Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

1 Petrus 3 - En Taar Weru a nunuwu' é Tontemboan


En sina'u a sé mempenanaan

1 Éi wéwéné sé kinawéngo, kamu musti male'te-le'tek angé a sé penanaan iow, wosama' sa awéan penanaan sé ra'ica maéman in Taar i Amang Kasuruan, mandé kamu ra'ica rumoma' in Taar itu ai séra, séra ro'na maéman a si Amang Kasuruan, ampa'paan séra suméréo ing katouan iow loor.

2 Séra ro'na maéman a si Amang Kasuruan ampa'paan makaséré ing katouan iow si makaaté weresi ai Sia wo em pakasiri' miow ai Sia wo a sé kakélé tou.

3 Wo ra'ica toro kamu mengapasung in owak asalo kaséréan ang kesot, tanumai: mengaéma' im buuk megioo, makasondol i mas kuma'pa mekarai ing karai loor wo sosor ulit em bééna.

4 Taan sa kamu masalé' uli-ulit kaséréan pasung, eng kapasungan iow itu musti kumesot an untep in até owo, tanumai: makaperi ko'kos en até wo elur. Siituo eng kapasungan akar ing kauré-uré wo sosor em bééna an dior i Amang Kasuruan.

5 Taniituo em pakapasung in owak é wéwéné sé maéman indior. Séra asalo mamangén a si Amang Kasuruan: séra mengapasung in owak ang karapi ing kale'tekkan a sé penanaan éra.

6 En andéanna si Sara. Sia itu uli-ulit le'tek wo mengaéma' sapa si airu'du' i penanaanna, wo pengatuulenna ka'i si Abraham penanaanna itu tuang. Wo kamu é wéwéné, kamu ro'na patuulen taranak i Sara, sa mengaéma' in loor wo ra'ica maindé' mandé awéan e me'teng icamu.

7 Taniitu ka'i kamu é tuama sé awéano penanaan, kamu musti menonou angé wo si penanaanmu ang karapi ing kapinteran asi Kasuruan owo. Eng kaketeran éra itu ra'ica meputé wo icamu wo séra musti pasiriin iow ampa'paan kamu wo iséra puté makéré oka bagéan asi katouan akar ing kauré-uré si wéé oka mai i Amang Kasuruan. Sa kamu menonou tanu siitu ang karapi i penanaan iow, en sombayang iow ra'ica wana en sumémpér.


Malese-leseno mangé masaru ing kawenduan

8 Anaé, kumusi' i nunuwu'ku anio' pangilekenku ai camu, musti meesa en até wo esa em pamendamen, meupu-upusan tanuoka sé mepoow wo tumuru' ing kaupusan wo ko'kos en até.

9 Wo tioo sé léwo' suliin iow in léwo', kuma'pa ipawa'ba' é tou suliin iow ka'i i mengawa'ba'. Mekiupuso mangé a si Amang Kasuruan wosama' séra wéan-Na mai ing kamang, ampa'paan kamu tinowa i Amang Kasuruan e méé ing kamang a sé tou walina wo in taniitu kamu ka'i makéré ing kamang.

10 Ang Kitap Le'nas aipatic in tana'i, “Si séi si masalé' menonou ang kaaru-aruian wo masalé' sumangkum in endo-endo loor, sia musti tuméir in lila'na wosama' ra'ica manuwu' andumoro' in léwo', wo tuméir im biwina wosama' ra'ica mengauwak.

11 Sia musti menonou tumayang asé kaléwo-léwo'an wo mengaéma'o mangé sé loor. Sia ka'i musti rumaméji ang karapi i mauli-ulit e menonou meelu-eluran wo sé tou walina.

12 Ampa'paan si Casuruan uli-ulit makaséré sé tou maéma' ing kasalé'an-Na, wo pelinga-lingan-Na en sombayang éra. Taan sunduren-Na sé tou mengéma-ngéma' ing kaléwo'an.”

13 Sa kamu re'dem mengaéma' in loor, tantu ra'ica wana e méma' in léwo' ai camu.

14 Taan pakakamangen oka kamu, mandé kamu musti mawendu ampa'paan maéma' ing kasalé'an i Amang Kasuruan. Ampa'paano in itu tioo kamu maindé' a si séike' mangé wo tioo maindé-indé'.

15 Taan irayoo wo siriino mangé si Kristus an até miow wo émaano Sia merénta ai camu. Wo kamu musti tu'tul en sumowat kawisake' mangé sa awéan tou mamuéi andumoro' sapa si paara-arapen iow asi Apo' Yesus. Wo sowateno mangé séra ang karapi ing ko'kos en até wo ang karapi in siri'.

16 Sa kamu sumowat, musti uli-ulit ang karapi in até weresi, wosama' sé tou maroros icamu ampa'paan kamu makiit si Kristus, séra in esa e malawi' ampa'paan sé iparoros éra itu ra'ica wutul.

17 Aweso taré kamu mawendu ampa'paan mengaéma' sé loor, sa en itu kasalé'an i Amang Kasuruan, wo taré kamu mawendu ampa'paan mengaéma' sé léwo'.

18 Ampa'paan si Kristus imatéo wayake' imakasa en tumu'bus ing kamesé-meséaanta. Sia ra'ica wana kaséaan, taan Sia imaté torona icita sé mengéma-ngéma' ing kamesé-meséaan, wosama' kita ro'na ipakawali-Na mangé a si Amang Kasuruan. Sia pinaté an tutuw-Na imamuali Tou, taan Sia tinou sumawel i Roh Le'nas.

19 Wo si Roh Le'nas ituo ka'i eng kumawasa a si Kristus wo imakawali Sia eng kumua in abar i Amang Kasuruan a sé roh sé pakabuin.

20 Sé roh itu, roh é tou ra'ica le'tek asi Amang Kasuruan an jaman i Nuh. Ang karoro'an i Nuh maéma' ing kapal wangker, si Amang Kasuruan talesen maento-ento' sé tou e mape'dis mengéma-ngéma' ing kaléwo-léwo'an. An tutuw en sonop wangko' itu imayo, wayake' i walu tou sé malowir asi sonop wangko' itu. Sérao sé an untep ing kapal wangker itu.

21 Si sonop wangko' an tutuw itu, andéan im baptisan intarépé'. Em baptisan itu pengatuus sapaoka kamu linowiro i Amang Kasuruan ampa'paano tinou-Na sumawel si Yesus Kristus. Em baptisan itu ra'ica i meresi sé kotor an owak iow, taan i mangilek a si Amang Kasuruan wosama' en até miow weresi.

22 Intarépé' si Yesus Kristus imangém an sorga wo lumukut ang kakan i Amang Kasuruan. Wo pakasa sé malaékat, pakasa sé makakawasa wo pakasa ing kaketeran, pakasa in itu an darem ing kakawasaan-Na.

En Taar Weru a nunuwu' é Tontemboan @ LAI 2018

Indonesian Bible Society
ကြှနျုပျတို့နောကျလိုကျပါ:



ကြော်ငြာတွေ