Markus 9 - En Taar Weru a nunuwu' é Tontemboan

¹ Icua-Na ka'i ai séra, “En ulitna icua-Ku mangé ai camu, an unér iow sé lumili am bia'i, awéan sé ra'ipé' maté sa ra'ipé' sinéré éra si Amang Kasuruan kumawasa tanu Kolano.”

Si Yesus iparayo-rayo wo pasiri-siriin am puruk ing kuntung

² Lumangkoio enem ngando, iwali i Yesus si Petrus, si Yakobus wo si Yohanes sumosor asi esa kuntung rangka'. Am bitu wayaoka iséra wo an dior im beren éra si Yesus mawalinao,

³ wo en juba-Na imakuloo keli menéla-nélap. Ang kayo'baan anio', ra'ica wana tou e makawoo kumemes ing karai akar i makulo' tanu ing kakulo' im pekaraien-Na itu.

⁴ Wo mapaturu'o mai ai séra si Elia wo si Musa memaa-maar ang karapi i Yesus.

⁵ Icua i Petrus a si Yesus, “Guru, loor oka woo kita asi tampa anio'. Mandéo itoor ami telu ténda, si esa anu i Guru, si esa anu i Musa, wo si esa anu i Elia.”

⁶ Icuana in taniitu ampa'paan ra'io kailekanna ka'i sapa si musti cuana, ampa'paan sia wo sé kara-karapina maindé'o keli.

⁷ Wo tumumpao mai eng kambung lumoindong iséra. Wo an untep ing kambung itu kalingaan en suara, “Si anioo si Toyaang-Ku, si caupus-Ku, lingano mangé Sia!”

⁸ Tumarépé'anke'mai an tutuw éra suméré sé an li'cir, ra'io ka'i wana tou walina eng kaséréan aluar si Yesus oka in esa.

⁹ An tutuw éra imaperos ing kuntung, itaar i Yesus ai séra wosama' ra'ica toro ipepaar éra a si séike' mangé sapa en sinéré éra itu, sa si Toyaang i Tou ra'ipé' tumou sumawel an uner é tou imaté.

¹⁰ Anaé, ra'ica ipepaar éra a sé tou walina sapa en sinéré éra itu, taan séra wo iséra membum-buéian sapa eng kaangéanna “tumou sumawel an uner é tou imaté.”

¹¹ Wo wuéien éra ai Sia, “Kéitu réén sé makailek wutul in Torat icumua sapaoka si Elia e musti rumiorai?”

¹² Isowat i Yesus, “Wutul si Elia oka si rumiorai en tumu'tul im baya-waya. Taan tambisa réén wo sé aipatic andumoro' si Toyaang i Tou sa Sia musti mendam ing keli kawenduan wo iséro' oka é tou?

¹³ Taan icua-Ku mangé ai camu, wutul si Elia imayo wo niéma' é tou sia kumiit ing kasalé'an éra in esa, tanu sé aipatic andumoro' sia.”

Si Yesus musér si roh léwo' asi esa toyaang wowo'

¹⁴ An tutuw i Yesus, Petrus, Yakobus wo si Yohanes maréng sumawel a sé murit walina, sérén éra keli en tou imali'us a sé murit itu. Wo piraan asé makailek wutul in Torat menson-sowatan wo iséra.

¹⁵ An tutuw é tou keli itu suméré si Yesus, séra im baya mangaya'ka' wo mario-rior mai en sumungkul Sia.

¹⁶ Wo wuéien i Yesus ai séra, “Sapa réén em pineson-sowatan iow wo iséra?”

¹⁷ Esaan asé tou keli itu sumowat, “Guru, iwaliku mai si toyaangku ai Co, ampa'paan sia rinasuk i roh léwo' si méma' sia mawowo'.

¹⁸ Susur i roh léwo' itu rumasuk sia, ire'bana si toyaangku an tana' wo em ba'ba'na melewa-lewa', em baangna mengare-ngare'ket, wo en owakna mene'da-ne'dai. Pinangilekkuo a sé murit i Guru sa woo ro'na yusér éra si roh léwo' itu, taan ra'ica kawooan éra.”

¹⁹ Wo icua i Yesus ai séra, “Éi camu sé tou ra'ica maéman, akar kawisa réén Aku musti mento' an uner iow? Wo akar kawisa réén Aku talesen ang karapi miow? Iwalio mai si toyaang itu am bia'i!”

²⁰ Wo iwali éra mai si toyaang itu a si Yesus. An tutuw i roh léwo' suméré si Yesus, wo makala'us igo'go' i roh léwo' si toyaang itu akar si toyaang itu care'ba an tana', wo mawilé-wiléi wo em ba'ba'na melewa-lewa'.

²¹ Wo wuéien i Yesus a si amang i toyaang itu, “Pirao eng ka- uré sia mamendam in anio'?” Isowat i amang i toyaang itu, “Tumo'tol sia in toyaangé' akar intarépé'.

²² Wo makakeli-keli sia pengawésoon i roh léwo' yuntep an api kuma'pa yuntep an dano e maté sia. Taan sa woo ro'na si Guru sumama' sia, tawangenai wo icaupusai kami.”

²³ Isowat i Yesus, “Kéitu réén ko kumua sa Aku ro'na? Pakasa ro'na mamuali a sé tou maéman!”

²⁴ Wo si amang i toyaang itu makala'us mangko', “Yaku maéman! Tawangenai aku wosama' makaawes em paémanen.”

²⁵ An tutuw sérén i Yesus kelio sé tou mai mali'us am bitu, romaan-Na repet si roh léwo' itu. Icua-Na, “Éi roh léwo' si méma'o si tou imawowo' wo imawengel. Peréntan-Ku ko, kumesot asi toyaang anio' wo ra'io toro ka'i rumasuk sia!”

