Fakaaliga 12 - Tokelauan New Testament

Ko te Fafine ma te Tālako

¹ Oi kitea atu ai he fakailoga uiga kehe i te lagi. Ko he fafine e kofu i te la ka ko te māhina e i lalo o ona vae, ma he palealiki e fai i ni fetu e hefululua e i tona ulu.

² Kua tāli fānau, ma kua tagi ona ko nā ogohia o te fakatīgā ma te loto popole ki te taimi e fānau ai.

³ Kua toe kitea atu hētahi fakailoga uiga kehe i te lagi. Ko he mātuā tālako lanu kukula e fitu ona ulu ma hefulu ona nifo hua, ma e tofu te ulu ma te tamā palealiki.

⁴ Kua toho ifo e ia mai te lagi i tona hikuhiku, te tahi vaetolu o nā fetu, ma togi ki lalo ki te lalolagi. Ma kua tū i mua o te fafine, kae ke ia kaia te pepe i te taimi lava e fānau mai ai.

⁵ Oi fānau mai ai e te fafine tona ataliki, tē ka ia pūlea kātoatoa ia mālō uma ma te fakahāuā. Kae kua hamu kehe te tamaiti ma kave ki te Atua i tona nofoāliki.

⁶ Kua hola te fafine ki te vao, ki he mea na hāunia e te Atua mo ia, ke tauhi ai i kinā mo nā aho e 1,260.

⁷ Oi pa ai te taua i te lagi. Kua tau ia Mikaele ma ana agelu ma te tālako ma ana agelu;

⁸ kae na fakatōkilalo te tālako, ma e hēki toe fakatagagia ke nofo i te lagi ma ana agelu.

⁹ Oi togi ai te tālako ki fafo — te gata mai te kāloā e fakaigoa ko te Tiāpolo, pe ko Hātani, tē e fakahehēa ia tagata i te lalolagi kātoa. Na togi ifo ki lalo ki te lalolagi, fakatahi ma ana agelu uma.

¹⁰ Oi kō lagona ai he leo lahi i te lagi e lea vē, “Kua fakaalia te fakaolataga a te Atua i e taimi nei. Kua fakaalia e te Atua tona mālohi ko ia ko te Tupu i te taimi nei. Kua fakaalia te pule a tona Mehia i te taimi nei! Auā ko tē nae tū i mua o te Atua ma mōlia o mātou uho Kelihiano i te ao ma te pō, kua togi ki lalo mai te lagi.

¹¹ Na fakatōkilalo e ki lātou te Tiāpolo e ala i te toto o te Punuamāmoe ma nā kupu o ta lātou molimau; ma nae hē mānumanu ki o lātou ola, e tuha lava pe feoti ai ki lātou.

¹² Ko te lagi la ma nā tino uma e nonofo ai e tatau ke fiafia! Kae hāloa la te lalolagi ma te tai! Auā ko te Tiāpolo kua fanaifo ki lalo ki a te koutou ma e tumu i te tōkahā lahi, auā e ia iloa e pukupuku lele tona taimi koi totoe.”

¹³ I te iloaga e te tālako ko ia kua togi ki lalo ki te lalolagi, oi kāmata ai oi tulituli e ia te fafine na fānau mai ai te tama.

¹⁴ Kae kua fōki ki te fafine nā kapahau e lua o he mātuā āeto, kae ke ia mafaia oi lele ki te mea e nofo ai i te toafa, te mea ka tauhia ai ia mo he tolu ma te āfa tauhaga, ma hē mafai ai e te tālako ke fai hana mea ki ei.

¹⁵ Oi fakahau ai ki fafo mai te gutu o te tālako he vai e vē he vaitafe ke tafe ki te fafine ma ke tāfea kehe ai.

¹⁶ Kae kua fehoahoani te kelekele ki te fafine; kua fakamatala tona gutu ma folo te vai na hau i te gutu o te tālako.

¹⁷ Kua fekai lahi lele te tālako ki te fafine, ma na fano ai kua fakahaga tau ki nā lāpuna uma o te fafine, ki lātou uma kua uhitaki ki nā fakatonuga a te Atua ma tūmau i te meamoni na fakailoa mai e Iehu.

¹⁸ Ma ko te tālako kua tū i te matāfaga.