YEHEZKIEL 4 - Tanou Moonsoi Timugon

Yehezkiel nambaal ra lakonan ru pagawangan ra Jirusalim

¹ Indagu i Aki Kapuuno', “Okou ulun mapandai matoi, alapo' rondo' batu bata am pabantaa' giu' ra saang muno. Lukiso' bandar Jirusalim giu' ra ralimbou ru batu bata no.

² Koson boo ra tatandu' ru pagawangan ra bandar no, pambaal ra parit, tana' pinabujuk, pangkiman am tataun-tataun pomopok giu' ra liput ru batu bata no.

³ Alapo' rondo' paliuk basi' am potolorogo' paliuk no koson ra timbok ru lolot muno am bandar no. Tingkuang no ra tampilon ra bandar no ilain koson okou magawang raginio. Baal raginio masauk ra tatandu' ra tayar ru bansa' ru Israil.

^4-5 Kopongo raginio langan tampilon ra kait muno. Palumpaan Ku kasalaan ru bansa' ru Israil no rirun. Buoi 390 ngoorou lumangan kou ra giu' no am maimbolo' sabap ra kasalaan nilo. Songorou kou lumuya' tatandu' ru sambilor ukuman ra tayar ru bansa' Israil.

⁶ Kopongo raginio pataigingo' inan muno am luya' ra tampilon pamiris muno. Mili' no ra ukuman koson kasalaan ru mamagun ru Jiuda buoi apat ngoopor ngoorou, songorou tatandu' ru sambilor ra ukuman risilo.

⁷ Ilai' noyo pagawangan ra Jirusalim am paakango' gonggom muno am raguo' manala' ra bandar no.

⁸ Bangkilon Tokou maa' raginio kalo lumukiat inan muno ra pamiris kapoam ra kait saboi pagawangan no mopongo.

⁹ Raino alapo' gandum, barli, kasang malia', kasang polong, sekoi am gandum maumok kaga'. Palauko' ngaangai' no am pambaal ra ruti'. Ginio noyo akanon muno buoi 390 ngoorou ra okou lumangan tampilon ra kait muno.

¹⁰ Iowon kou mangakan ra 230 ngagram ruti' songorou, am akanon no musiti' maukop saboi ra orou susuab.

¹¹ Timug inumon muno pana sama' noyo ra ruo ngasangkir songorou.

¹² Pampaang ra apui mamakai ra ampangara' ru ulun koson ra pansikit. Solobo' ruti' no ra rasawat ru apui no am akano' ruti' no giu' ra saang ru ngaangai' ulun.”

¹³ Indagu Tuhan, “Koon raginio noyo ralan ru ulun ru Israil mangakan ra akanon ondo' kalo iowon ru Taurat, kaa' pantutuliaron Ku ilo ra pagun-pagun ra bokon.”

¹⁴ Kaa' taam aku, “Pai' koon raginio, iou Tuhan Raja'! Kalo igondo' aku pampajaka' ra inan. Intor ra boborok kalo igondo' aku pangakan ra kual intor bibiag ondo' matoi toojo, kapoam kual intor ra bibiag ondo' sinaam ru bibiag masigo. Kalo igondo' aku pangakan ra akanon ondo' karaan ra ampangara'.”

¹⁵ Ginio ra indagu i Aki Kapuuno', “Iou noyo, paaligon mu tatai' ru sapi' ra ampangara' ru ulun koson pangansak ra ruti'.”

¹⁶ Indagu Io poyo, “Okou ulun mapandai matoi, langgain Ku mampalutu' ra ruti' koson ra Jirusalim. Mamagun ru bandar no magalabo am maimamang paat ra ilo manuku' ra akanon am timug inumon nilo.

¹⁷ Makayaan ilo ra ruti' am timug, malawo guang nilo, am pupus no matoi sabap ra tula nilo.”