Epelu 11 - Tokelauan New Testament

Fakatuatua ki te Atua

¹ Ko te fakatuatua ki te Atua e mautū ai to tātou fakamoemoe, ma mautinoa ai nā mea e hē ki tātou kitea.

² Ko te fakatuatua o nā tino i nā aho anamua na talia ai ki lātou e te Atua.

³ Ko te fakatuatua kua mālamalama ai ki tātou ko te lagi ma te lalolagi na gaohia i te kupu a te Atua, ma ona ko tēnei, ko nā mea e kitea na gaohia mai i nā mea e hē kitea.

⁴ Ko te fakatuatua o Apelu na ofo ai e ia ki te Atua he tāulaga e hili atu te lelei i lo te tāulaga a Kaino. Ko tona fakatuatua na talia ai ia e te Atua ko he tino āmiotonu, auā ko te Atua lava te na taliagia tana meaalofa. Ona ko tona fakatuatua, koi tautala ai pea lava ia Apelu, e ui lava kua mate.

⁵ Ko te fakatuatua o Enoka te na hēki mafai ai ke mate. Kae na kavake e te Atua ki te lagi, ma ko te mea ia e hēki maua ai tona tino. E lea mai te tuhituhiga paia, ka ko hēki kavakea ia Enoka ki te lagi, ko te Atua nae fiafia ki ei.

⁶ E hēai he tino e mafai ke fiafia ki ei te Atua pe kāfai e hē fakatuatua, auā ko ai lava he tino e hau ki te Atua e tatau ke talitonu e i ei te Atua, ma e i ei te taui kua ia hāunia mo ki lātou e hakili ake ki a te ia.

⁷ Ko te fakatuatua o Noa te na mafai ai ke lagona e ia te fakatonuga a te Atua e uiga ki nā mea e hē ia kitea kae ka tutupu i he taimi i mua. Na uhitaki ki te Atua, oi fau ai e ia he vaka ma na fakaola ai ia ma tona kāiga. Ona ko te mea tēnei, na fakahalagia ai te lalolagi kae ona ko Noa na uhitaki ki te Atua, na talia ai ia e te Atua ko he tino e faia te mea e tonu.

⁸ Ko te fakatuatua o Apelaamo te na mafai ai ke uhitaki ki te Atua i te kalagaga ki ei o te Atua ke fano ki te fenua kua uma te ia folafolagia mo ia. Na tukua e ia tona lava fenua kae fano ki he mea e hē ia iloa pe ko fea.

⁹ Ona ko tona fakatuatua na mafai ai ke nofo e vē he tagata kehe i te fenua na folafola e te Atua mo ia. Nae nofo i ni fale kie, e vē foki lava ko Ihaako ma Iakopo, iēia na fai foki ki ei te folafola tēnei e te Atua.

¹⁰ Auā ko Apelaamo nae fakatalitali mo te kakai na fuafua ma fau e te Atua, te kakai e tūmau pea lava ona fakavae.

¹¹ Ko te fakatuatua te na kavea ai ia Apelaamo ma tamana e ui lava kua matua, ma ko Hala foki tana āvaga nae hē manava ola. Ko Apelaamo nae talitonu ko te Atua e tauhi ki tana folafolaga.

¹² E ui lava ko Apelaamo kua mate, kae mai i te tino tēnei e fokotahi, na tutupu mai ai nā lāpuna o ia e tokalahi e vē ko te lahi o nā fetu i te lagi, ma e vē ko te lahi o nā fuāoneone i te matāfaga.

¹³ Ko te fakatuatua te na feoti ai nā tino uma iēnei. E hēki ki lātou mauagia nā mea na folafola e te Atua, kae na ki lātou kitea mamao lele atu nā mea iēnei, ma na fiafia oi fakailoa, ko ki lātou ni tino kehe e fakaaunukua i te lalolagi.

¹⁴ Kāfai nā tino e tautatala vēnei, e manino lele e hakilikili ki he nuku ke takua e o ki lātou.

¹⁵ Nae hēki toe māfaufau lele ki lātou ki te nuku na olo kehe mai ai; anei nae māfaufau ki ei, e vēnei ake na maua lava ho lātou avanoa ke toe liliu ai ki ei.

¹⁶ Kae ko te nuku e mokomoko ki ei ko he nuku i te lagi e hili atu te lelei. Ma ko te Atua e hē mā ke takua ia e ki lātou ko to lātou Atua, auā kua uma te ia hāunia o he kakai mo ki lātou.

¹⁷ Ko te fakatuatua te na ofo atu ai e Apelaamo tona ataliki ko Ihaako ke fai ma tāulaga, i te tofotofoga o ia e te Atua. Ko Apelaamo te tino na fai ki ei e te Atua te folafolaga, kae na malie lava ke ofo atu tona Ataliki ke fai ma tāulaga.

¹⁸ Na vāgana te Atua ki a Apelaamo, “E ala ia Ihaako ka maua ai e koe nā lāpuna na folafola atu e au.”

¹⁹ Nae mautinoa lava e Apelaamo e mafai e Atua oi toe fakatutū nā tino mai te oti — ma i hētahi itū, na toe fakafoki lava e te Atua ki a Apelaamo tona ataliki ko Ihaako.

