1 Korintus 8 - En Taar Weru a nunuwu' é Tontemboan

En andumoro' ing kakanen iparagés a sé opo-opo'

¹ Poo-poowku, intarépé' icasalé'ku icua ai camu andumoro' ing kakanen iparagés a sé opo-opo'. Awéan sé tou makua in tana'i: “Kita im baya sé maéman makaileko andumoro' in itu.” Eng kakailekan tanu siitu mengaéma' icamu makatirayo, taan en upus ro'na méé ing kaketeran a sé tou walina.

² Sa awéan tou mawerot sapaoka sia kelio eng kailekan, en ulitna sia itu keliané sé ra'ipé' kailekanna si musti kailekanna.

³ Taan sa si tou mengaupus si Amang Kasuruan, tantu sia katuusan oka i Amang Kasuruan.

⁴ Wo andumoro' ing kuman ing kakanen sé airagéso a sé opo-opo', kailekanta: sé opo-opo' ra'ica wana ang kayo'baan, wo si Amang Kasuruan wayake' in esa ra'ica wana walina.

⁵ Awéan sé patuulen opo' sé menonou an sorga wo ang kayo'baan. Wutul kelian opo' wo kelian kasuruan em pengaapo'an é tou.

⁶ Taan ai cita anio', si Amang Kasuruan itu wayake' in esa, Siao si Amang si méma' im baya-waya. Torona Siake' kita menonou. Wo ka'i si Casuruan waya in esa, Siao si Yesus Kristus. Ampa'paano Sia em baya-waya niéma' wo ampa'paano Sia kita menonou.

⁷ Mandé ka'i in taniitu, ra'ica pakasa in tou makailek andumoro' in itu. Awéan tou indior mengaapo' a sé opo-opo', taan intarépé' maémano a si Yesus Kristus. Ampa'paan in ituo akar intarépé' séra makapendamé' sapaoka eng kakanen sé airagéso a sé opo-opo' itu, kakanen torona é opo-opo'. Anaé, sa séra kuman ing kakanen itu séra makapendam méma'o ing kamesé-meséaan, ampa'paan em paémanen éra ra'ipé' keter.

⁸ En ulitna, eng kakanen ra'ica méma' icita makatawi kuma'pa makatayang a si Amang Kasuruan. Mandé ka'i kita ra'ica kuman ing kakanen si airagéso a sé opo-opo', kita ra'ica marugi. Taniitu ka'i mandé kita kuman ing kakanen itu, kita ra'ica muntung.

⁹ Taan kamu musti mareti-reti. Mandé ka'i ro'na kanen iow sé ayumper itu ampa'paan papercayan iow en itu ra'ica mamuali soal, taan tioo tumawér sé tou walina sé ra'ipé' keter em paémanen eng kuman ing kakanen itu. Paweroten éra ang karapi ing kuman sé ayumper itu, séra iméma'o ing kamesé-meséaan.

¹⁰ Em peangé-angénku tana'i: kamu makaanuo ing kakailekan, ang karoro'an i makalukut makan in sama'na an tampa pengaapo'an a sé opo-opo'. Wo kamu kaséréan i esa tou sé ra'ipé' keter em paémanen, ang karoro'an i makalukut makan in sama'na am bitu, en itu iméma'o sia mekiit kuman ing kakanen si ayumpero a sé opo-opo' itu.

¹¹ Wo ampa'paan ing kakailekan iow, iméma'o si tou ra'ipé' keter em paémanen itu icasélé'kow, en ulitna si Kristus imaté torona ka'i sia.

¹² Sa kamu méma' ing kamesé-meséaan tanu siitu a sé poo-poow iow esa paémanen, kamu iméla'o in até weresi éra sé ra'ipé' keter em paémanen, icamu iméma'o ing kamesé-meséaan an dior i Kristus.

¹³ Anaé, sa eng kakanen si ayumpero a sé opo-opo' itu iméma'ke taré si poowku esa paémanen méma' ing kamesé-meséaan, ra'io kiimku ka'i kuman in sama'na, sa ampa'paan yaku akar si poowku esa paémanen lumepok ang kamesé-meséaan. En itu meputéo aku mamualike' watu pasangkilan ai sia.