²⁶ Wo kumesoto si roh léwo' itu mengangko-ngangko' wo ipego'go-go'go'na repet si toyaang itu. Sia kaséréan tanu matéo, akar keli tou makua, “Sia imatéo!”

²⁷ Taan timboian i Yesus eng kama i toyaang itu wo polon-Na, wo si toyaang itu tumulung.

²⁸ Kekawus in itu, si Yesus wo sé murit-Na muntep an esa walé. An tutuw wayaoka si Yesus wo sé murit-Na en am bitu wo séra mamuéi ai Sia, “Kéitu réén ra'ica kawooan ami musér si roh léwo' itu?”

²⁹ Isowat i Yesus ai séra, “Wayake' in sombayang, si roh léwo' tanu sia'i ro'na icesot.”

Si Yesus kumua ing karua andumoro' im papaté-Na

³⁰ Si Yesus wo sé murit-Na kumesot asi tampa itu wo lumangkoi ing Galilea, wo ra'ica kiim-Na kailekan é tou sa Sia lumangkoi am bitu,

³¹ ampa'paan Sia ang karoro'an imasusui a sé murit-Na. Icua-Na ai séra, “Si Toyaang i Tou isarakan oka a sé tou, wo patén éra oka Sia, wo asi endo katelu Sia tumou oka sumawel.”

³² Ra'ica kaangéan éra sé airoma'-Na itu, taan séra kenengke' i mamuéi ai Sia.

Si séi e mangko-wangko'

³³ Kekawus in itu si Yesus wo sé murit-Na icateka'o ang Kapernaum. An tutuw am baléo, wuéien-Na a sé murit-Na, “Sapa réén em pemaa-maaren iow tarépé' an uner in lalan?”

³⁴ Taan séra asaloke' imakapenes, ampa'paan an uner in lalan tarépé', séra meindo-indoan roma' andumoro' si séi e mangko-wangko' an uner éra.

³⁵ Si Yesus lumukut wo tumowa sé sangapulu' rua murit-Na. Icua-Na ai séra, “Si séi e masalé' mamuali tou kumataré-taré, sia musti mamuali tou sumomo-somoi asé im pakasa é tou wo mengaselewir séra.”

³⁶ Wo towan i Yesus si esa toyaang teké', iru'du'-Na tumulung an uner éra, ke'kepen-Na mai si toyaang itu, wo icua-Na ai séra,

³⁷ “Si séike' en sumungkul si toyaang teké' tanu si anio' ang karapi i ngaran-Ku, sia isumungkulo Yaku. Si séike' en sumungkul Yaku, ra'ica Yaku en sinungkulna, taan Sia si mutus Yaku.”

Si esa tou ra'ica murit i Yesus musér si sétang

³⁸ Icua i Yohanes a si Yesus, “Guru, sinéré ami si esa tou ra'ica mengakiit icita musér si sétang maké i ngaran-Mu, wo péronen ami sia, ampa'paan sia ra'ica mengakiit cita.”

³⁹ Taan icua i Yesus ai séra, “Ra'ica toro péronen iow sia! Ampa'paan ra'ica wana esaan tou ka'i méma' ing kakaya'kaan maké i ngaran-Ku wo makala'us muruk i ngaran-Ku.

⁴⁰ Si séike' e ra'ica sumundur icita, sia mengarapit ai cita.

⁴¹ En ulitna icua-Ku mangé ai camu, si séike' e méé ai camu sanga gelas rano elepen ampa'paan kamu mengakiit si Kristus, sia ra'ica kawisa katalaan in laasana.”

Si séi e mangémai si tou méma' ing kamesé-meséaan'

⁴² “Sa awéan tou iméma' esaan asé toyaang teké' tanu si anio' sé maémano a Yaku akar séra méma' ing kamesé-meséaan aweso taré eng kolot i tou itu wa'kesan im batu wangker wo itiya' an ta'sic.

⁴³ Sa eng kamamu esa iméma' ico ang kamesé-meséaan, pokoleno mio', ampa'paan aweso taré ko mandé wayaoka in esa kama tumerima ing katouan akar ing kauré-uré an sorga, wotaré awéan rua kama taan ko aitiya'ke' a naraka, an untep in api si ra'ica mape'de-pe'del. [

⁴⁴ An tampa itu, sé uler ra'ica maté wo en api ra'ica kape'delan.]

⁴⁵ Sa eng kécéimu esa iméma' ico ang kamesé-meséaan, pokoleno mio', ampa'paan aweso taré ko mandé wayaoka in esa kécéi tumerima ing katouan akar ing kauré-uré an sorga, wotaré rua kécéi taan ko aitiya'ke' an untep i naraka,[

⁴⁶ An tampa itu sé uler ra'ica maté wo en api ra'ica kape'delan.]

⁴⁷ Sa em berenmu iméma' ico ang kamesé-meséaan, tu'iceno mio', ampa'paan aweso taré ko muntep an untep ing Kakolanoan i Amang Kasuruan in esa weren, wotaré rua weren taan ko itiya' an untep i naraka,

⁴⁸ an tampa itu sé uler ra'ica maté wo en api ra'ica kape'delan.

⁴⁹ Si esa wo i esa tou ujin oka in api.

⁵⁰ Kamu sé makiit Yaku tanu asin. En asin itu mémang loor, taan sa en asin itu imata'pé'o, ra'io wana ka'i torona. Tioo kamu mamuali tanu asin si mata'pé'o, taan menonouo mangé meeluran si esa wo sé walina.”