Fakaaliga 6 - Tokelauan New Testament

Ko nā Fakamaufakailoga

¹ Oi kō kitea atu ai te Punuamāmoe e tatala e ia te fakamaufakailoga muamua o nā fakamaufakailoga e fitu, ma na kō lagona tētahi o nā meaola e fa e lea vē i he leo lahi e vē ko te gugulu a he tāgulu, “Hau!”

² Kua kikila atu au oi kitea ai e au he holofanua paepae. Ko te tino e tiketike ai e tāofi i tona lima he kaufana āū. Kua tuku atu ki a te ia he pale aliki, oi fano ai ke fakatōkilalo nā fili o ia.

³ I te tatalaga e te Punuamāmoe te fakamaufakailoga tona lua, na lagona atu e au te lua o meaola e lea vē, “Hau!”

⁴ Oi hau ai ki fafo hētahi holofanua, e lanu kukula. Kua tuku atu ki te tino e tiketike ai, te pule ke ia kaumaia ai te taua ki te lalolagi, kae ke tāmate ai e tētahi tino tētahi tino. Na tuku atu ki a te ia he pelu lahi.

⁵ Oi tatala ai e te Punuamāmoe te fakamaufakailoga tona tolu; ma na lagona e au te tolu o meaola e lea vē, “Hau!” Kua kikila au, ma kō kitea atu he holofanua uliuli. Ko te tino e tiketike ai, e tāofi i tona lima he fua fakapāleni,

⁶ ma na lagona e au he mea e vē he leo, e hau i te mea e i ei ai nā meaola e fa, e lea vē, “Ko te tēnali e fokotahi e maua ai ni pauna falaoa e lua e fai i te haito, pe ni pauna falaoa e ono e fai i te kālite. Kae nahe fakakinoagia nā togāolive ma nā tōvine!”

⁷ Oi tatala ai e te Punuamāmoe te fakamaufakailoga tona fa; ma na lagona e au te fa o meaola e lea vē, “Hau!”

⁸ Kua kikila atu au, oi kō kitea ai he holofanua lanu meamata tai hegahega. Ko te tino e tiketike ai e fakaigoa ko te Oti, ma e mulimuli atu i ona tua ia Heoli Kua tuku atu ki a te ki lāua te pule ke tāmate ai te tahi vaefa o tagata o te lalolagi, e ala i nā taua, nā oge, nā fāmai, ma e nā manu fekakai i te lalolagi.

⁹ Oi tatala ai e te Punuamāmoe te fakamaufakailoga tona lima. Na kitea atu e au i lalo o te fata faitāulaga nā agaga o nā tino na tāmate ona na ki lātou tālakia te kupu a te Atua, ma na kavea ma molimau fakamāoni.

¹⁰ E taukalalaga leo lahi vē ki lātou, “Te Aliki Hilihilikehe e paia ma fakamāoni! Ko āfea nei te ka fakamahino ai e koe ia tagata i te lalolagi ma fakahala ki a te ki lātou, ke taui ai o mātou toto!”

¹¹ Oi tuku atu ai ki a te ki lātou tau tokatahi he kofu tatao paepae ma fakatonu ke mapu tahi mālie, ke pa ki te taimi e kātoatoa ai te fuainumela o nā hoa kaukauna ma nā uho Kelihiano e tatau ke tāmate, e vē foki lava ko ki lātou na tāmate.

¹² Oi kō kitea atu ai te Punuamāmoe e tatala e ia te fakamaufakailoga tona ono. Na lūlū te mafuie lahi ma pōulitia te la e vē he kie vavae uliuli, ma ko te māhina kua lanu kukula kātoa e vē ko te toto.

¹³ Kua malili ifo nā fetu i te lagi ki te lalolagi, e vē ko te malili o nā fuāmati e hēki pupula kāfai e lūlū te mati e he matagi mālohi.

¹⁴ Kua mou kehe atu te lagi e vē he tuhitākai e fefetu, ma ko nā mauga uma ma nā motu, kua fakagaoi kehe mai o lātou tūlaga.

¹⁵ Oi taumafai ai nā tupu o te lalolagi, nā tino maualuluga, nā takitaki kau, nā tino maukoloa, nā tino tāua ma iētahi tino uma lele pe ni pologa pe hēai, ke mumuni i loto o nā ana ma i lalo o nā papa i luga o nā mauga.

¹⁶ Kua taukalalaga atu ki lātou ki nā mauga ma nā papa, “Pakukū ifo ki o mātou luga ma mumuni ki mātou mai nā mata o tē e nofo i te nofoāliki, ma ke mumuni ai foki ki mātou mai te tōkahā o te Punuamāmoe!

¹⁷ Auā ko te Aho e fakahalagia ai ia tagata uma e te Atua kua pa mai, ma ko ai he tino e mafai ke hao i te fakahalaga tēnei?”