Fakaaliga 22 - Tokelauan New Testament

¹ Na fakaali mai foki e te agelu ki a te au te vaitafe o te vai o te ola, e pāgilagila e vē ko he tioata, ma e tafe mai i te nofoāliki o te Atua ma o te Punuamāmoe,

² ki loto o te kogātotonu o te auala o te kakai. I nā itū takitahi o te vaitafe e i ei ai te lākau o te ola, e hefululua ona itūkāigā fua, ma e fokotahi te itūkāiga e fua i te māhina; ma ko ona lau e fakamālōlō ai ia tagata o te lalolagi mai o lātou tauale.

³ Ka hē toe i ei lele he mea na fetū e te Atua e maua i loto o te kakai. Kae ka i loto ai te nofoāliki o te Atua ma te Punuamāmoe, ma ka ifo atu ki a te ia ana kaukauna.

⁴ Ka kitea e ki lātou ona fōliga, ma ka tūhia tona igoa i o lātou muāulu.

⁵ Ka hē toe i ei he pō, ma ka hē toe manakomia e ki lātou ni mōlī pe ko te huhulu o te la, auā ko te Aliki te Atua ka fai ma o lātou mōlī, ma ka ia te ki lātou te pule fakatupu ke pa ki te fakavavau.

Ko te Haele mai o Iehu

⁶ Oi leamai ai te agelu ki a te au, “Ko nā kupu iēnei e moni ma e fakamāoni. Ma ko te Aliki te Atua, tē e ia tukuatua tona Agaga ki te kau pelofeta, kua uga e ia ana agelu ke fakailoa atu ki ana kaukauna, nā mea kua tāli pa ki te taimi e tutupu ai.”

⁷ Kua vāgana ia Iehu, “Kikila, ko au kua tāli fanatu! Amutia nā tino e uhitaki ki nā kupu o te valoaga i loto o te tuhi tēnei e uiga ki nā mea ka tutupu nei, ma i he taimi i mua!”

⁸ Ko au ko Ioane, na lagona ma kitea e au nā mea uma iēnei. Kua uma te fakalogo ma te kikila o oku ki ei, oi fakapakū ai au ki lalo o nā vae o te agelu nae ia fakaali maia nā mea iēnei, ma hāuniuni ka ifo atu ki ei.

⁹ Kae kua lea vē mai ia ki te au, “Nahe kē faia te mea tēnā! Ko au ko he hoa kaukauna e vē foki lava ko koe ma nā uho o koe te kau pelofeta, ma ki lātou uma e uhitaki ki nā kupu i loto o te tuhi. Ifo ki te Atua!”

¹⁰ Ma kua toe lea mai ai vē, “Nahe mumunia nā kupu vavalo o te tuhi tēnei e uiga ki nā mea ka tutupu nei ma i he taimi i mua, auā kua tāli pa ki te taimi e fakataunuku ai nā mea uma iēnei.

¹¹ Ko te tino e kino e tatau ke fai pea e ia nā mea e kino, ma ko te tino e ia te ia ni manatu kelekelea e tatau ke tūmau pea ia i nā manatu kelekelea; ko te tino e lelei e tatau ke fai pea lava ona uiga lelei, ma ko te tino e paia e tatau ke tūmau pea i tona paia.”

¹² Kua vāgana ia Iehu, “Kikila, ko au kua tāli fanatu, ma ka kō kavatua nā taui mo tagata tau tokatahi, e tuha ai ma a lātou mea nae fai.

¹³ Ko au ko te Alefa ma te Ōmeka, te muamua ma te mulimuli, te kāmataga ma te fakaikuga.”

¹⁴ Amutia nā tino e ufi mamā o lātou kofutatao kae ke maua e ki lātou te aiātatau ke kakai ai ki te fua o te lākau o te ola, ma ulu atu ki loto o te kakai kui i nā faitotoka.

¹⁵ Kae i fafo o te kakai, ka i ei ai nā tino e vē ni kulī, nā taulāitu, nā tino e tuinanau ki te tino, nā tino tāmate tino, nā tino ifo ki tupua, nā tino e fiafia oi tala pepelo ma fai nā mea hehē.

¹⁶ “Ko au ko Iehu, kua uga atu e au taku agelu ke fakamāonia nā mea iēnei ki nā Ekalehia. Ko au ko he lāpuna e o Tavita; ko au ko te fetu e huhulu pupula i te taeao.”

¹⁷ Kua lea vē te Agaga ma te Teine Fakaipoipo, “Hau!” Ko ai lava e ia lagona te mea tēnei, e tatau foki ke lea, “Hau!” Ko ai lava e fia inu, hau oi talia te vai o te ola, e hēai he totogi.

Fakaikuga

¹⁸ Ko au ko Ioane, ko au e lapataki atu ki ho he tino e ia lagona nā kupu vavalo o te tuhi tēnei e uiga ki nā mea ka tutupu nei, ma i he taimi i mua. Ko ai lava e ia fakaopoopoa he mea kinā kupu iēnei, ka fakaopoopo e te Atua nā mala e tākua i te tuhi tēnei, ki tona fakahalaga.

¹⁹ Ma ko ai lava e ia kave kehea he mea mai nā kupu vavalo o te tuhi tēnei e uiga ki nā mea ka tutupu i te taimi nei ma i he taimi i mua, ka kave kehe e te Atua tona vāega mai nā fua o te lākau o te ola, ma i te Kakai Paia, e vē oi tūhia i te tuhi tēnei.

²⁰ Ko tē kua fai ma molimau ki nā mea uma iēnei e lea vē, “E moni lava! Ko au kua tāli fanatu!” Ke vēnā lava ona fai. Te Aliki ko Iehu, keina hau loa ko!

²¹ Ke ia te ki tātou uma te alofa tūnoa o te Aliki ko Iehu. Amene.