uhitaki ki te Tūlāfono? Hēai, kae ona ko ki tātou e talitonu.

²⁸ Auā kua ki tātou iloa, ko te fakatuatua oioti lava te fakalelei ai te va o he tino ma te Atua, kae e hē ko te mulimuli kinā mea e lea mai ai te Tūlāfono.

²⁹ Pe ko te mea ko te Atua, e o tagata Iutaia oioti? E hē ko ia nei foki te Atua o tagata nukukehe? Io, e o tagata nukukehe foki.

³⁰ E fokotahi oioti lava te Atua, ma ka ia fakaleleia te va o tagata Iutaia ma ia, e ala i to lātou fakatuatua. Ka vēnā foki oi ia fakaleleia te va o tagata nukukehe ma ia, e ala i to lātou fakatuatua.

³¹ Ko tona uiga e fakahēaogā e ki tātou te Tūlāfono ona ko ki tātou e fakatuatua? Hēai, kae e fakamautū lelei ai e ki tātou te Tūlāfono, e vē ko te tūlaga e tatau ona i ei ai.