Galatia 4 - En Taar Weru a nunuwu' é Tontemboan

Kita ra'io ka'i ata taan toyaang i Amang Kasuruan

¹ Em peangé-angénku tana'i: En andéanna, awéan esa tou makéré oka im bagéan asi amangna. Taan sa sia toyaangé', sia ra'ipé' toro makéré im bagéan itu mandé ka'i sia awéan hak e makéré in itu. Sia kaputépé' wo si esa tou ata si ra'ica wana hak e makéré im bagéan asi tuangna.

² Anaé, musti awéan tou e mewangko' si toyaang itu wo murus waya im bagéanna akar asi témpo si aitantuo i amangna.

³ Taniitu ka'i mai wo icita: An tutuw kita ra'ipé' makatuus si Kristus, kita pakaatané' é roh sé makakawasa ing kayo'baan anio'.

⁴ Taan asi oras aitantuo i Amang Kasuruan, yutus-Na si Toyaang-Na ang kayo'baan. Si Toyaang-Na tumou asi esa wéwéné wo menonou le'tek mengaéma' in ukum Torat tanu tou Yahudi.

⁵ Sia ayutus ang kayo'baan en tumu'bus sé tou menonou ang kakawasaan in ukum Torat, wosama' kita mamuali toyaang i Amang Kasuruan.

⁶ Wo ampa'paan kita mamualio toya-toyaang-Na, akar iru'du'-Na e Roh i Toyaang-Na muntep an atéta. Wo e Roh itu méma' icita ro'na tumowa si Amang Kasuruan, “O Abba, o Amang!”

⁷ Ampa'paan in itu kamu ra'io ka'i ata taan mamualio toyaang. Anaé, ampa'paan kamu toyaang-Na, kamu makéré oka im bagéan si aitu'tulo i Amang Kasuruan a sé toyaang-Na kiit ing kasamaan-Na.

Em paindé-indé' i Paulus a sé tou Galatia

⁸ Indior an tutuw iow ra'ipé' makatuus si Amang Kasuruan, kamu mengaata in owak a sé opo-opo' sé wutu-wutul ra'ica Amang Kasuruan.

⁹ Taan intarépé' Sia kinatuusano miow, kuma'pa lébé loor kamu patuulen katuusano i Amang Kasuruan. Kéitu réén kamu masalé'ke' maréng sumawel sumelewir a sé roh ing kayo'baan sé ra'ica keter wo lengéi? Kéitu réén kamu masalé'pé' mengaata in owak a sé roh itu?

¹⁰ Kamu tou ra'ica Yahudi le'tek mengakiit ing kanaramen in agama Yahudi andumoro' in endo Sabat, endo-endo wangko', serap, wo ta'un. Kéitu réén kamu masalé' mengakiit ing kanaramen wo in atoran-atoran é agama Yahudi itu?

¹¹ En icaindé'ku oréoka pakasa sé pinakepé-kepéanku mai mengakua in andumoro' i Yesus ai camu mara'i-ra'ike'.

Em pangileken i Paulus a sé tou Galatia wosama' kiiten éra em perina

¹² Éi poo-poow, yaku tou Yahudi taan aku mamualio kaputé miow tou ra'ica Yahudi, ampa'paan aku ra'io pakawa'kesen in ukum Torat. Anaé, pekiupusenku ai camu wosama' kiitan iow em peri ing katouanku si ra'io ka'i pakawa'kesen in ukum Torat. Wo indior kamu ra'ica maéma' ing kaséaan sapa-sapa a yaku.

¹³ Tantu kata'néiané' miow an tutuwku kataré-taré mai ai camu. An tutuw itu aku sumakit, anaé aku mangéke' an sangkum ing Galatia e mena' in owak, wo tutuw itu aku sumangkumo kumua in Abar Kaaruien andumoro' i Yesus Kristus ai camu.

¹⁴ Mandé ka'i en owakku sumakit méé pamuléngen ai camu, taan aku ra'ica aiséro' miow kuma'pa ra'ica marica yaku. Kamu sumungkul yaku tanuoka sumungkul si malaékat i Amang Kasuruan kuma'pa sumungkul si Kristus Yesus in esa.

¹⁵ Asi témpo itu kamu arui keli, taan intarépé' kamu ra'io ka'i arui, am bisao réén eng kaaruian iow itu? Yaku ro'na méé kasairian in andumoro' miow, asi témpo itu sapa-sapake' ro'na iwéé miow a yaku. Sa kéndo' woo ro'na tu'icen iow ka'i em beren wo iwéé miow a yaku.

