1 Tesalonika 3 - En Taar Weru a nunuwu' é Tontemboan

Si Paulus rumu'du' si Timotius mangé an Tesalonika

¹ Ra'io katangan ami eng kaleloan ami ai camu. Ampa'paan in itu, yaku wo si Silas tumantuo e mento' ang kota Atena,

² wo si Timotius poowta an esa paémanen, yutus ami mangé ai camu. Sia itu kara-karapita matawoi a si Amang Kasuruan e mengakua in Abar Kaaruien andumoro' i Yesus Kristus. Yutus ami si Timotius maangé e méé ing kaketeran an até miow wosama' em paémanen iow a si Yesus makaketer.

³ Wo in taniitu, mandé ka'i kamu niokoio, kamu kasake' maéman a si Yesus. Ampa'paan kailekano miow in esa sa sé tou maéman a si Yesus musti meta'up ing kawenduan.

⁴ Indior an tutuwta imewali-walipé', sumangkumo icua ami ai camu sapaoka kita meta'up oka ing kawenduan. Wo intarépé' eng kawenduan itu pinendamtao mewali-wali.

⁵ Ampa'paan in ituo ayutus ami si Timotius ai camu ampa'paan kami ra'io makatang sa ra'io luminga in abar andumoro' icamu. Icasalé'ku makéré abar, sapaoka kamu maémané' a si Yesus kuma'pa ra'io. En icaindé'ku oréoka kamu katawérano i kikiiten é sétang wo ra'io maéman a si Yesus. Sa wutu-wutul mamuali taniitu, ra'- ica wana en torona sé tinawoi ami indior.

Si Timotius iméé abar in andumoro' é jamaat Tesalonika

⁶ Intarépé' si Timotius imaréngo mai ai cami wo icuana ai cami en abar in andumoro' icamu an Tesalonika wo iméma'o icami arui. Aisisilna sapaoka kamu kasake' maéman a si Yesus wo meupu-upusan. Aicuana ka'i sa kamu makata'néi icami, en até miow arui. Wo kamu masalé' meta'up sumawel wo icami, puté ka'i wo icami masalé' meta'up wo icamu.

⁷ Ampa'paan in ituo é poo-poow, mandé kami ang kasusaan wo ang kawenduan, kami ka'i arui ampa'paan palingan ami kamu kasake' maéman a si Yesus.

⁸ Wo intarépé' pendamen ami wutu-wutul menonou awéan en torona, asalo kamu tatap maéman a si Casuruan wo meesa ang karapi-Na.

⁹ Kami wutu-wutul arui ampa'paan kamu kasake' maéman a si Amang Kasuruan. Ampa'paan in ituo kami kumua i makapulu'sama' ai Sia ampa'paan ing kaaruian ami itu.

¹⁰ Endo wo em bengi kami menomba-nombayang wosama' kami ro'na meta'up sumawel wo icamu. Wo susuian ami oka kamu en lumekep sé ra'ipé' lekep am paémanen iow.

¹¹ Kami maarap si Amang Kasuruan Amangta wo si Yesus Kristus si Apo'ta e méé mai lalan wosama' kami ro'na meta'up sumawel wo icamu.

¹² Pangileken ami wosama' émaan i Casuruan kamu meupu-upusan asi esa wo si esa wo mengawe-ngawes ka'i eng kaupusan iow a sé tou, meputé icami mengaupus ai camu.

¹³ Pangileken ami a si Casuruan eng kumeter in até miow wosama' en até miow ra'ica wana kaséaan wo le'nas an dior i Amang Kasuruan si Amangta, an tutuw i Yesus Apo'ta maai sumawel mewali-wali ang kerapi é tou le'nas-Na.