Ioane 6 - Tokelauan New Testament

Kua Fafaga e Iehu he Kaifenua Tokalahi

¹ Kua uma atu te mea tēnei, oi fano ai ia Iehu ki tētahi itū o te Vaitūloto ko Kalilaia (ko Tipelia tētahi ona igoa).

² E tokalahi te kaifenua kua mulimuli atu ki a te ia, ona na kitea e ki lātou nā fakailoga na ia faia na fakamālōlō ai nā tauale.

³ Oi fano ai ia Iehu ki luga o he mauga, kua nofo ki lalo i kinā fakatahi ma ona hoko.

⁴ I te taimi tēnā, kua tāli pa ki te Kaiga Fakamanatu o te Pāheka.

⁵ I te kitea atuga e Iehu te tokalahi o nā tino kua ōmamai ki a te ia, oi fehili ai ki a Filipo, kua vē atu, “Ko fea he mea e mafai ke fakatau mai ai ni falaoa e lava, ke fafaga ai nā tino uma iēnei?”

⁶ (Na lea vēnā ki a Filipo, ke kikila pe ka vēhea ake hana tali; kae ko te meamoni, kua uma te ia iloa tana mea ka fai ka ko hēki fehili ai.)

⁷ Kua tali mai ia Filipo, “E hē tāitai ke lava nā falaoa e mafai ke fakatau mai i te 200 tupe hiliva ke maua ai he tamā mea ma nā tino tau tokatahi uma lele iēnei.”

⁸ Kua lea atu foki ki a Iehu tētahi o te kau hoko, ko Anitelea te uho o Himona Petelu, kua vē atu,

⁹ “E i ei te taumalo i kinei, e lima ana falaoa kālite ma nā ika e lua, kae e hē tāitai lele ke lava mo te tokalahi o nā tino iēnei.”

¹⁰ E lahi te mutia e ola i te mea tēnā, oi vāgana atu ai ia Iehu ki ona hoko, “Fakanonofo nā tino ki lalo.” Oi nonofo uma ai ki lalo nā tino; e tuha e lima afe ia tamāloa nae i ei.

¹¹ Oi tago ai ia Iehu ki nā falaoa, kua fakafetai ki te Atua, oi fakahoa ai ki nā tino uma nae nonofo i kinā. Na fai vēnā foki e ia nā ika, ma na lava lele ai ma totoe mo ki lātou uma tau tokatahi.

¹² Kua mākokona uma ki lātou, oi vāgana atu ai ia Iehu ki ona hoko, “Fakaputu uma mai nā toegā meakai; nahe fakamāumaua lele he mea.”

¹³ Oi fakaputu uma ai e ki lātou, ma e hefulu lua ia polapola lalahi na tūtumu i nā tōega mai nā falaoa kālite e lima na fafaga ai nā tino.

¹⁴ I te kiteaga e nā tino te fakailoga na fai e Iehu, oi lea vē ai ki lātou, “E hako lava ko te Pelofeta tēnei na tuku e hau ki te lalolagi!”

¹⁵ Kua hāfia e Iehu ko nā tino ka ōmamai oi kave fakamālohi ia ke fai ma o lātou tupu; oi toe fano kehe ai, kua fano tautahi ki luga o he mauga.

Kua Havali ia Iehu i Luga o te Kilitai

¹⁶ I te fakaafiafi, oi olo ai nā hoko o Iehu ki te vaitūloto,

¹⁷ kua hohopo ki luga o he vaka, oi olo ai ki tētahi itū o te vai agai ki Kapenaumi. Kua pō ifo lava kae ko hēki hau lava ia Iehu ki a te ki lātou.

¹⁸ I te taimi tēnā, ko te matagi kua kāmata oi agi mālohi, ma kua hou te vai.

¹⁹ Pe kua kātoa te tolu pe ko te fa maila ki gātai te mamao o te mea kua aloalo ki ei to lātou vaka, oi kitea ai e ki lātou ia Iehu e havali i luga o te kilitai ma kua pili mai ki te vaka, oi na mātataku lele ai ki lātou.

²⁰ “Koutou nahe mātataku, ko au tēnei,” kua lea vēnā mai ia Iehu ki ona hoko.

²¹ Oi fakahopo ake ai e ki lātou ia Iehu ki luga o te vaka ma o lātou loto kua tumu i te fiafia, ma e hēki mataloa lele kae taunuku loa te vaka ki te mea na olo agai ki ei.

Kua Hakili ia Iehu e Tagata

²² I te aho na hohoko ai, na manatua ai e te kaifenua nae nonofo i te itū i hahae o te vai, e fokotahi oioti te vaka nae i kinā. E iloa e ki lātou ko Iehu e hēki olo fakatahi i te vaka ma ona hoko, kae nā ko ona hoko oioti te na olo.

²³ Ka ko iētahi vaka mai Tipelia, na tau ake tafapili ki te mea na kakai ai te kaifenua i nā falaoa, ina kua uma te fai o te fakafetai e te Aliki.