¹⁶ Taan kéitu réén intarépé' nianggap iow aku tanu kaséké' miow? Ampa'paano réén aku icumuao in sususuien wutul andumoro' i Kristus ai camu?

¹⁷ Sé tou masusui ai camu ang karapi in sususuien ra'ica wutul, séra rumaméji en tumawér icamu. Taan em peangé-angén éra ra'ica loor, ampa'paan icasalé' éra kamu catané wo yaku wosama' kamu incaya' makiit iséra.

¹⁸ Iwayao mio' séra mengéma-ngéma' im pawasan loor, ra'ica an tutuwke' aku mewali-wali wo icamu taan ka'i tutuw aku ra'ica mewali-wali wo icamu. Ampa'paan wutul loor sa sé tou maraméji mengaéma' sé loor ang karapi im pawasanna loor.

¹⁹ Éi toya-toyaang sé caupusku, ampa'paan maindé' in andumoro' icamu, yaku ka'i mawendu puté wo ing kawenduan si pinendamo mai i esa wéwéné tutuw makéré toyaang. Yaku mawendu oka melala'us tanu siitu akar em peri i Kristus kaséréan an owak iow.

²⁰ Icasalé'ku keli mewali-wali wo icamu wosama' aku ra'ica repet rumoma' ai camu. Taan intarépé' aku mentayangan wo icamu akar repetanku i rumoma' ampa'paan ra'io kailekanku sapapé' en émaanku ai camu.

Si Hagar wo si Sara tanu paandéan

²¹ Éi kamu sé masalé' menonou makiit in ukum Torat, ra'ica réén kaangéan iow sapa sé aipatic ang Kitap Le'nas itu?

²² Ra'ica réén aipatic sapaoka si Abraham makaanu rua toyaang, si toyaang esa asi ata wéwéné wo si esa asi wéwéné si ra'ica pakakawasaan é tou walina?

²³ Si toyaang asi ata wéwéné itumou ampa'paan ing kasalé'an i tou, taan si toyaang asi wéwéné si ra'ica pakakawasan é tou walina itumou ampa'paan in janji i Amang Kasuruan.

²⁴ En anio' asalo andéan: sé rua wéwéné itu ayandé tanu rua perjanjian i Amang Kasuruan. Si wéwéné kataré si Hagar, sia ayandé tanu ing kuntung Sinai am bisa en ukum Torat aiwéé. Si Hagar itu puté wo si inang é pakasa in tou sé imamuali ata in ukum Torat.

²⁵ Si Hagar itu ayandé tanu ing kuntung Sinai an tana' Arab. Wo en Yerusalem intarépé' kaputé ing kuntung Sinai an tana' Arab, ampa'paan sé tou Yerusalem imamualio ata an ukum Torat.

²⁶ Taan si wéwéné walina si Sara, sia ayandé tanu in Yerusalem an sorga. Sia itu inangta sé maéman sé ra'ica pakawa'kesen in ukum Torat.

²⁷ Ampa'paan aipatico in tana'i: “Éi wéwéné si ra'ica kawisa méé toyaang, maaru-aruio mangé! Éi ko si ra'ica sumangkum ako mendam in sakit méé toyaang, maaru-aruio wo masalé-salé'o mangé! Ampa'paan si wéwéné aitela'u i penanaanna, makéré oka toyaang lébé keli wo si wéwéné makapenanaan.”

²⁸ Poo-poow, kamu imamualio toya-toyaang i Amang Kasuruan tanu in janji-Na, kaputé i Ishak itumou iciit in janji-Na.

²⁹ Indior si toyaang itumou iciit ing kasalé'an in tou, maokoi si toyaang itumou ampa'paan i Roh i Amang Kasuruan. Wo en okoi itu mengamualipé' akar intarépé'.

³⁰ Taan, sapa e nats si aipatic ang Kitap Le'nas? Aipatic in tana'i, “Yuséro si ata wéwéné itu wo si toyaangna! Ampa'paan si toyaangna itu ra'ica kawisa tumerima im bagéan mewali-wali wo si toyaang i wéwéné si ra'ica pakakawasan é tou walina.”

³¹ Ampa'paano in itu é poo-poow, kita ra'ica toya-toyaang i ata wéwéné, taan kita toya-toyaang i wéwéné si ra'ica pakakawasan é tou walina.