Markus 15 - En Taar Weru a nunuwu' é Tontemboan

Si Yesus an dior i Pilatus

¹ Mamoondopé' keli, sé kikiiten é imam, sé anggota Mahkamah Agama wo sé makailek wutul in Torat wo sé matu'a é tou Yahudi mali'us mepaar e maté si Yesus. Kekawus in itu mangé wa'kesen éra Sia wo iwali éra mangé en isarakan a si Pilatus.

² Icateka' mangé a si Pilatus, wo wuéienna a si Yesus, “Wutul réén Ko Kolano é tou Yahudi?” Isowat i Yesus, “Si amango in esa en cumua in itu.”

³ Wo sé kikiiten é imam méé kelian tuduan a si Yesus.

⁴ Wo wuéien ka'i sumawel i Pilatus a si Yesus, “Kelio sé aipatudu éra andumoro' Ico! Ra'ica réén sowaten-Mu?”

⁵ Taan si Yesus ra'ica sumowat in sapa-sapa, akar si Pilatus mangaya-ngaya'ka'.

Si Yesus makéré in ukuman patén

⁶ Susur in endo wangko' Paska si Pilatus manaram mengawekar esa tou si pakabuin kumiit im pinangilek é tou Yahudi.

⁷ Wo asi témpo itu, awéan si esa tou, makangaran Barabas. Sia ayuntep am bui mewali-wali wo sé tou walina, ampa'paan séra imaté tou an tutuw éra isumundur sé pemerénta Romawi.

⁸ Wo sé tou keli mangé a si Pilatus, pangileken éra ai sia wosama' iwekarna esa tou si pakabuin, tanu ing kanaramen.

⁹ Wo wuéien i Pilatus ai séra, “Icasalé' réén iow iwekarku si Colano é tou Yahudi anio'?”

¹⁰ Si Pilatus mamuéi in taniitu, ampa'paan kailekanna sa sé kikiiten é imam mangana-nganat a si Yesus.

¹¹ Taan sé kikiiten é imam memaso-maso' sé tou keli e mangilek a si Pilatus wosama' iwekarna si Barabas torona éra.

¹² Wo makasapé' ka'i si Pilatus mamuéi ai séra, “Sa taniitu, sapa réén e musti émaanku a si Tou si pengatuulen iow kolano é tou Yahudi anio'?”

¹³ Séra ka'i mangko', “Isalipo Sia!”

¹⁴ Wo wuéien ka'i i Pilatus ai séra, “Sapa réén eng kaléwo-léwo'an niéma'-Na?” Taan makarepetke' taré séra maangko', “Isalipo Sia!”

¹⁵ Eng kasiwakana, ampa'paan si Pilatus masalé' marui in até é tou keli, iwekarna si Barabas torona éra. Wo peréntanna sé pengawal sumambok si Yesus, wo isarakanna e mangé isalip.

Si Yesus paséro-séro'

¹⁶ Kumawus in itu, iwali mangé é suraro si Yesus ang kintal in istana paento'an i gubernur. Wo towan éra pakasa sé kara-karapi éra suraro e mai mali'us am bitu.

¹⁷ Wukaan éra eng karai-Na wo karaian éra in juba pares. Wo émaan éra esa mahkota am panga-pangana rintek tutunéan wo ipaké éra an do'kos-Na.

¹⁸ Malekep ako in itu tumo'tolo séra masiri' Sia, icua éra, “Siri' a si colano é tou Yahudi!”

¹⁹ Séra mensan-sawelan mapangkur in do'kos i Yesus mapaké im papangkur wo paruraan éra ka'i wo makundu maapo' kéndoon ai Sia.

^20a Kekawus ako séra menéro-néro' Sia, wukaan éra en juba pares pekakaraien-Na wo karaian éra sumawel ing karai-Na.

Si Yesus aisalip

^20b Wo iwali éra mangé Sia kumesot ang kota Yerusalem e mangé isalip.

²¹ An tutuw itu, séra meta'up wo si esa tou makangaran Simon. Sia tou Kirene, amang i Aleksander wo si Rufus. Sia meunte-untepé' mangé ing kota Yerusalem wo leséén é suraro sia muléng in salip i Yesus.

²² Wali éra si Yesus an esa tampa makangaran Golgota, eng kaangéanna ‘Tampa Ru'i in Do'kos.’

²³ Wo iwéé é suraro a si Yesus en anggor si kinemuan i mur, taan ra'ica kiim-Na i melep.

²⁴ Kekawus éra sumalip Sia, wéténgen éra eng karai-Na ang kerapi in lumotréi en tumantu si séi e makéré.

²⁵ Asi jam sembilan imamoondo, isalip éra si Yesus.

²⁶ Wo an dangka' in do'kos-Na, awéan esa papang pinatican in tana'i, “Si anioo si Colano é tou Yahudi.” En aipatic ituo e imangémai kéitu Sia aisalip.

