Markus 12 - En Taar Weru a nunuwu' é Tontemboan

En andéan andumoro' sé tou matawoi an uma in anggor

¹ Kekawus in itu, tumo'tolo si Yesus rumoma' maké in andéan a sé kikiiten é imam, sé makailek wutul in Torat wo a sé matu'a é tou Yahudi. Icua-Na, “Awéan esa tou imuka' uma en usewan in anggor wo pagerenna en lumi'cir in uma itu. Sia kuma'il lo'beng émaan patepesan in anggor. Wo itoorna ka'i terung rangka' paento'an i matéir. Kumawus in itu iséwana en uma itu a sé tou matawoi in uma wo sia mangé an doong walina.

² An tutuw in orasnao imupu' in anggor, iru'du'na si esa ata mangé a sé tou matawoi in umana e mangilek ai séra em bagéan im buéna in anggor.

³ Taan si ata itu tinangka' wo pinangkur éra, wo iru'du' éra maréng ra'ica maali sapa-sapa.

⁴ Kumawus in itu, ru'du' ka'i i makauma itu si esa atana walina mangé ai séra. Si ata itu ka'i pinangkur éra an do'kos akar imapéla', wo ipapalawi' éra.

⁵ Wo iru'du'na ka'i si esa atana walina mangé ai séra. Taan si ata itu pinaté éra. Taniitu ka'i sé ata walina awéan sé pinangkur éra wo awéan ka'i sé pinaté.

⁶ Si aicatela'u waya oka in esa tou, si toyaang ipaupu-upusna. Sumiwakio', ru'du'na si toyaangna mangé ai séra, icuana, ‘Sa si toyaangku in esa tantu siriin éra oka.’

⁷ Taan sé tou matawoi in uma itu mengkuanan asi esa wo sé walina, ‘Siao e makaanu in uma anio' sa. Mayoo paténta sia, wo en uma anio' mamuali oka anuta.’

⁸ Tangkaan éra sia wo patén, wo iwangkil éra ang kesot in uma in anggor itu.

⁹ Intarépé', sapa en émaan oka i makauma in anggor itu? Sia maai oka wo paténna sé tou matawoi in uma itu, wo en uma itu ipapatawoina a sé tou walina.

¹⁰ Kamu tantu imacao i nats anio' ang Kitap Le'nas, ‘Watu aitiya' é bas imamualio watu patuuran.

¹¹ Niéma' i Amang Kasuruan en itu, wo sérénta e niéma'-Na itu uli-ulit ra'io cakua!’ ”

¹² Kelinga in itu, makala'us kailekan éra sa si Yesus masindir ai séra maké in andéan itu. Ampa'paan in itu raméjin éra in tumangka' Sia. Taan séra maindé' a sé tou keli, siituo iwaya éra Sia wo séra mangé.

En andumoro' i mawér im pajak a si Kaisar

¹³ Kekawus ako in itu, sé kikiiten é agama Yahudi rumu'du' piraan tou Farisi wo sé tou Yahudi sé makiit si colano Herodes en tuma'kong si Yesus, maké im buwuéien.

¹⁴ Sé tou itu mai wo kumua ai Sia: “Guru, kailekan ami si Guru ra'ica mengatowo. Si Guru ra'ica maindé' a si séike' mangé, ampa'paan si Guru ra'ica mengasisir in tou em pasiriin, taan taré masusui a sé tou ang karapi i makakii-kiit andumoro' ing kasalé'an i Amang Kasuruan. Intarépé' wuiéien ami sa kumiit in atoran in agamata, ro'na réén kami mér im pajak a si Kaisar kuma'pa ra'ica? Musti réén kami mér im pajak kuma'pa ra'ica?”

¹⁵ Taan kailekan i Yesus eng kapunekan éra wo icua-Na ai séra, “Kéitu réén kamu mangepé' a Yaku? Iwéé mai esa dinar wo sérén-Ku!”

