Fakaaliga 18 - Tokelauan New Testament

Ko te Fakatōkilaloga o Papelona

¹ Kua uma te mea tēnei, oi kō kitea atu ai he agelu e fanaifo ki lalo mai te lagi. Nae ia te ia he pule lahi, ma ko tona huhulu na māinafia ai te lalolagi kātoa.

² Kua kalaga leo lahi vēia, “Ko te Kakai Takutakua ko Papelona kua fakatōkilalogia! I te taimi nei, kua fai ma nofoaga o tēmoni ma agaga kino, ma itūkāigā manulele palapalā ma te inohia.

³ Auā ko tagata o mālō uma na feinu ki tana uaina — te uaina mālohi o ona tuinanauga ki te tino. Ko tupu o te lalolagi na ki lātou fakatinoa fakatahi ma ia nā tuinanauga ki te tino, ma ko tagata faipihinihi o te lalolagi na fakaatili te mau koloa ona e hēai he mea e gata mai ai ona tuinanauga.”

⁴ Oi kō lagona atu ai hētahi leo mai te lagi e lea vē, “Ōmamai ki fafo, oku tagata! Ōmamai ki fafo o Papelona! E hē tatau ke kau fakatahi koutou ma ia i ana agahala; e hē tatau koutou ke lavea tauanoa i te mala kua fakahalagia ai ia.

⁵ Auā ko ana agahala e fakaputuputu ma kua pa ki te lagi te maualuga, ma e manatua e te Atua nā uiga kino o ia.

⁶ Ke toe fai lava ki a te ia nā mea nae ia faia; ma ke taui fakalua ki ei mo nā mea uma a ia kua fai. Fakatumu tana ipu i te uaina e fakaluaina tona mālohi i lo te uaina kua ia hāunia mo koutou.

⁷ Fai ni mea e lahi ke tīgāina ma fakanoanoa ai ia, ke vē foki lava ko te lahi o tona fāfia ki tona tamaokāiga. Auā e lea vē ifo lava ki a te ia i tona loto, ‘Ko au he tupu fafine e nofo i kinei i toku nofoāliki! Ko au e hē ko he fafine kua oti tana tāne! Ka hē maua lele au i te fakanoanoa!’

⁸ Ona ko te mea tēnei, ka lavea ai ia i he mala mo he aho e fokotahi — ka lavea i he fāmai, ka fakanoanoa ona ko te mate o he tino e pele ia te ia, ma maua i he oge. Ma ka huhunugia ia i te afi, auā ko te Aliki te Atua, tē e ia fakamahinoagia te fafine, e hilihili kehe tona mālohi.”

⁹ Ko nā tupu o te lalolagi na ki lātou fakatinoagia fakatahi ma ia nā tuinanauga ki te tino, ma fiafia fakatahi ai ma ia, ka faitatagi ma lauē kāfai e kitea atu e ki lātou te ahu o te afi e huhunu ai ia.

¹⁰ E tutū mamao lele mai, auā e mātataku nā ki lātou e puapuagā fakatahi ma ia. E lea vē ki lātou, “Oi hāloa! Oi hāloa! Te kakai takutakua ma te mālohi tēnei ko Papelona! I he itūlā lava e fokotahi, kae kua pa mai ai tō fakahalaga!”

¹¹ Ko nā tino faipihinihi o te lalolagi kua faitatagi foki ma lauē mo ia, auā e hēai he tino e toe fia fakatau ki a lātou koloa;

¹² e hēai he tino e fia fakatau ki a lātou aulo, hiliva, fatu mānanaia ma taugatā, ma nā pēnina; ko a lātou koloa kie vavae, kie taugatā lanu violē, kie hilika, ma nā kie kukula mālohi; ko itūkāigā lākau manogi kehekehe, ko nā mea talatalai kehekehe e talai i nā nifo elefane, i nā lākau taugatā, i nā apamemea, i nā ukamea ma nā fatu mānanaia lāmolemole;

¹³ ko nā hinamona, nā mea fakamanogi meakai, nā meamanogi, nā mulo, ma nā lipano; ko nā uaina ma nā lolo, nā falaoa mata ma nā haito ko hēki tukia, nā povi ma nā māmoe, nā holofanua ma nā tāvale holofanua, nā pologa, ma nā tino kua puke fakatagata-o-taua.

