Lukas 5 - En Taar Weru a nunuwu' é Tontemboan

Si Yesus tumowa sé murit-Na kataré

¹ Asi makasa si Yesus makatulung an tembir in lour Genesaret. Wo keli sé tou imali'usai ai Sia e mai luminga in Taar i Amang Kasuruan.

² Wo kaséréan i Yesus sé rua londéi an tembir in lour itu. Asi témpo itu sé tou matangka' sera' itumumpao an londéi wo ang karoro'ano i mawu'as in lolombo'.

³ Wo si Yesus sumaké asi esa londéi anu i Simon. Wo iru'du'-Na si Simon en tumuké in londéina wosama' tumayang toyo' an tembir in lour. Wo si Yesus lumukut an londéi itu wo sumusui a sé tou keli sé an tembir in lour.

⁴ Kekawus ako si Yesus masusui wo icua-Na a si Simon, “Simon, ilondéio mangé si londéi anio' an tampa rarem wo ilomboo mio' en lolombo'mu en tumangka' sera'.”

⁵ Isowat i Simon, “Guru, sangawengio kami maéré-éré sera' taan ra'ica wana eng kinatangkaan ami. Taan, ampa'paan si Guru irumu'du' yaku, ilombo'ku sumawel en lolombo'.”

⁶ Pakaémaan éra mako en airu'du' i Yesus wo séra makatangka' sera' kelian ulit akar en lolombo' éra tumo'tolo makésé'.

⁷ Wo kapéien éra sé kara-karapi éra an londéi walina wosama' séra mai sumémbong. Wo sé kara-karapi éra itu mai wo mewali-wali mumpun sé sera' asé rua londéi itu akar imawuta, akar sé londéi itu tawio tuminep.

⁸ An tutuw i Simon Petrus suméré in itu, sia kumundu an dior i Yesus wo kumua, “Tuang, itela'uo mai aku ampa'paan yaku anio' tou kelian kamesé-meséaan.”

⁹ Si Simon icumua tanu siitu ampa'paan sia wo pakasa sé tou mewali-wali wo sia mangaya-ngaya'ka' isuméré ing kakeli é sera' sé kinatangkaan éra.

¹⁰ Taniitu ka'i sé kara-karapi i Simon, si Yakobus wo si Yohanes sé toyaang i Zebedeus, séra mangaya-ngaya'ka' isuméré in itu. Wo icua i Yesus a si Simon, “Simon tioo maindé'! Ico manaram mengatangka' sera', taan tumo'tol intarépé' ko mengaéré oka tou eng kumiit Yaku.”

¹¹ Kumawus in itu wésoono i Simon wo sé kara-karapina en londé-londéi ang katanaan wo itela'u éra waya en itu wo kumiit si Yesus.

Si Yesus sumama' si tou sumakit kusta

¹² Asi makasa si Yesus an esa kota. Am bitu awéan esa tou en owakna wuta ing kusta. An tutuw i tou itu suméré si Yesus, sia kumundu wo mekiupus an dior i Yesus, icuana, “Tuang, sa icasalé' i Tuang, si Tuang ro'na sumama' yaku.”

¹³ Kelinga in itu, yulur i Yesus eng kama-Na e misu' si tou itu wo kumua, “Icasalé'-Ku, masama'o ko.” Asi témpo ituke', icatalao en sakit kustana.

¹⁴ Wo péronen i Yesus si tou itu wosama' tioo icuana a sé tou sapaoka si Yesus en isumama' in sakitna. Wo icua i Yesus, “Mangé ipapaturu' en owakmu a si imam wo mééo mio' raragés binatang pinokol tanu si aiperénta i Musa tanu tuus ai séra sa ko imasama'o.”

¹⁵ Taan en abar andumoro' i Yesus icaseraro taré am bisa-wisa. Wo kelian tou mai en luminga in sususuien-Na wo e mapasama' in sakit éra.

¹⁶ Taan si Yesus imangéke' sumombayang an tampa lulu in tou.

Si Yesus sumama' si tou késo'

¹⁷ Asi makasa an tutuw i Yesus masusui, awéan piraan tou Farisi wo sé makailek wutul in Torat makalukut makalinga Sia. Séra mai am pakasa in doong ang Galilea, Yudea wo ka'i an Yerusalem owo. Eng kawasa i Amang Kasuruan awéano a si Yesus en sumama' sé tou sumakit.

¹⁸ Asi témpo itu, paalinai é tou a si Yesus si esa tou késo' aitekel am patekelan. Séra rumaméji maali si tou késo' itu an untep im balé wo iweta' an dior i Yesus.

¹⁹ Taan ampa'paan kumeli-keli sé tou am bitu, si tou késo' itu ra'ica icauntep éra am balé. Anaé, séra sumosor am bawo im balé wo egan éra en atep wo itumpa éra mio' si tou késo' itu si pakatekel am patekelan an uner é tou keli an dior wutul i Yesus.