¹⁶ Wo iwéé éra ai Sia esa dinar wo wuéien-Na ai séra, “Gambar wo ngaran i séi asi roit anio'?” Isowat éra, “Gambar wo ngaran i Kaisar.”

¹⁷ Wo icua-Na ai séra, “Iwééo mangé a si Kaisar si musti iwéé miow a si Kaisar, wo iwééo mangé a si Amang Kasuruan si musti iwéé miow a si Amang Kasuruan!” Kelinga in itu, séra mangaya-ngaya'ka'.

Em buwuéien andumoro' sé tou imatéo itumou sumawel

¹⁸ Kekawus in itu, piraan tou Saduki mai a si Yesus. Paanggapen éra sa sé tou imatéo ra'io kawisa tumou sumawel. Wo wuéien éra a si Yesus,

¹⁹ “Guru, aipatic i Musa en atoran anio' ai cita: sa si esa tuama icumawéngo wo sia maté tumela'u si penanaanna taan ra'ica imakéré toyaang, si metuari wo si tuama itu musti kumawéng wo si balu itu, wosama' si tuama imatéo itu ro'na imakéré taranak.

²⁰ Awéan pitu tuama metuari. Si luluna kumawéng wo si esa wéwéné wo si tuama itu maté taan ra'ica imakéré taranak.

²¹ Wo si carua ka'i kumawéng wo si wéwéné itu. Sia ka'i maté ra'ica imakéré taranak. Taniitu ka'i wo si catelu.

²² Wo mengulu-nguluro tanu siitu e imamuali. Sé pitu metuari itu ra'ica wana e imakéré toyaang. Sumiwakio', si wéwéné itu ka'i maté.

²³ Anaé, asi endo i Amang Kasuruan tumou sumawel sé tou imatéo, an tutuw séra tinou si séi asé pitu tuama itu e mamuali penanaan i wéwéné itu? Ampa'paan séra im pitu imenana'o sia.”

²⁴ Isowat i Yesus ai séra, “Isuméa'o keli kamu, ampa'paan ra'ica kaangéan iow eng Kitap Le'nas, wo ka'i ra'ica kailekan iow eng kakawasaan i Amang Kasuruan.

²⁵ Sé tou imatéo wo tumou sumawel, séra ra'io kumawéng wo kawéngen, taan séra menonou oka meputé wo sé malaékat an sorga.

²⁶ Wo ka'i andumoro' sé tou imaté wo tumou sumawel, ra'ipé' réén binaca miow si aipatic i Musa an sisisilen andumoro' in dukut tutunéan si mengembu-ngembung? Aicua i Amang Kasuruan a si Musa in tana'i, ‘Yakuo si Amang Kasuruan, si pengaapo'an i Abraham, Ishak wo si Yakub.’

²⁷ Asi témpo itu si Abraham, si Ishak wo si Yakub imatéo taan tumou sumawel wo mewali-wali wo si Amang Kasuruan an sorga. Anaé, si Amang Kasuruan ra'ica Kasuruan é tou imaté taan Kasuruan é tou menonou. Kamu wutu-wutul isuméa'o.”

En ukum si kumataré-taré

²⁸ Asi témpo itu, awéan si esa tou si makailek wutul in Torat makalinga si Yesus wo sé tou Saduki membum-buéian. Palingan i tou itu sapaoka en aisowat i Yesus a sé tou itu wutul. Ampa'paan in ituo sia sumusut angé a si Yesus wo mamuéi, “Si ukum wisa réén eng kumataré-taré am pakasa in ukum?”

²⁹ Isowat i Yesus, “En ukum kumataré-taré am pakasa in ukum tana'i, ‘Éi tou Israel, linganai sumama-sama'! Si Amang Kasuruan ituo Si Casuruanta, Sia wayake' in esa.