²⁴ Kae i te kitea atuga e nā tino ko Iehu kua hē i kinā vēnā foki ma ona hoko, oi toe hohopo ai ki luga o nā vaka, ma kua olo ki Kapenaumi oi hakili ia Iehu.

Ko Iehu te Falaoa o te Ola

²⁵ I te maua atuga e ki lātou o Iehu i tētahi itū o te vaitūloto, oi lea vē atu ai ki ei, “Te Faiakoga, ko koe na hau anafea ki kinei?”

²⁶ Kua tali mai ia Iehu, “E takutino atu e au ki a te koutou te meamoni; ko au e koutou hakilia ona ko koutou na kakai mākokona i nā falaoa, kae hē ona ko koutou kua mālamalama i nā fakailoga na fai e au.

²⁷ Koutou nahe gālulue mo nā meakai e pala; kae gālulue mo nā meakai e tūmau pea lava te lelei, ma e maua ai te ola e fakavavau. Ko nā meakai iēnei ka fōki atu ki a te koutou e te Ataliki o te Tagata, auā kua ia te ia te fakatagaga mai te Atua te Tamana.”

²⁸ Oi lea atu ai ki lātou ki a Iehu, “He ā nei te tatau ke ki mātou faia, ke fakataunuku ai nā mea e fofou ki ei te Atua?”

²⁹ Kua tali mai ia Iehu, “Ko te mea e fofou ki ei te Atua, ko koutou ke talitonu ki tē na ia uga maia.”

³⁰ Kua lea atu ki lātou, “He ā he fakailoga e kē mafaia oi fai ke kikila ki mātou ki ei, kae ke talitonu atu ai ki mātou ki a te koe? He ā te kē mafaia oi fai?

³¹ Na kakai o mātou tupuna i te mānai i te vao, e vē ona tākua i te tuhituhiga paia, ‘Na fōki e ia ki a te ki lātou nā falaoa mai te lagi ke kai.’ ”

³² Oi lea atu ai ia Iehu ki a te ki lātou, “E takutino atu e au ki a te koutou te meamoni, ko te mea na fōki atu e Mohe e hē he falaoa mai te lagi; ko toku Tamana te ia fōki atua te falaoa moni mai te lagi.

³³ Auā ko te falaoa e fōki atu e te Atua ko ia tēnā e fanaifo mai te lagi ma fōki atu te ola ki te lalolagi.”

³⁴ “Te aliki,” kua lea atu ki lātou ki a te ia, “fōki mai ko te falaoa tēnā ki a te ki mātou i taimi uma!”

³⁵ Kua tali mai ia Iehu, “Ko au ko te falaoa o te ola. Ko nā tino e ōmamai ki a te au, e hē toe fia kakaia lele; ko nā tino e talitonu mai ki a te au, e hē toe fia inua lele.

³⁶ E vē ona lea atu au, kua uma te koutou kiteagia au, kae ko koutou e hē fia talitonu.

³⁷ Ko nā tino uma lele e fōki mai e toku Tamana ki a te au, e ōmamai lava ki a te au. E hē kō tetekea lele he tino e hau ki a te au,

³⁸ auā ko au e hēki fanaifo mai te lagi ke fai te mea e loto au ki ei, kae ke fakataunuku te finagalo o tē na ia uga maia au.

³⁹ Ma ko te finagalo o tē na ia uga maia au, ke nahe kō faia he mea ke māumau ai he ola o he tino o ki lātou uma kua ia fōki maia ki a te au, kae ke kō fakatutūa uma ki lātou ki te ola, i te aho mulimuli.

⁴⁰ Auā ko te mea e fofou ki ei toku Tamana, ko nā tino uma e ki lātou talia te Ataliki ma talitonu ki ei, e tatau ke maua e ki lātou te ola e fakavavau. Ma ka kō fakatutūa ki lātou ki te ola, i te aho mulimuli.”

⁴¹ Oi kāmata ai kua mūimui ia tagata Iutaia e uiga ki a te ia, ona na lea vē, “Ko au ko te falaoa na fanaifo mai te lagi.”

⁴² Kua lea vē ki lātou, “E hē ko Iehu tēnei te ataliki o Iohefa, ko ona mātua e ki tātou iloa uma? Kae e vēhea la ona lea ko ia na fanaifo mai te lagi?”

⁴³ Kua tali atu ia Iehu ki a te ki lātou, “Koutou nahe mūimui.

⁴⁴ E hē mafai nā tino ke ōmamai ki a te au, vaganā e takitaki mai ki a te au e te Tamana, tē na ia uga maia au; ma e kō fakatutūa ki lātou ki te ola, i te aho mulimuli.

⁴⁵ Na tūhia e nā pelofeta, ‘Ko tagata uma ka akoakogia e te Atua.’ Ko nā tino uma e fakalogo ki te Tamana ma maua ho lātou akoakoga mai ia te ia, e ōmamai ki a te au.

⁴⁶ E hē vē la e i ei he tino na kua ia kiteagia te Tamana; ko tē e hau mai i te Atua, ko ia oioti lava te kua ia kiteagia te Tamana.