²⁰ An tutuw sérén i Yesus e niéma' éra, kinailekan-Nao sapaoka séra maéman ai Sia. Wo icua-Na a si tou késo' itu, “Éi poow, eng kamesé-meséaanmu niampungano.”

²¹ Kelinga in itu, piraan tou sé makailek wutul in Torat wo sé tou Farisi mawero-werot an untep in até, “Si séi réén si Tou anio'! Em pakanuwu'-Na maojato si Amang Kasuruan. Ra'ica wana tou e ro'na méé kaampungan ing kamesé-meséaan é tou, wayake' si Amang Kasuruan.”

²² Taan kailekan i Yesus em pawero-weroten éra. Wo icua-Na ai séra, “Sapa réén em pemero-meroten iow an untep in até?

²³ Si wisa en taporak icua-Ku; ‘Eng kamesé-meséaanmu niampungano,’ kuma'pa ‘Tumooro wo maya'o?’

²⁴ Taan ituru'-Ku ai camu, wosama' kailekan iow sapaoka ang kayo'baan anio' si Toyaang i Tou awéan kawasa e méé kaampungan ang kamesé-meséaan.” Wo icua i Yesus a si tou késo' itu, “Tumulungo, angkaieno en tinekelanmu wo maréngo mangé am balému!”

²⁵ Asi témpo ituke', si tou késo' itu ka'i tumoor an dior é tou am bitu. Kumawus in itu, angkaienna em patekelanna wo sia maréng am baléna. Ang karoro'anna imawaréng, sia marayo-rayo si Amang Kasuruan.

²⁶ Keséré éra sapa e imamuali, pakasa sé tou am bitu mangaya-ngaya'ka' wo séra rumayo wo sumiri' si Amang Kasuruan. Wo ang karapi in indé' séra kumua, “Asi endo anio' sinéréo ami eng kakaya'kaan wangko' imamuali.”

Si Yesus tumowa si Lewi kumiit Sia

²⁷ Kekawus in itu si Yesus kumesot wo sérén-Na si esa tou matagi im pajak, makangaran Lewi, makalukut an tampa é tou mawér im pajak. Wo icua i Yesus ai sia, “Kumiito mai Yaku!”

²⁸ Kelinga in itu si Lewi tumulung wo itela'una waya en itu wo sia kumiit si Yesus.

²⁹ Wo si Lewi méma' im pésta wangko' am baléna torona i Yesus. Am bitu kelian sé matagi im pajak wo sé tou walina sé mekiit icuman ang karapi i Yesus.

³⁰ Keséré in itu, sé tou Farisi wo sé makailek wutul in Torat menge'bo-nge'bow a sé murit i Yesus wo icua éra, “Kéitu réén kamu kuman wo melep mewali-wali ang karapi é matagi im pajak wo sé tou iméma' ing kamesé-meséaan?”

³¹ Wo isowat i Yesus ai séra, “Ra'ica sé tou makaowak sama' e maperlu si dokter taan sé tou sumakit.

³² Yaku mai ra'ica en tumowa sé tou wutul, taan tumowa sé tou iméma' ing kamesé-meséaan wosama' séra ro'na mape'dis.”

En andumoro' i mapuasa

³³ Icua ka'i é tou Farisi itu a si Yesus, “Sé murit i Yohanes Mabaptis wo sé murit ami manaram mengapuasa wo mengasombayang. Taan kéitu réén sé murit-Mu kuman wo melep?”

³⁴ Isowat i Yesus ai séra, “Ro'na réén sé kara-karapi i pengantén tuama iru'du' muasa an tutuw i pengantén itu mewali-walipé' wo iséra?

³⁵ Taan maai oka en témpona si pengantén tuama indon é tou walina an uner éra wo asi témpo ituo séra muasa.”

³⁶ Wo icua ka'i i Yesus esa andéan a sé tou Farisi, “Ra'ica wana esa tou eng kumésé' sangakésé' kaéng ang karai weru wo itampalna ang karai matu'a. Ampa'paan eng karai weru itu tantu maléwó' wo eng kaéng sangakésé' itu ka'i ra'ica isumoma sa itampal asi karai matu'a.

³⁷ Taniitu ka'i, ra'ica wana esa tou e mumpun in anggor werupé' asi papumpunan in anggor uréo si niéma' ang kulit é binatang owo. Ampa'paan, sa en anggor weru itu sumepot, em papumpunan in anggor itu makenta'. Eng kasiwakanna en anggor itu icatiya' wo em papumpunan in anggor e niéma' ang kulit é binatang itu ka'i materi.

³⁸ Anaé, en anggor weru musti ipumpun asi papumpunan in anggor weru.

³⁹ Taniitu ka'i ra'ica wana mandé esake' tou si melepo in anggor uré wo masalé'pé' ka'i melep in anggor weru. Ampa'paan tantu icuana, ‘En anggor uré e numanamai wo in anggor weru.’ ”