Gāluega 6 - Tokelauan New Testament

Nā Tino e Toka Fitu na Fehoahoani ki te kau Apohitolo

¹ I he taimi mulimuli ake, kua tuputupu pea lava te nūmela o nā tino kua talitonu ki a Iehu, na tupu ai he fekehekeheakiga i te va o nā tino Iutaia e tautatala i te gagana Eleni ma nā tino Iutaia lava e nonofo i kinā. E lea nā tino Iutaia e tautatala i te gagana Eleni, ko nā fafine o ki lātou kua feoti a lātou āvaga, e hē maua ni o lātou vāega i nā tupe e fakahoahoa i nā aho takitahi.

² Oi fakamāopoopo mai ai e te kau apohitolo e toka hefululua, nā tino uma lele kua talitonu ma lea vē atu ki ei, “E hē he mea tatau ke tuku e ki mātou te tālakiga o te kupu a te Atua, kae ke kikila e ki mātou te mea tau tupe.

³ Ko te mea ia te kau uho, filifili mai ko ni tino o koutou e toka fitu ke ki lātou faia te gāluega tēnei. Ni tino kua fakamoemoegia ma e iloa e tagata kua fakatumulia ki lātou i te Agaga Paia ma i te poto.

⁴ Kae ke tukutahi lava o mātou taimi ki te tatalo ma te tālakiga o te kupu a te Atua.”

⁵ Na fiafia uma lele te fakapotopotoga ki te mea tēnei kua lea ake ai te kau apohitolo; oi na filifili ai e ki lātou ia Hetefano, he tino kua fakatumulia i te fakatuatua ma te Agaga Paia, vēnā ma Filipo, ko Pelokolona, ko Nikanola, ko Timona, ko Pamena, ma Nikolao, he tagata nukukehe mai Anitioka na liliu ki te tāpuakiga Iutaia.

⁶ Kua tuku atu ki lātou iēnei e te fakapotopotoga ki te kau apohitolo, oi tatalo ai te kau apohitolo ma fakaeke atu ki ei o lātou lima.

⁷ Ma ko te kupu a te Atua kua halalau pea lava. Kua tuputupu pea lava te nūmela o tagata kua talitonu ki a Iehu i Ieluhalema; ma e tokalahi nā ohitāulaga na ki lātou taliagia te Tala Lelei.

Kua Puke ia Hetefano e nā Takitaki o Iutaia

⁸ Ko Hetefano ko he tino na fakamanuiagia lahi e te Atua ma nae ia te ia te mana. Na fai e ia nā vāvega uiga kehe ma nā mea ofoofogia i te mea e i ei ia tagata.

⁹ Kae nae teteke ki ei ni taulelea mai te hūnako o Tagata kua Fakahaolotogia (e vē oi fakaigoa ai), ma e aofia ai nā tino Iutaia mai Kulene ma Alehania. Ko ki lātou iēnei fakatahi ma iētahi tino Iutaia mai nā kogāfenua o Kilikia ma Ahia, kua kāmata oi fai fīnauga ma Hetefano.

¹⁰ Kae kua tuku atu e te Agaga o te Atua ki a Hetefano te poto, ma kua hē mautali ai ki lātou ki a te ia.

¹¹ Ko te mea ia na ki lātou fakaoleolea ai ni taulelea i ni tupe ke fai ni a lātou tala vē, “Na lagona e ki mātou ia Hetefano e faikupu fāifāi ki a Mohe ma te Atua!”

¹² Ko te fakakupuga tēnei na tīgā ai ia loto o tagata, nā toeaina ma nā faiakoga o te Tūlāfono. Oi puke ai e ki lātou ia Hetefano ma kave ki mua o te Taupulega.

¹³ Oi kaumai ai e ki lātou ni taulelea ke molimau pepelo e uiga ki a Hetefano. Kua lea vē atu nā taulelea, “Ko te tagata tēnei e teteke pea lava i ana kupu e tautala ai, ki te Mālumalu paia vēnā ma nā Tūlāfono a Mohe.

¹⁴ Na ki mātou lagona e lea ko te Iehu tēnei mai Nahaleta, ka talepe e ia ki lalo te Mālumalu, ma tahui na tu māhani uma na tuku mai ki a te ki tātou e Mohe!”

¹⁵ Ko ki lātou uma nae i loto o te fono kua kikila lava ki a Hetefano, ma ki lātou kitea atu ai ko ona mata kua vēia ni mata e o he agelu.