1 Petelu 5 - Tokelauan New Testament

Te Lafu Māmoe a te Atua

¹ Ko au he toeaina, ma e molimau au e uiga ki nā puapuagā na pa ki ei ia Keliho, ma ka i ei fakatahi au ma ia i tona mamalu i te taimi ka fakaalia ai. Ko au la e aioi atu ki a te koutou nā toeaina o te Ekalehia,

² ke kavea koutou e vē ni leoleomāmoe ma tauhi te lafu māmoe a te Atua kua tuku atu ke koutou kikilagia. Ke koutou faia te mea tēnei ma te loto kātoatoa e vē ona fofou ki ei te Atua, kae nahe faia ma he loto hē kātoatoa. Ke kavea tautou tautua ko he mea e fofou moni koutou ke koutou faia, kae nahe vē ko he mea ke maua ai ni autou tupe.

³ Nahe koutou taumafai ke pule mālohi ki nā tino e koutou kikilagia, kae taumafai ke fai koutou ma fakatakitakiga ki te lafu māmoe.

⁴ Kāfai la te Leoleomāmoe Hili e toe hau, ka maua e koutou te pale mamalu e hē mafai ke matafi kehe tona gigila.

⁵ E vēnā foki koutou te tupulaga, e tatau koutou ke uhitaki lelei ki toeaina. Ma e tatau koutou uma ke maua i te loto maulalo ma fehoahoani tētahi ki tētahi, e vē oi lea mai te tuhituhiga paia, “Ko te Atua e teteke ki nā tino fakamaualuga, kae alofa ki nā tino loto maulalo.”

⁶ Koutou la ke maua i te loto maulalo i mua o te Atua mālohi hilihili kehe, kae ke hiki ake ai koutou e ia ki luga, i te taimi e ia filifilia.

⁷ Ko te Atua e alofa ki a te koutou, tuku atu la ki a te ia nā mea uma e popole ai koutou.

⁸ Koutou ke mataala ma kikila fakalelei! Ko te fili o koutou, te Tiāpolo, e eva ma taukekē e vē he leona, oi hakili he tino ke ia kaia.

⁹ Ke mautū te koutou fakatuatua ma teteke ki ei, auā e koutou iloa ko nā uho Kelihiano o koutou i te lalolagi kātoa, e maua foki i nā puapuagā e vē ko koutou.

¹⁰ Kāfai e uma atu nā taimi e puapuagā ai koutou, ko te Atua o te alofa tūnoa tē e ia kalagagia koutou ke i ei i tona mamalu tūmau i te māfutaga ma Keliho, ka ia toe fakakātoatoagia koutou, ma lagolago ma fakamākeke atu.

¹¹ Ke ia te ia te mālohi e fakavavau fakavavau lava. Amene.

Nā toe Kupu

¹² Ko te tuhi pukupuku tēnei e fehoahoani mai ki ei ia Hila, toku hoa Kelihiano fakamāoni, ki te tuhiga. Ko au e fakamālohi ma molimau atu ki a te koutou, ko nā mea uma kua tuhi e au, ko te alofa tūnoa moni tēnā o te Atua. Koutou la ke mautū i te alofa tūnoa o te Atua.

¹³ Ko te hoa Ekalehia o koutou i Papelona, na filifilia foki e te Atua, e fakafeiloaki atu ki a te koutou, e vēnā foki toku ataliki ko Maleko.

¹⁴ Ke fakafeiloaki tētahi ki tētahi i te kihi o te alofa faka-Kelihiano. Ke ia te koutou uma kua ia Keliho, te fīlēmū.