⁴⁷ E takutino atu e au ki a te koutou te meamoni; ko ai lava he tino e talitonu, ka maua e ia te ola e fakavavau.

⁴⁸ Ko au ko te falaoa o te ola.

⁴⁹ Na kakai nā tupuna o koutou ki te mānai i te vao, kae na oti.

⁵⁰ Ka ko te falaoa e fanaifo mai te lagi, e kehe, ma ko ai lava e kai ki ei, ka hē oti lele.

⁵¹ Ko au ko te falaoa o te ola na fanaifo mai te lagi. Kāfai koutou e kakai ki ei, e maua e koutou te ola e fakavavau. Ko te falaoa ka fōki atu e au, ko toku kanofi, e fōki atu kae ke fakaola ai te lalolagi”

⁵² Oi kāmata ai kua tauaikupu nā tino Iutaia, ma lea vē, “E vēhea ona fōki mai e te tagata nei tona kanofi ke kai e ki tātou?”

⁵³ Oi lea atu ai ia Iehu ki a te ki lātou, “E takutino atu e au ki a te koutou te meamoni; ka hē kakai koutou ki te kanofi o te Ataliki o te Tagata, ma inu ki tona toto, ka hē ia te koutou te ola.

⁵⁴ Ko nā tino e kakai ki toku kanofi ma inu ki toku toto, e maua e ki lātou te ola e fakavavau, ma e kō fakatutūa ki lātou ki te ola, i te aho mulimuli.

⁵⁵ Auā ko toku kanofi ko te meakai moni ia, ma toku toto ko te vai inu moni ia.

⁵⁶ Ko nā tino e kakai ki toku kanofi ma inu ki toku toto, e tūmau ki lātou ia te au, ma au foki ia te ki lātou.

⁵⁷ Ko te Tamana te puna o te ola, tē na ia uga maia au, ma ko au e ola ona ko ia. E vēnā foki la ona ola ho he tino e kai ki toku kanofi, ona ko au.

⁵⁸ Tēnei la te falaoa na fanaifo mai te lagi; e hē vē ko te falaoa na kai e nā tupuna o koutou, kae mulimuli ake na feoti. Ko nā tino e kakai ki te falaoa tēnei, ka ola pea lava.”

⁵⁹ Na lea ia Iehu i nā mea iēnei, i tana akoakoga nae fai i loto o te hūnako i Kapenaumi.

Nā Kupu e Maua ai te Ola e Fakavavau

⁶⁰ Ko te tokalahi o tagata nae mulimuli ki a Iehu, na ki lātou lagona atu te mea tēnei, oi lea vē ai, “Kai te faigatā ātili o tēnei akoakoga. Ko ai te fia fakalogo ki ei?”

⁶¹ E hēki lea he tino ki a Iehu, ka kua uma te ia iloa o te mea e mūimui ai ki lātou. Oi lea atu ai ki a te ki lātou, “Ko koutou nei ka fakavāivai ona ko te mea tēnei?

⁶² E vēhea nei la kāfai kua koutou kitea atu te Ataliki o te Tagata, kua toe fanake ki luga ki te mea nae i ei ai muamua?

⁶³ Ko te Agaga o te Atua te maua ai te ola; ko te mālohi o te tagata e matuā hēai lava he aogā. Ko nā kupu kua tautala atu ai au ki a te koutou, e maua ai e koutou te ola mai te Agaga o te Atua.

⁶⁴ Kae e i ei nā tino o koutou e hē talitonu.” (Na iloa lava e Iehu i te kāmataga, nā tino e hē talitonu ake ki a te ia, ma te tino e ia fakalatagia ia.)

⁶⁵ Oi toe lea vē atu ai, “Ko te mea tonu lava tēnei na ala ai toku lea atu, e hē mafai ni tino ke ōmamai ki a te au, vaganā e uga mai e te Tamana.”

⁶⁶ Ona ko te mea tēnei, na holomuli ai te tokalahi o ki lātou nae mulimuli ki a Iehu, kua hē toe mulimuli ki ei.

⁶⁷ Oi fehili ai atu ia Iehu ki te toka hefulu lua, kua vē atu, “Ko koutou — e fia olo kehe foki koutou?”

⁶⁸ Kua tali mai ia Himona Petelu, “Te Aliki, ko ki mātou e olo ki a te ai? E ia te koe nā kupu e maua ai te ola e fakavavau.

⁶⁹ Ko ki mātou kua talitonu ki a te koe, ma kua ki mātou iloa ko koe ko te Tokatahi Paia na hau mai te Atua.”

⁷⁰ Kua tali atu ia Iehu, “Na kō filifilia te koutou toka hefulu lua? Kae ko tētahi o koutou, ko he tiāpolo.”

⁷¹ Ko Iehu nae tautala e uiga ki a Iuta, te ataliki o Himona Ihikaliota. E ui lava ko Iuta ko hētahi o te toka hefulu lua, kae ka fakalata e ia ia Iehu.