Kolohe 3 - Tokelauan New Testament

¹ Kua uma te fakatutū o koutou mai te oti ki te ola fakatahi ma Keliho. Ke fakatāua la i nā loto o koutou nā mea i te lagi, te mea e nofo ai ia Keliho i tona nofoāliki, i te itū taumatau o te Atua.

² Fakafano pea lava outou māfaufau ki nā mea i te lagi, kae e hē ki nā mea i te lalolagi.

³ Auā ko koutou kua oti, ma ko te ola fou o koutou ko hēki fakaaliagia e vē foki lava ko Keliho, i te hokotaga ma te Atua.

⁴ Ko te ola moni o koutou ko Keliho, ma kāfai e hau, oi ko koutou foki ka ōmamai fakatahi ma ia, ma ka i ei fakatahi koutou i tona mamalu.

Ko te Ōlaga Tuai ma te Ōlaga Fou

⁵ Fakauma loa la nā manakoga o te lalolagi e pūleagia outou tino, e vē ko te tuinanau ki te tino, faiamio mātagā, nanau, nauloto kino, ma te kaimanako (auā ko te kaimanako e tutuha ma te ifo ki tupua).

⁶ Ona ko nā mea iēnei, ka pakū ai te tōkahā o te Atua ki a te ki lātou e hē uhitaki ki a te ia.

⁷ E i ei te vāitaimi nae fai ai e koutou nā uiga iēnei, ka koi pūlea mālohi ai nā ola o koutou e nā uiga iēnei.

⁸ Kae nei, kua tatau ke tīaki e koutou nā mea uma iēnei: ko te loto fekai, ko te nauloto ma nā lagona kino. Nahe i ei lele ni kupu fakakino, pe ni kupu palapalā e hau mai outou gutu

⁹ Nahe pepelo tētahi ki tētahi, auā kua uma te koutou tuku keheagia o te tino tuai ma ona uiga

¹⁰ ma kua i ei outou tino fou. Ko te tino ola fou tēnei e fakafougia pea lava e te Atua tē na faia ia mea uma, ke fōliga ki a te ia, kae ke mālamalama kātoatoa ai koutou e uiga ki a te ia.

¹¹ Ma ko te mea ia, kua hē toe i ei ai he kehekehega o nā tino Iutaia ma nā tino nukukehe, nā tino kua pelitome ma ki lātou e hēki pelitomea, nā tino hē taupulea, nā tino fakapaupau, nā pologa, ma nā tino haoloto, kae ko Keliho ko te kātoaga ia o nā mea uma, ko ia e i nā mea uma.

¹² Ko koutou ko nā tino o te Atua; na alofa atu te Atua ki a te koutou, ma na ia filifilia koutou ke fai mo ia. Ko te mea ia e tatau ai koutou ke kokofu i te tīgā alofa, agalelei, loto maulalo, agamalū ma te onohai.

¹³ Ke maua e koutou te loto onohai o tētahi ki tētahi, ma kāfai e i ei he faitioga a he tino o koutou ki hētahi tino, ke maua e koutou te agaga fakamāgalo i ho he taimi. E tatau ke fakamāgalo tētahi ki tētahi, e vē oi fakamāgalo koutou e te Aliki.

¹⁴ Ma ke fakaopoopo ki nā uiga lelei uma iēnei te alofa, tēia e ōpoi fakatahia nā mea uma, ma kātoatoa lelei ai.

¹⁵ Ko te fīlēmū e fōki atu e Keliho, ke takitakia ai koutou i autou tonu e fai; auā ko te fīlēmū tēnei kua kalagagia fakatahi ai koutou e te Atua, i te tino e tahi. Ma e tatau la koutou ke maua i te loto fakafetai.

¹⁶ Ko te fekau a Keliho e tatau ke mau i loto ia te koutou, ma fakaaogā te poto ke akoako ma akoaki ai tētahi e tētahi. Lagi nā halamo, nā pehe e uiga ki te ola fakateagaga; pepehe atu ki te Atua ma outou loto fakafetai.

¹⁷ Ko nā mea uma la e fai e koutou, e tatau ke fai e koutou mo te Aliki ko Iehu, e vē oi fakafetai koutou kui atu ia te ia, ki te Atua te Tamana.

Hokotaga Tau Tokatahi i te Ola Fou ia Keliho

¹⁸ Koutou nā fafine kua fakaipoipo, uhitaki ki autou tāne, auā ko te tū faka-Kelihiano tonu ia e tatau ke koutou faia.

¹⁹ Koutou tāne, alolofa ki autou āvaga ma nahe koutou fakahāuā ki ei.

²⁰ Koutou tamaiti, ko he tiute faka-Kelihiano e o koutou ke uhiuhitaki ki outou mātua i taimi uma, auā ko te mea tonu ia e fiafia ki ei te Atua.

²¹ Koutou mātua, koutou nā fakakonokono ki a autou fānau, auā e i na ka fakalotovāivai ai ki lātou.

²² Koutou nā pologa, uhitaki ki outou matai fakatetino i nā mea uma lele, nahe koutou uhitaki oioti ona e kikila atu kae ke taku leleia ai koutou; kae fai ma te koutou loto fakamāoni, ona ko koutou e mātataku i te Aliki.

²³ Pe ko he ā lava he mea e fai e koutou, fai ma te loto kātoatoa, e vē ko koutou e gālulue mo te Aliki, ka e hē mo tagata.

²⁴ Ke manatua e koutou, ka fōki atu e te Aliki ke fai ma outou taui, te mea kua ia teuagia mo tana fānau. Auā ko Keliho, ko te Matai ia e kaukauna koutou ki ei.

²⁵ Ma ko tagata holitūlāfono tau tokatahi uma, ka toe taui atu lava ki ei a lātou holitūlāfono, auā ka fakamahinogia e te Atua ia tagata uma, i te fua e fokotahi.