¹⁴ Kua lea vē nā tino fai pihinihi ki te fafine, “Ko nā mea lelei uma lele nae fofou koe ke kē maua, kua mou kehe atu, ma ko tō tamaokāiga ma nā mea nae teuteu fakamānaia ai koe kua hēai, ma ka hē toe maua lele e koe!”

¹⁵ Ko nā tino fai pihinihi na maukoloa ona nae ki lātou fakataua nā mea iēnei i te kakai, ka tutū mamao lele mai ona e mātataku nā ki lātou e maua foki i ona puapuagā. E faitatagi lauē

¹⁶ ma lea vē, “Oi hāloa! Oi hāloa! Te kakai takutakua! Te kakai takutakua nae māhani kofu i nā kofu e fai i te kie vavae lanu violē ma kukula mālohi, ma teuteu tona tino i nā mea e fai i te aulo, nā fatu mānanaia ma te taugatā, ma nā pēnina!

¹⁷ Ma i he itūlā e fokotahi, kae mou kehe uma ai tona tamaokāiga!” Ko nā kapiteni o nā vaka ma nā pāhehe, nā heila ma ki lātou uma e fakaaogā e ki lātou te tai i te faiga o a lātou pihinihi, kua tutū mamao lele mai,

¹⁸ ma faitatagi kae kikila ki te ahu mai te afi kua huhunu ai te kakai takutakua ma lea vē, “E hēki i ei lele hētahi kakai e vē ko te kakai takutakua tēnei.”

¹⁹ Kua togi e ki lātou nā pefu ki o lātou ulu, ma faitatagi lauē ma lea vē, “Oi hāloa! Oi hāloa! Te kakai takutakua! Te kakai na tamaokāiga ai ki lātou e fai o lātou vaka faimalaga i te moana, ma kua maukoloa ona ko te tamaokāiga o te kakai takutakua! Kae i he itūlā lava e fokotahi, kae mou kehe uma ai tona tamaokāiga!”

²⁰ E tatau te lagi ke fiafia, auā kua fakaumatia e te Atua ia Papelona! E tatau koutou tagata o te Atua, te kau apohitolo ma te kau pelofeta ke fiafia! Auā kua fakahalagia e te Atua ia Papelona ona ko nā mea na ia faia ki a te koutou!

²¹ Oi hiki ai e he agelu mālohi he mātuā fatu e vē ko te lahi o he fatu tuki haito, ma togi ki te tai ma lea vē, “E vēnei lava te mea e fai ki te kakai takutakua ko Papelona, kāfai ka fakaumatia ma ka hē toe kitea lele.

²² Ka hē toe lagona lele i loto o koe nā muhika mai nā kītala ma leo o tagata, mai nā tino ili fagufagu ma nā tino ili pu. Ka hē toe i ei lele he tino faigāluega mai nā itū kaiga gāluega kehekehe ka toe maua i loto o koe; ma ka hē toe lagona lele foki te pākēkē o te fatu lahi e tuki ai te haito!

²³ Ka hē toe kitea lele i loto o koe te mumū o he mōlī; ka hē toe lagona nā leo o teine ma tama fakaipoipo i loto o koe. Ko nā tino fai pihinihi o koe te nae pito hili oi takutakua i te lalolagi, ma ko au mea fakataulaitu pepelo na fakahehē ai e koe ia tagata uma o te lalolagi.”

²⁴ Ko Papelona na fakahalagia ona ko te toto o te kau pelofeta ma tagata o te Atua na maua i loto o te kakai; io, te toto o ki lātou uma kua fahiotia i te lalolagi.