Fakaaliga 19 - Tokelauan New Testament

¹ Kua uma atu te mea tēnei, oi lagona ai e au he mea e vē he leo lahi lele o he kaifenua tokalahi i te lagi, e tau kālalaga vē, “Ke vīkia te Atua! Ko te Atua ko te Fakaola! E o ia te mana ma te mālohi!

² E hako ma tonu tana fakamahinoga! Kua mōlia e ia te fafine talitāne takutakua na ia fakakinoa te lalolagi i ona tuinanauga mātagā ki te tino. Kua taui e te Atua ki ei, mo te toto o ana kaukauna.”

³ Na toe kālalaga vē ki lātou, “Ke vīkia te Atua! Ko te ahu mai te afi kua huhunu ai te kakai tāua, e fanake pea lava ki luga ke pa ki te fakavavau!”

⁴ Oi fakapakukū ai ki lalo nā toeaina e toka luahefulufa ma nā meaola e fa, kua ifo ki te Atua e nofo i tona nofoāliki. Kua lea vē atu, “Amene! Ke vīkia te Atua!”

Ko te Kaiga o te Fakaipoipoga a te Punuamāmoe

⁵ Oi hau ai mai te nofoāliki he leo e lea vē, “Ke viviki ake ki to tātou Atua, koutou uma ana kaukauna, nā tino e mātataku ia te ia, ki lātou e maualuluga nā tūlaga vēnā ki lātou e fakatauva!”

⁶ Oi kō lagona ai he leo o he kaifenua, e vē ko te gugulu o he tai galu lahi, e vē ko te gāpāpā o nā tāgulu. Na lagona atu e au ki lātou e lea vē, “Ke vīkia te Atua! Auā ko te Aliki to tātou Atua Hilihilikehe te Mālohi, ko ia ko te Tupu!

⁷ Tātou fiafia la ma olioli; tātou viviki atu ki tona hilihilikehe. Auā kua pa ki te taimi o te fakaipoipoga a te Punuamāmoe, ma kua uma te hāuniuni atu o te teine fakaipoipo mo ia.

⁸ Kua fōki ki te teine fakaipoipo nā kofu vavae gigila ma mamā ke kofu ai.” (Ko te kofu vavae ko nā gāluega lelei a tagata o te Atua.)

⁹ Oi lea mai ai te agelu ki a te au, “Tuhi te mea tēnei ki lalo: Amutia ki lātou kua uma te valakaulia ki te kaiga o te fakaipoipoga a te Punuamāmoe.” Kua toe lea mai vē te agelu, “Ko nā kupu moni iēnei a te Atua.”

¹⁰ Na fakapakū ifo au ki lalo ki tafa o ona vae ke ifo ki ei, kae kua lea vē mai ki a te au, “Nahe kē faia te mea tēnā! Ko au ko he hoa kaukauna e vē foki ko koe ma iētahi uho e pipiki pea lava ki te molimau a Iehu na fai. Ifo atu ki te Atua!” Auā ko te molimau a Iehu te na mafai ai e tagata oi folafola atu te fekau a te Atua.

Ko te Tino e Tiketike i te Holofanua Paepae

¹¹ Oi kō kitea atu ai te lagi kua matala, ma e i ei he holofanua paepae i kinā. Ko te igoa o te tino e tiketike ai ko te Fakamāoni ma te Hako; e ia faia te mea e tonu kāfai e fai tana fakamahinoga, ma kāfai e tau ana taua.

¹² Ko ona mata e vē ko te mumū o te afi, ma e lahi nā tamā palealiki i tona ulu. E tūhia i luga o tona tino tona igoa, kae e hēai he tino e mālamalama ai vaganā ai lava ia.

¹³ Ko te kofu tatao o ia e fai, e galo i te toto. Ko tona igoa “Ko te Kupu a te Atua.”

¹⁴ Kua mulimuli ki a te ia nā vaegākau i te lagi, e tiketike i nā holofanua papae, ma kokofu i nā kofu e gaohia i te kie vavae paepae mamā.

¹⁵ E hau i loto o tona gutu he pelu kakaha, ka fakatōkilalo ai e ia nā mālō. Ka pūlea e ia ki lātou ma te fakahāuā, ma ka holi e ia i ona vae nā fuāvine i loto o te tanoa tatau vine o te tōkahā o te Atua Hilihilikehe te Mālohi.

¹⁶ E tūhia i luga o te vāega o tona kofu tatao i luga o tona ālaga te igoa iēnei, “Ko te Tupu o tupu ma te Aliki o aliki.”

¹⁷ Oi kō kitea atu ai he agelu e tū i luga o te la. E taukalaga i he leo lahi ki nā manulele uma e felelei maualuluga i te vānimonimo vēia: “Ōmamai ma fakapotopoto mai mo te kaiga lahi a te Atua!

¹⁸ Ōmamai oi kai nā kanofi o nā tupu, o nā takitaki kau ma o nā fitafita, nā kanofi o nā holofanua ma nā tino e tiketike ai, nā kanofi o nā tino uma lele, nā pologa vēnā ma nā tino haoloto, nā tino takutakua ma nā tino fakatauva!”

¹⁹ Oi kō kitea atu ai te manu fekai ma nā tupu o te lalolagi ma a lātou vaegākau kua fakapotopoto ke tau ma te tino e tiketike i te holofanua paepae ma ana vaegākau

²⁰ Kua puke fakapagotā te manu fekai fakatahi ma te kau pelofeta pepelo nae ki lātou faia ni vāvega mo te manu fekai. (Ko nā vāvega iēnei te na ia fakahehēa ai ki lātou kua i ei te fakailoga a te manu fekai, ma ki lātou nae ifo ki nā fakatuha o te manu fekai.) Ko te manu fekai ma te kau pelofeta pepelo kua togi ola ki loto o te vaitūloto o te afi mumū ma te teiō.

²¹ Ko nā vaegākau a ki lātou kua fakaumatia i te pelu e hau ki fafo o te gutu o te tino e tiketike i te holofanua; ma na kai e nā manulele uma o lātou kanofi.