Fakaaliga 20 - Tokelauan New Testament

Kua Haihai ia Hātani mo he Afe Tauhaga

¹ Oi kō kitea atu ai he agelu e fanaifo mai te lagi, ma e tāofi i tona lima te kī ki te lua e hēai he gataga o tona loloto, ma he filifili ukamea mamafa.

² Kua puke e ia te tālako, te gata mai te kāloā — ko tētahi ona igoa ko te Tiāpolo pe ko Hātani — ma haihai i te filifili mo he afe tauhaga.

³ Kua togi e te agelu ia Hātani ki loto o te lua e hēai he gataga o tona loloto, ma loka ma fakamau te faitotoka ki te lua. I kinā e tatau ke nofo ai ia Hātani ke kātoa he afe tauhaga, ma i te taimi tēnei e hē ia toe mafaia oi fakahehē ia tagata i te lalolagi kātoa. Kāfai e kātoa te afe tauhaga, e tatau ke fakahaoloto mo hina taimi.

⁴ Oi kō kitea atu ai ni nofoāliki, ma ko nā tino e nonofo i luga ko ki lātou iēnā kua tuku atu ki ei te pule ke fakamahino ai e ki lātou iētahi tino. Ko ki lātou iēnei ko nā agaga ia o nā tino na tatipi o lātou ua, ona na fai ki lātou ma molimau e uiga ki te fekau a Iehu ma te kupu a te Atua. E hēki ifo ki lātou ki te manu fekai pe ki tona fakatuha, ma e hēki maua e ki lātou te fakailoga a te manu fekai ki o lātou muāulu pe ki o lātou lima. Kua toe ola mai ki lātou ma kua pule fakatahi ki lātou ma Keliho, mo he afe tauhaga.

⁵ (Ko iētahi tino oti e hēki mafai ke toe ola mai heiloga kua kātoa te afe tauhaga.) Ko te taimi muamua tēnei kua fakatutū ai ni tino mai te oti.

⁶ Ko nā tino iēnei kua fakamanuiagia ma e paia. E hēai he pule a te oti tona lua ki a te ki lātou. Ka fai ki lātou ma ohitāulaga a te Atua ma a Keliho, ma ka pule fakatupu ki lātou fakatahi ma ia mo he afe tauhaga.

Ko te Fakatōkilaloga o Hātani

⁷ Kāfai e uma te afe tauhaga, oi ka tatala loa lava ia Hātani mai tona falepuipui,

⁸ ma ka fano ai oi fakahehē ia tagata i tulimanu e fa o te lalolagi, ko Koko ma Makoko tēnā. Ka fakapotopoto uma ki lātou e Hātani mo te taua, ko te tokalahi o ki lātou e vē ko te lahi o nā fuāoneone i te matāfaga.

⁹ Kua halalau atu ki lātou ki itū uma o te lalolagi ma hiko fakatāmilo e ki lātou te mea e api ai ia tagata o te Atua ma te kakai e alofa ki ei te Atua. Kae kua fanaifo he afi mai te lagi ma fakaumatia ai ki lātou.

¹⁰ Oi togi ai te Tiāpolo, tē nae ia fakahehēa ki lātou, ki loto o te vaitūloto o te afi ma te teiō, te mea kua uma te togi ki loto te manu fekai ma nā pelofeta pepelo; ma ka fakatīgāina ai pea ki lātou i kinā i te pō ma te ao, ke pa lava ki te fakavavau fakavavau lava.

Ko te Fakamahinoga Mulimuli

¹¹ Oi kō kitea atu ai he nofoāliki lahi lele e lanu paepae ma he tino e nofo ai. Kua mou kehe atu te lagi ma te lalolagi i te mea e i ei ia, ma e hēki toe kitea lele.

¹² Oi kō kitea atu ai nā tino kua oti, ki lātou e takutakua vēnā ma ki lātou e fakatauva, e tutū i mua o te nofoāliki. Kua tatala nā tuhi, ma na tatala ai foki ma hētahi tuhi, te tuhi o te ola. Kua fakamahino nā tino kua oti e tuha ai ma a lātou mea nae fai, e vē oi fakamaumau i loto o nā tuhi.

¹³ Oi tatala ai e te tai nā tino oti nae haihaitia i loto o ia. Kua tatala foki e te Oti ma Heoli nā tino oti nae ki lā haihaitiagia. Ma na fakamahino uma ki lātou e tuha ai ma nā mea a ki lātou nae fai.

¹⁴ Oi togi ai te Oti ma Heoli ki loto o te vaitūloto o te afi mumū. (Ko te vaitūloto tēnei o te afi, ko te oti tona lua ia.)

¹⁵ Ko nā tino e hēki tūhia o lātou igoa i loto o te tuhi o te ola, kua togi ki loto o te vaitūloto o te afi mumū.