Fakaaliga 10 - Tokelauan New Testament

Ko te Agelu ma te Tamā Tuhitākai

¹ Oi kō kitea atu ai hētahi agelu mālohi e fanaifo ki lalo mai te lagi. E tāpulupulu i he ao ma he nuanua e fakatāmilo i tona ulu; ko ona fōliga e vē ko te la, ma ona vae e vē ni poutū e mumū i he afi.

² E i ei te tamā tuhitākai kua tatala e i tona lima. Kua tuku atu tona vae taumatau ki te tai ma tona vae agavale ki te kelekele,

³ ma kalaga i he leo lahi e vē ko te leo o he leona kāfai e tagi. Ma i te kalagaga, na gāpāpā ai nā tāgulu e fitu.

⁴ Kua hāuni au ka tuhi ki lalo nā mea na kō lagona i na kua uma te gāpāpā o nā tāgulu e fitu, kae kō lagona he leo e fanaifo mai te lagi e vē ifo, “Nahe fakailoagia nā mea na lea atu ai nā tāgulu e fitu; nahe tuhituhia ki lalo.”

⁵ Oi tuhi ake ai te lima taumatau o te agelu na kō kitea e tū ona vae ki te tai ma te kelekele, ki te lagi

⁶ ma fai tana tautōga i te igoa o te Atua, tē e ola pea lava ke pa ki te hēgata, ma na ia gaohia te lagi, te lalolagi, ma te tai, ma nā mea uma lele i loto. Kua lea vē te agelu, “Ko te Atua ka hē toe fakatali lele!

⁷ Kāfai e pa ki te taimi e ili ai e te agelu tona fitu tana pu, oi ka fakatino ai loa e te Atua tana fuafuaga lilo, e vē ko te fakailoaga e ia ki ana kaukauna, te kau pelofeta.”

⁸ Oi toe tautala mai ai ki a te au te leo na kō lagona e fanaifo mai te lagi, na lea vē mai, “Fano oi kaumai te tuhitākai kua uma te tatala, tēia e i te lima o te agelu e tū i luga o te tai ma te kelekele.”

⁹ Oi fano ai au ki te agelu ma lea ki ei ke fōki mai ki a te au te tamā tuhitākai, ma na tali vē mai, “Kave te tuhitākai oi kai; ka kino mo tō manava, kae ka huamalie ki tō gutu e vē ko te huamalie o te meli.”

¹⁰ Na kave kehe e au te tamā tuhitākai mai tona lima ma na kai e au. Na huamalie i toku gutu e vē ko te huamalie o te meli, kae i te fologa e au ko toku manava na kino.

¹¹ Oi lea vē mai ai ki a te au, “E tatau ke toe tālaki e koe te fekau a te Atua e uiga ki tagata, mālō, lanu, gagana ma tupu e tokalahi.”