2 Tesalonika 1 - En Taar Weru a nunuwu' é Tontemboan

En siri'

¹ Siri' a yaku owo, Paulus wo sé kara-karapiku si Silas wo si Timotius. En surat anio' aicirim ami ai camu jamaat an Tesalonika. Kamu sé maéman a si Amang Kasuruan Amangta wo a si Apo' Yesus Kristus.

² Pangileken ami a si Amang Kasuruan, Amangta wo a si Apo' Yesus Kristus wosama' tumambérai ing kamang ai camu wo méma' ing katouan iow elur.

Si Paulus kumua i makapulu'sama' a si Amang Kasuruan

³ Poo-poow, kami patus mengua-ngua i makapulu'sama' a si Amang Kasuruan ampa'paan icamu. Wo kami patus méma' in taniitu, ampa'paan em paémanen iow a si Yesus makaketero wo ka'i makaaweso eng kaupusan iow a sé tou walina.

⁴ Ampa'paan in itu, kami arui masisil a sé jamaat in andumoro' icamu, ampa'paan kamu kasake' maéman a si Yesus wo kasake' talesen mandé ka'i kamu mendam in okoi wo ing kawenduan.

⁵ Pakasa en itu mamuali tuus si Amang Kasuruan makim sé tou ang kerapi in da'ica marapit. Kamu intarépé' niokoio ampa'paan ing Kakolanoan i Amang Kasuruan wo ampa'paano in itu kamu ka'i patus muntep ang Kakolanoan-Na.

⁶ Si Amang Kasuruan itu ulit ra'ica marapit wo suliin-Na oka waya sé tou imokoi camu.

⁷ Émaan-Na oka ka'i kamu wo icami cawekar an okoi wo ang kawenduan an tutuw si Apo' Yesus tumumpa mai a mangé en sorga owo. En itu mamuali an tutuw i Apo' Yesus mapaturu' in owak-Na mewali-wali wo sé malaékat-Na si wuta ing kawasa.

⁸ Wo ukumen-Na oka sé tou sé ra'ica kiim mengkatuusan wo si Amang Kasuruan wo ra'ica kiim kumiit in Abar Kaaruien andumoro' i Yesus Kristus Apo'ta.

⁹ Séra makéré oka ukuman asi Casuruan owo akar ing kauré-uré. Séra yusér i Casuruan tayang an dior-Na wo ra'io ka'i suméré ing kawangko' ing kawasa-Na.

¹⁰ Pakasa en itu mamuali oka an tutuw i Apo' Yesus imayo sumawel. Sia maai oka wo irayo é tou le'nas-Na wo siriin waya é tou maéman. Kamu ka'i icauntep ai séra ampa'paan kamu maémano in abar si aicuao ami.

¹¹ Ampa'paan in itu ipenomba-nombayang ami kamu wosama' kamu anggapen i Amang Kasuruanta patus towan-Na, wosama' lekepen-Na eng kasalé'an iow e méma' sé loor ang karapi ing kaketeran-Na wo lekepen-Na ka'i pakasa en tawoien im paémanenmu.

¹² Wo in taniitu, e ngaran i Yesus si Apo'ta iparayo miow. Wo ka'i kamu irayo i Apo' Yesus ampa'paan si Amang Kasuruanta wo si Apo' Yesus Kristus tumambérai ing kamang ai cita.