²⁷ Aisalip éra ka'i sé rua tou léwo', si esa ang kakan i Yesus wo si esa ang ka'biri-Na.[

²⁸ Wo in taniitu, linekepo e nats aipatic ang Kitap Le'nas: “Sia aicarékén an esaan angé asé tou léwo'.”]

²⁹ Sé tou malangkoi am bitu maojat Sia wo menguré-ngurésé in do'kos. Icua éra ai Sia, “Éi! Icua-Mu kiné Ko ro'na tumongkar im Balé Le'nas wo wangunen-Mu sumawel asi telu ngandoke',

³⁰ tumumpao mai asi salip itu wo lowireno mangé en owak-Mu in esa!”

³¹ Taniitu ka'i sé kikiiten é imam wo sé makailek wutul in Torat maséro' Sia. Séra wo i séra mengkuanan, “Sé tou walina ro'na lowiren-Na, taan en owak-Na in esa ra'ica kalowiran-Na!

³² Sa wutul Ko Mesias, kolano é tou Israel, tumumpao mai asi salip itu, wosama' ro'na sérén wo percayan ami.” Sé rua tou aisalip mewali-wali wo Sia maséro' ka'i Sia.

Si Yesus maté

³³ Asi jam duabelas, pakasa in sangkum in tampa itu mariréimbeng akar asi jam tiga im bawaando.

³⁴ Wo asi jam tiga im bawaando, si Yesus kumua in taangko' a nunuwu' é Aram, “Eloi, Eloi lama sabakhtani?” eng kaangéanna, “Kasuruan-Ku, Kasuruan-Ku, kéitu réén aitela'u-Mu Aku?”

³⁵ Kelinga in itu, piraan asé tou makatulung am bitu kumua, “Lingan angé, Sia matowa si nabi Elia.”

³⁶ Wo awéan esa tou mario-rior mindo im bungang karang si bungang meputé wo ing kapés, ramesenna in anggor esem wo itopokna an tempok i rondora in saraw wo iwééna mangé am ba'ba' i Yesus en se'sepen-Na. Wo si tou itu kumua, “Mandéo kita mento' wo suméré, séi si makailek si Elia maai en tumumpa Sia.”

³⁷ Wo si Yesus mangko' repet, kekawus in itu Sia maté.

³⁸ An tutuw itu eng kaéng pengakawu' am Balé Le'nas, mawirang maperua tumo'tol an dangka' akar an darem.

³⁹ Si kikiiten é suraro makatulung an dior in salip i Yesus. Keséréna si Yesus imaté tanu siitu, wo icuana, “Si tou anio', uli-ulit Toyaang i Amang Kasuruan!”

⁴⁰ Asi témpo itu ka'i awéan piraan wéwéné sé makaséré an tayang an tutuw i Yesus aisalip. Séra itu si Maria tou Magdala, si Maria inang i Yakobus wo'bas wo si Yoses, wo ka'i si Salome.

⁴¹ Iséra itu sé icumiit wo maselewir si Yesus an tutuw-Na ang Galileapé'. Am bitu ka'i kelian wéwéné walina sé imai an Yerusalem mewali-wali mai wo si Yesus.

E mayat i Yesus aicubur

⁴² An tutuw i matawio im bengi, sé tou tumu'tul ing kanen Paska wo muntepo in endo Sabat.

⁴³ Ampa'paan in ituo si Yusuf tou Arimatea ra'ica maindé' mangé meta'up si Pilatus e mangilek i mayat i Yesus e mangéna icubur. Si Yusuf itu anggota Mahkamah Agama wo pasiri-siriin é tou keli wo ang karoro'an i mengento-ngento' in témpona si Amang Kasuruan mai kumawasa tanu Kolano.

⁴⁴ An tutuw lingan i Pilatus sapaoka si Yesus imatéo, sia mangaya'ka'. Ampa'paan in ituo towanna si kikiiten é suraro wo mamuéi, wutul kiné réén si Yesus imatéo?

⁴⁵ Wo isowat i kikiiten é suraro, “Wutul é tuang, si Yesus imatéo.” Kelinga in itu, si Pilatus méé kaloasan a si Yusuf e mangé mindo i mayat i Yesus.

⁴⁶ Wo si Yusuf mangé tumeles kaéng lénen ipengasaput sé tou imaté, wo mangéna tumpa e mayat i Yesus an salip. Wo saputenna ing kaéng lénen itu e mayat i Yesus, wo mangéna icubur an esa wo'bok si aica'il an esa kuntung watu. Kekawus ako in itu, iwiléina esa watu wangker em pénet im bo'bok itu.

⁴⁷ Ang karoro'an in itu, winéano rékén i Maria Magdalena wo si Maria inang i Yoses en tampa kinuburan si Yesus.