Fakaaliga 17 - Tokelauan New Testament

Ko te Fafine Talitāne Lauiloa

¹ Oi hau ai tētahi o nā agelu e toka fitu nae ia te ki lātou nā tānoa e fitu ma lea vē mai ki a te au, “Hau, ka fakahino atu e au ki a te koe te fakahalaga ka pa ki ei te fafine talitāne takutakua, te kakai tēia e tū tafapili ki nā vaitafe e lahi.

² Ko nā tupu uma o te lalolagi na momoe ma ia, ma ko nā tino e nonofo i te lalolagi kua konanā auā kua feinu ki te uaina o ona tuinanauga ki te tino.”

³ Na ulufia au e te Agaga, oi kave ai au e te agelu ki te vao. I kinā na kō kitea ai he fafine e nofo i luga o he manu fekai lanu kukula mālohi, e tūhia i tona tino kātoa na igoa kino e fāifāi ki te Atua; e fitu ia ulu o te manu fekai ma hefulu ona nifo hua.

⁴ Ko te fafine e kofu i he kofu violē kukula mālohi ma e teuteu tona tino i nā mea aulo, nā fatu mānanaia taugatā, ma nā pēnina. E i tona lima he ipu aulo e tumu i nā mea kino ma te hē mamā na maua e ia e ala i ona tuinanauga ki te tino.

⁵ I tona muāulu e tuhi ai he igoa e hē iloa e iētahi tino te uiga, e vēnei: “Te kakai takutakua ko Papelona, te mātua o fafine talitāne uma, ma tē e tutupu mai ai ia āmio mātagā uma i te lalolagi.”

⁶ Ma na kō kitea ko te fafine kua konā i te toto o tagata o te Atua, ma te toto o nā tino na tāmate ona nae mulimuli ma te fakamāoni ki a Iehu. I te kō kiteaga o te fafine, ko au na ofo lahi lele.

⁷ Kua fehili mai te agelu ki a te au, “He ā te ofo ai koe? Ka kō fakamālamalama atua la ki a te koe te uiga lilo o te fafine ma te manu fekai tēia e tiketike ai, te manu fekai e fitu ona ulu ma hefulu ona nifo hua.

⁸ Ko te manu fekai na kitea e koe, nae ola muamua kae nei kua hē toe ola; ma kua hāuni ka fanake ki luga mai te lua e hēai he gataga o tona loloto, ma fano ki te mea ka fakaumatia ai. Ko nā tino e nonofo i te lalolagi ko hēki tūhiagia o lātou igoa ki te tuhi o tagata ola ka ko hēki gaohia ai te lalolagi, ka ofo lahi lele kāfai e kikila ki te manu fekai. Nae ola muamua kae nei kua hē toe ola, kae e toe hula mai.

⁹ “Ko te mea tēnei e manakomia ai te poto ma te mālamalama. Ko nā ulu e fitu, ko nā mauga iēnā e fitu e nofo ki luga te fafine. Ko nā tupu foki iēnei e fitu:

¹⁰ e toka lima ki lātou kua feoti, e fokotahi koi fakaauau lava tana pule, ma ko tētahi ko hēki hau; kāfai e hau, e tatau ke pule mo hina taimi pukupuku.

¹¹ Ma ko te manu fekai nae ola muamua kae kua hē toe ola nei, ko tona valu ia o tupu ma ko tētahi ia o te toka fitu, ma e fano ki te mea e fakaumatia ai.

¹² “Ko nā nifo hua e hefulu na kitea e koe, ko nā tupu e toka hefulu iēnā ko hēki kamatagia te lātou pule, kae ka fōki ki ei te pule ke pule ai mo he itūlā fakatahi ma te manu fekai.

¹³ Ko nā tupu uma iēnei e toka hefulu, e tahi ki lātou i te māfaufau ma ka fōki e ki lātou to lātou mālohi ma te pule ki te manu fekai.

¹⁴ Ka tau ki lātou ma te Punuamāmoe; kae ka fakatōkilalogia ki lātou e te Punuamāmoe, auā ko ia ko te Aliki o aliki uma ma te Tupu o tupu uma, ma ko nā tino e kau fakatahi ma ia, ni tino na kalagagia ma filifilia e Atua, ma e tūmau to lātou fakamāoni ki a te ia.”

¹⁵ Na lea vēnei mai foki te agelu ki a te au, “Ko nā vai na kitea e koe e nofo i luga te fafine talitāne, ko nā tino iēnā o mālō, nuku, lanu ma gagana.

¹⁶ Ko nā nifo hua e hefulu na kitea e koe, ma te manu fekai, ka feita ki te fafine talitāne; ka kave e ki lātou nā mea uma lele a ia ma tīaki vē e hēai ni ona kie; ka kai e ki lātou tona tino ma fakaumatia i te afi.

¹⁷ Auā kua fakatupu e te Atua i o lātou loto te manatu ke ki lātou faia ai te mea e fofou ia ki ei, e ala i te gālulue fakatahi ma te tuku atu o te lātou pule ki te manu fekai, ke pa ki te taimi e taunuku ai te kupu a te Atua.

¹⁸ “Ko te fafine na kitea e koe, ko te kakai takutakua tēnā e pule ki tupu uma o te lalolagi.”