2 Korintus 4 - En Taar Weru a nunuwu' é Tontemboan

Le'tek e mengakua in Abar Kaaruien andumoro' i Yesus Kristus

¹ Ampa'paano ing kaupusan i Amang Kasuruan, émaan ami en tawoien anio'. Ampa'paan in ituo cami ra'ica katalaan in arapan.

² Ra'ica kiim ami iméma' in tawoien anio' maké ing kanaramen sé ipaene-enep wo sé kalawiin. Wo ra'ica kiim ami matawoi ang karapi imauwak wo mengasélé'kow in Taar i Amang Kasuruan. Taan sé ipakua ami andumoro' sé wutul an dior i Casuruan, wo in taniitu icami maarap wosama' pakasa in tou numilai sumama-sama' ai cami an dior i Amang Kasuruan iciit in até weresi éra.

³ Sa en Abar Kaaruien andumoro' i Yesus Kristus sé ipakua ami ra'ipé' kaangéan, en itu ra'ipé kaangéan é tou sé ang karoro'an maangé am papaté.

⁴ Sé tou ra'ica mapercaya, em pakawerot éra winolao i opo' léwo' si makakawasa ing kayo'baan anio', akar séra ra'io mailek in sendot in Abar Kaaruien itu. Anaé, séra ra'ica makailek tambisa eng kawangko' i rarayo wo in sisiri' i Kristus, si meputé ulit wo si Amang Kasuruan.

⁵ En Abar si pakua ami ra'ica andumoro' in owak ami in esa. En Abar itu andumoro' i Yesus Kristus si Apo' é pakasa in tou. Wo icami asaloke' imamuali tanu ata en sumelewir icamu kumiit ing kasalé'an i Yesus.

⁶ Indior si Amang Kasuruan icumua in tana'i, “Asi kariréimbengan mantangai en sendot.” Intarépé' Siao ka'i iméma' in sendot-Na matélang an untep in atéta. Ampa'paano in sendot-Na si an untep in atéta, ro'na kailekanta eng kawangko' i Amang Kasuruan si masendot ang gio i Kristus.

⁷ En Abar Kaaruien sé pakua ami itu ayandé tanu ing kasiyaan sosor em bééna. Wo icami sé mengakua in Abar Kaaruien itu ayandé tanu ing kuré' taweté'. Icami makaanu ing kasiyaan anio' an untep ing kuré'. En itu imamuali en tumuru' sapaoka eng kaketeran si lumepe-lepet itu asi Amang Kasuruan owo ra'ica ai cami.

⁸ Icami pengoko-ngokoien am baya-waya, taan icami ra'- ica icawangkur. Icami ra'io makailek sapa en émaan, taan icami ra'ica katalaan im paarapen.

⁹ Kelian sé maokoi icami, taan ra'ica aiwaya-Na kami oka in esa. Kami makakeli papangkuren akar icare'ba, taan icami ra'ica maté.

¹⁰ Am bisake' en angéan ami tatap mapendam im patén tanu im pinendam mai i Yesus, wo in taniitu kaséréano sapaoka si Yesus menonou an owak ami.

¹¹ Ang kauré ami menonou, tatapke' awéan tou maawo-awo e maté icami ampa'paan makiit si Yesus. Wo taniitu kaséréano sapaoka si Yesus menonou an owak ami si ro'na maté anio'.

¹² Anaé, penaru-narun ami em papaté, ampa'paan in itu icamu makéré ing katouan akar ing kauré-uré.

¹³ Ang Kitap Le'nas awéan e makua, “Percayanku, ampa'paan in ituo aku manuwu'.” Anaé, ang karapi ing kaincayaan imaéman tanu siitu ka'i, kami manuwu' ampa'paan percayan ami.

¹⁴ Kailekan ami sapaoka si Apo' Yesus tinouo sumawel i Amang Kasuruan wo icami ka'i touen sumawel mewali-wali wo si Yesus, icamu wo icami iwali oka an dior-Na.

¹⁵ Icami mendamo mai waya ing kawenduan itu asaloke' ing kalooran iow. Icami talesen masaru ing kawenduan itu wosama' en upus aitambér i Amang Kasuruan makakeli en tou imendam. Wo in taniitu makakelio sé tou makua i makapulu'sama' a si Amang Kasuruan, akar Sia iparayo-rayo wo pasiri-siriin.

Menonouo mangé ang karapi imaéman

¹⁶ Ampa'paan in ituo kami ra'ica mateké' en até. Mandé ka'i en owak ami makauré makalembi, taan e roh ami susur in endo pemeru-merun wo makaketerke'.

¹⁷ Wo eng kawenduan sé papendamen ami intarépé' ra'ica uter wo ang karoro'anke'. Taan teriman ami oka eng kaaruian si ra'io icakua wo eng kaaruian itu akar ing kauré-uré. Eng kaaruian itu ilumébé mai wo ing kawangko' sa ipeputé wo ing kawenduan si pinendam ami mai.

¹⁸ Anaé, ra'ica iwéé ami an dékén sé ro'na kaséréan, taan sé ipawéé ami an dékén sé ra'ica kaséréan. Sé kaséréan itu itumang asalo in ang karoro'anke', taan sé ra'ica kaséréan itu tatap akar ing kauré-uré.