²⁰ Ko te fakatuatua te na folafola ai e Ihaako nā fakamanuiaga mo Iakopo ma Ehau i te lumanaki.

²¹ Ko te fakatuatua te na fakamanuia ai e Iakopo nā ataliki tau tokatahi o Iohefa i te taimi kua tāli oti ai. Na teke ki tona tokotoko ma punou ifo ai oi viviki ki te Atua.

²² Ko te fakatuatua te na tautala ai ia Iohefa i te taimi ka oti ai, e uiga ki te olo kehega o tagata Ihalaelu mai Aikupito, ma tuku atu ai nā fakatonuga ki te mea e tatau ke fai ki tona tino, kāfai ia e oti.

²³ Ko te fakatuatua te na mafai ai e nā mātua o Mohe oi mumuni ia Mohe mo he tolu māhina talu te fānau mai. Na ki lā kitea ko te pepe e aulelei, ma e hēki mātataku oi hē fakalogo ki te fakatonuga a te tupu.

²⁴ Ko te fakatuatua te hēki talia ai e Mohe ina kua matua, ke takua ia ko he ataliki e o te afafine o te tupu.

²⁵ Na fiafia lava ia ke puapuagā fakatahi ma tagata o te Atua, i lo te fiafia oi fai te agahala mo hina taimi.

²⁶ I te manatu o Mohe, ko te maua o ia i nā fakahāuāgia ona ko te Mehia, e hili lele atu te tāua i lo nā koloa uma i Aikupito, auā nae kikila tahi lava ia ki te taui e ia maua i te lumanaki.

²⁷ Ko te fakatuatua o Mohe te na ia tukua ai ia Aikupito. Na ia kiteagia te Atua lilo, ma na kavea tēnā ma mea e hēki mataku ai i te tōkahā o te tupu.

²⁸ Ko te fakatuatua te na ia fakatinoa ai te Pāheka ma na ia fakatonua ai ke vali nā faitotoka i te toto, kae ke nahe tāmatea ai e te Agelu o te Oti, nā pepe tama ulumatua o Ihalaelu.

²⁹ Ko te fakatuatua te na mafai ai e tagata Ihalaelu oi kolohi te Tai Kukula e vē he kelekele mātūtū; na taumafai nā tino Aikupito ke kolohi vēnā e ki lātou, kae na mālelemu.

³⁰ Ko te fakatuatua o nā tino Ihalaelu te na mafai ai ke holo ki lalo nā pa puipui o Ieliko, i te kua kātoa o nā aho e fitu e hiko fakatakamilo e ki lātou ia Ieliko.

³¹ Ko te fakatuatua te na hēki oti ai ia Lahapa te fafine talitāne ma nā tino nae hē uhitaki ki te Atua, auā na fakafeiloaki ma te fiafia e ia nā hipai Ihalaelu.

³² Ni a nei la ni iētahi mea ka lea atu ai au? E hē lava he taimi ke tautala atu ai au e uiga ki a Kitiona, Palaka, Hamahoni, Iefata, Tavita, Hamuelu, ma te kau pelofeta.

³³ Ona ko te fakatuatua o nā tino vēnei, na fakatōkilalo ai e ki lātou nā mālō. Nae ki lātou faia nā mea e tonu ma ki lātou maua ai nā mea na folafola e te Atua. Na ki lātou tapunia ia gutu o leona,

³⁴ na ki lātou tāmatea nā afi fakamātakutaku ma mafai ke hao mai i te pelu. Nae vāivai ki lātou kae na maua e ki lātou te mālohi; na uiga kehe to lātou mākeke i nā taua, ma na ki lātou fakatōkilalogia nā vaegākau a nā mālō kehe.

³⁵ E ala i te fakatuatua na toe feiloaki ai nā fafine ma nā tino o nā kāiga o ki lātou na feoti kae na toe fakatutū mai te oti. Ko iētahi tino e hēki fofou ko ki lātou ke fakahaoloto, ma na feoti ai i nā fakahāuāga kae ke toe fakatutū ai ki lātou ki he ōlaga e hili atu te lelei.

³⁶ Ko iētahi nae fakatauemu ki ei ia tagata ma kini, ma ko iētahi nae haihai i nā filifili ukamea ma togi ki te falepuipui.

³⁷ Nae fetogi i nā fatu, nae tatipi lua ma tāmate i te pelu. Nae kokofu i nā kofu paku māmoe pe ko nā paku oti — nae mātitiva, nae fakahāuāgia ma faikino ki ei ia tagata.

³⁸ Na māumau lele iēnei tagata lelei mo te lalolagi. Nae eva i te vao ma luga o mauga, ma nonofo i loto o nā ana ma nā lua i te kelekele, e vē ni tino e hēai ho lātou nuku.

³⁹ Ma ko ki lātou uma iēnei, e ui lava i te takutakua o a lātou mea na fai e ala i te fakatuatua, kae e hēki ki lātou mauagia te mea na folafola e te Atua,

⁴⁰ auā kua uma te fai e te Atua hētahi peleni e hili atu te lelei, mo ki tātou. Ko te fuafuaga a te Atua, ke nahe fakakātoatoagia to lātou lelei, heiloga kua i ei fakatahi ki lātou ma ki tātou.