Fakaaliga 8 - Tokelauan New Testament

Kua Tatala te Fitu o Fakamaufakailoga

¹ I te tatalaga o te fitu o fakamaufakailoga e te Punuamāmoe, na matuā hēai lava he piha i te lagi mo he āfa itūlā.

² Oi kō kitea atu ai nā agelu e toka fitu e tutū i mua o te Atua ma na fōki ki a te ki lātou nā pu e fitu.

³ Kua hau tētahi agelu e kuku i tona lima he ipu aulo fakamū meamanogi, ma tū i tafa o te fata faitāulaga. Na tuku atu ki a te ia nā meamanogi e lahi, ke ia ofo atua ki te Atua fakatahi ma nā tatalo a tagata o te Atua, i te fata faitāulaga aulo i mua o te nofoāliki.

⁴ Oi fanake ai ki luga te ahu o nā meamanogi kua fakamū, fakatahi ma tatalo a tagata o te Atua mai nā lima o te agelu e tū i mua o te Atua.

⁵ Oi tago ai te agelu ki te ipu fakamū meamanogi oi fakatumu i nā malala ola mai te afi i te fata faitāulaga, ma togi ifo ki te lalolagi. Kua gāpāpā ia faititili ma tāgulu, kānapanapa ia uila ma lūlū he mafuie.

Ko nā Pu

⁶ Oi hāuniuni ai nā agelu e toka fitu ke ili a lātou pu.

⁷ Kua ili te pu a te agelu muamua, oi to ai ki luga o te laukelekele he ua aiha ma te afi e palu fakatahi ma te toto. Na mu ai te tahi vaetolu o te laukelekele, te tahi vaetolu o nā lākau, vēnā ma nā lau mutia uma lele.

⁸ Kua ili te pu a te lua o agelu, oi togi ai ki te tai he mea e vē he mauga mu lahi. Na liu toto ai te tahi vaetolu o te tai,

⁹ ma na mamate ai te tahi vaetolu o nā meaola i te moana, ma fakakino te tahi vaetolu o nā vaka.

¹⁰ Kua ili te pu a tona tolu o agelu, ma na pakū ifo ai he fetu lahi mai te lagi e mumū e vē he mōlī, ki luga o te tahi vaetolu o nā vaitafe ma te tahi vaetolu o nā vaipuna.

¹¹ Ko te igoa o te fetu ko te “Kokona”, ma na kona ai te tahi vaetolu o nā vai māgalo. E tokalahi nā tino na feoti i te feinuga ki te vai, ona ko te vai na fakakona.

¹² Kua ili te pu a te fa o agelu, ma na fetā ai ma he mea te tahi vaetolu o te la, te tahi vaetolu o te māhina, ma te tahi vaetolu o nā fetu, ma na pōulitia ai te tahi vaetolu o te mumū o ki lātou; ma kua hēai he mālamalama i te tahi vaetolu o te aho ma vēnā foki te tahi vaetolu o te pō

¹³ Oi kikila atu ai au ma na kō lagona he āeto e tagi leo lahi kae lele maualuga ake i te vānimonimo, e lea vē, “Kae hāloa la, kae hāloa la, kae hāloa la ia tagata ola uma i te lalolagi kāfai e ili nā pu a iētahi agelu e toka tolu.”