2 Petrus 1 - En Taar Weru a nunuwu' é Tontemboan

En siri'

¹ En surat anio' a yaku owo, Simon Petrus. Yaku anio' ata wo ruru'du'an i Yesus Kristus. Ipaticku en surat anio' ai camu sé maémano a si Yesus Kristus kaputé ami. Si Yesus Kristus itu Amang Kasuruan wo Lumolowirta. Sia iméma' icamu maéman ampa'paan si pengaémaan-Na wutul wo ra'ica marapit.

² Pekiupusenku a si Amang Kasuruan wosama' émaan-Na mai eng katouan iow elur wo tumambérai ing kamang si kumeli-keli ai camu ampa'paan katuusano miow si Amang Kasuruan wo si Apo'ta Yesus.

Si Amang Kasuruan en isumisir wo itumowa sé tou-Na

³ Si Amang Kasuruan makaanu ing kawasa wangko', wo pakén-Na eng kawasa itu e méé im pakasa sé paperlunta wosama' kita menonou le'tek ai Sia. Pakasa sé paperlunta aiwéé-Na ampa'paan kita makatuuso ai Sia, si tumowao icita e makéré im bagéan a rarayo wo in sisiri'-Na wo ang kalooran-Na.

⁴ Tanu siituo si Amang Kasuruan méé mai kamang lumoo-loor wo wutu-wutul awéan wééna ai cita tanu si aijanji-Nao. Asé kama-kamang aitambér-Na ituo, kamu ro'na icawekar ang kasalé'an léwo' si mengaléwo' im peri é tou ang kayo'baan, wo em peri miow ro'na mamuali tanuoka im peri i Amang Kasuruan.

⁵ Ampa'paano in itu, kamu musti rumaméji mauli-ulit e maéman a si Kristus. Wo em paémanen iow itu musti awesan iow ka'i ang karapi menonou ang kaloo-looran. Wo ang katouan iow ang kaloo-looran itu musti awesan iow ka'i ing kapinteran.

⁶ Wo asi kapinteran iow itu musti awesan iow i makawoo kumawasa in owak. Wo asi kumawasa in owak itu musti awesan iow ka'i ing katalesenan mengasaru im baya-waya. Wo asi katalesenan mengasaru im baya-waya musti ka'i awesan iow i menonou le'tek a si Amang Kasuruan.

⁷ Wo menonou le'tek a si Amang Kasuruan musti awesan iow ka'i ang karapi i mengaupus a sé poo-poow esa paémanen. Wo asi mengaupus a sé poo-poow esa paémanen musti awesan iow ka'i ang karapi i mengaupus sé kakélé in tou.

⁸ Ampa'paan sa sé peri-peri itu ai camuo wo em pakasa itu pengéma-ngémaan iow, sé ituo en tumawang icamu lébé makatuus si Yesus Kristus Apo'ta wo eng katouan iow lébé awéan torona a sé tou walina.

⁹ Taan sé tou ra'ica mengaéma' im pakasa itu, séra tanuoka sé tou wola, em pakaséré éra ra'ica loor, ampa'paan ailupao éra sapaoka eng kamesé-meséaan éra indior niampungano.

¹⁰ Ampa'paan in ituo é poo-poowku, kamu musti rumaméji tumuru' sapaoka kamu uli-ulit tinowa wo sinisir i Amang Kasuruan kumiit ai Sia. Sa émaan iow pakasa en itu, em paémanen iow a si Kristus makaketer wo ra'ica kawisa kamu lumepok ang kamesé-meséaan.

¹¹ Wo in taniitu kamu wéan-Na oka kaloasan e muntep ang kakolanoan akar ing kauré-uré, siituo eng kakolanoan i Apo' Yesus Kristus wo Lumolowirta.

¹² Ampa'paano in itu ipena'né-na'néiku ai camu andumoro im pakasa in itu, mandé ka'i kamu makaileko wo mauli-ulito maéma' in sususuien wutul i Casuruan si aisusuio ai camu.

¹³ Wo imamualio tawoienku e musti méé tata'néi im pakasa in itu ai camu ang kauré aku menonoué'.

¹⁴ Ampa'paan kailekanku sapaoka aku ra'io uré tumela'u ing kayo'baan anio', wo en itu aicuao i Yesus Kristus Apo'ta a yaku.

¹⁵ Ampa'paano in itu raméjinku tuma'néi ai camu, wosama' an tutuwku tumela'u ing kayo'baan anio', pena'né-na'néien iow em pakasa in itu.

Si Petrus sairi i rarayo wo in sisiri' i Yesus

¹⁶ Aisusuio ami ai camu andumoro' ing kawasa i Apo'ta Yesus Kristus wo andumoro' ka'i Sia maai sumawel. Sapa sé aisusui ami itu ra'ica sisisilen sé asalo niéma' é tou, ampa'paan icamio in esa en suméré ing kawangko'-Na.

¹⁷ Sinéré amio tumambisa si Yesus makéré i rarayo wo in sisiri' asi Amang Kasuruan owo. An tutuw itu kalingaan ami en suara i Amang Kasuruan si pasiri-siriin wo iparayo-rayo makua ai Sia tana'i, “Si anioo si Toyaang-Ku, si ipaupu-upus-Ku. Siao si mengaarui in até-Ku.”

¹⁸ En suara lininga ami itu a mangé en sorga owo, an tutuw kami mewali-wali wo si Yesus am puruk ing kuntung le'nas.

¹⁹ Sapa en sinéré wo lininga ami itu, iméma'o icami makaawes mercaya in abar ang Kitap Le'nas andumoro' i Kristus sé ipakuao é nabi indior. En abar é nabi itu tanuoka in sosoloan masendot ang kariréimbengan. En sosoloan itu masendot akar mai en sendot in endo imamoondo wo en sendot i Kristus matélang an untep in até miow, tanuoka si lolouren imaali mai sendot ang kayo'baan. Sa en abar itu uli-ulit pawéan iow rékén, icamu iméma'o im butul.

²⁰ Si kumataré-taré musti ta'néien iow, sapaoka e nunuwu' asi Amang Kasuruan owo sé aipatic é nabi indior ang Kitap Le'nas ra'ica toro ti'tiren kumiit im bewerot in tou.

²¹ Ampa'paan e nunuwu' asi Amang Kasuruan owo itu ra'ica isumangkum ako ipakua-kua kumiit ing kasalé'an in tou, taan ampa'paano in tawoien i Roh Le'nas si cumawasa a sé tou, akar séra ro'na kumua i nunuwu' i Amang Kasuruan itu.