³⁰ Mengaupus angé si Casuruan, Amang Kasuruanmu ang karapi in lekep en atému wo ang karapi im pakasa ing katouanmu, wo ang karapi pakasa im pakawerotmu wo ang karapi pakasa ing kaketeranmu.’

³¹ Wo si ukum karua: ‘Mengaupus angé sé kakélému tou meputé ko mengaupus in owakmu in esa.’ Ra'ica wana ukum walina en lumébé pentingai asé rua ukum itu.”

³² Wo icua i tou makailek wutul in Torat itu a si Yesus, “En aicua i Guru wutul keli, sapaoka si Amang Kasuruan itu wayake' in esa, ra'ica wana walina aluar Sia.

³³ Mémang wutul, mengaupus angé si Amang Kasuruan ang karapi in lekep en até wo ang karapi pakasa im pakawerotmu wo ang karapi im pakasa ing kaketeranmu wo ka'i mengaupus sé kakélé tou meputé ko mengaupus in owak in esa, en itu lumébé pentingai asé pakasa i raragés binatang pinokol wo sé raragés walina.”

³⁴ Sérén i Yesus si tou itu si sumowat ang karapi ing kapinteran, wo icua-Na ai sia, “Ico tawio mamuali tou i Amang Kasuruan.” Wo ra'io wana ka'i mandé esake' tou em brani mamuéi sapake' mangé ai Sia.

En ubungan i Kristus wo si Daud

³⁵ An tutuw i Yesus masusuié' am Balé Le'nas, wo icua-Na, “Tumambisa sé makailek wutul in Torat makua sapaoka si Kristus itu taranak i Daud?

³⁶ Ampa'paan si Daud an tutuw kinawasa i Roh Le'nas kumua: Si Amang Kasuruan cumuao a si Tuangku tana'i, ‘Lumukuto mai asi tampa pasiri-siriin ang kakan-Ku, akar sé kaséké'-Mu iweta'-Ku an darem im palara ing kécéi-Mu.’

³⁷ Si Daud in esa mengatuul si Kristus itu Tuangna, anaé tambisa réén wo icuata Sia itu taranakna ka'i?” Wo sé tou keli arui keli luminga in aicua i Yesus.

Icua i Yesus wosama' mareti-reti a sé tou makailek wutul in Torat

³⁸ Icua ka'i i Yesus ai séra, “Kamu musti mareti-reti mangé a sé makailek wutul in Torat. Séra masalé' mawaya-waya' mepaké in juba wo masalé' pengasiriin ang kakelian in tou tanumai am pasar,

³⁹ wo masalé' malukut an tampa pasiri-siriin am balé paapo'- an é agama Yahudi wo am pésta kawéng.

⁴⁰ Séra ka'i mengauwak sé wéwéné balu e mandét im balé éra. Wo mengaakal ka'i sé tou ang karapi in sombayang lalambotan wosama' anggapen é tou séra loor. Séra itu tantu makéré oka in ukuman si uter keli.”

En andumoro' i raragés i wéwéné balu lengéi

⁴¹ Asi makasa si Yesus lumukut makasaru im piti papumpunan in doit raragésan, wo peméa-méan-Na rékén tambisa sé tou keli mapumpun in doit am piti itu. Kelian tou siya' mengawéé roit keli.

⁴² Wo mai si esa wéwéné balu lengéi. Sia mumpun rua roit logam am piti itu. En doit itu em bééna si tumeki-tekic.

⁴³ Wo towan i Yesus sé murit-Na wo kumua, “En ulitna icua-Ku mangé ai camu, si aipumpun i wéwéné balu lengéi am piti raragésan anio' eng kumeli mai wo sé aipumpun é pakasa é tou itu.

⁴⁴ Ampa'paan séra im baya iméé i raragés ang kasiyaan éra, taan si balu lengéi anio' iméé i raragés ang kalengéianna. Wo aiwéénao waya eng kaperluan ing katouanna.”