YEHEZKIEL 16 - Tanou Moonsoi Timugon

Jirusalim ondo' kalo gumagaya'

¹ Indagu poyo Tuhan raki',

² “Okou ulun mapandai matoi, pakitono' binaal ru Jirusalim ondo' makauyuyu' no riso.”

³ Nanusub Tuhan Raja' raki' mampasaboi ra tanou ti ra Jirusalim, “Okou inanak giu' ra tana' ru Kanaan. Ama' muno ulun ru Amori am ina' muno ulun ru Git.

⁴ Paat ra okou inanak, kolondo' osoi pana nongotob ra pusor muno kapoam nampariu' rirun kapoam nangisas rirun ra usi' kapoam linilinsuran ra konoon.

⁵ Kolondo' osoi pana makaasi' rirun saboi masaga' mambaal ra baal-baal raginio rirun. Paat ra okou inanak, kolondo' osoi pana motogom rirun. Pinatiran kou giu' ra padang.

⁶ “Kopongo raginio nansail Aku am nakakito rirun nambilor ralalom ru raraa' muno galama', kaa' kalo pinoloso Tokou matoi.

⁷ Inalungan Tokou saboi kou nasukor koson ra tinanom ondo' malabung. Moonsoi tuu' muno am masawat, am nasauk ra ruandu' mamulok. Titi' muno moonsoi am abuk muno timinuu' noyo, kaa' okou lakat poyo nagibabaang.

⁸ “Paat ra Aku nansail poyo, nakaliman Aku ra paat muno koson makakubayau nasaboi noyo. Sinilian Ku inan muno ondo' nagibabaang no ra sukub Kuno. Nambantu' Aku motogom rirun am nambaal Aku ra nabantuan paguatan rirun maa' raginio okou masauk ra Aku tatangan.” Koon raginio noyo ragu ru Tuhan Raja'.

⁹ “Kopongo raginio nangalap Aku ra timug am nambagu' ra raraa' ondo' soroi ra inan muno. Linuitan Ku kungkung muno ra umau jaitun.

¹⁰ Pinambayang Tokou ra bayang mokoondo' ra sulam, kasut kungkung ondo' moonsoi kaga', sigal ru ulu intor ra konoon linon am sukub sutera.

¹¹ Pinonggolong am sinisigot Tokou.

¹² Inanian Tokou ra sinsing ra arung, anting-anting am karaun ondo' moonsoi.

¹³ Limpor muno binaal intor ra mas am pirok, am bayang muno binaal intor ra linon, sutera am konoon mokoondo' ra sulam. Nangakan kou ra ruti' ondo' binaal intor ra gandum moonsoi kaga', naratok ra ruu' ru maningot am umau jaitun. Kinantalur muno suai toojo, saboi kou nasauk ra ruandu' mapasau.

¹⁴ Sabap ra kinantalur muno, nauligan kou kaga' ra gino ngai' ru bansa'. Aku noyo ondo' nangkinibit rirun mantalur koson raginio!” Koon raginio noyo ragu ru Tuhan Raja'.

¹⁵ “Kaa' sala' boo pinamakuan muno ra kinantalur muno am kinoonsoi ru inggalan muno. Riminulug kou ra osoi ayuk ondo' mansail.

¹⁶ Binungaan mu intok sambayangan muno ra bayang muno, am koson ra ruandu' mantalan ra inan pinataak mu inan muno ra moonong ulun.

¹⁷ Namakai kou ra mas am pirok ondo' pinataakan Kuno koson mambaal ra sinungkalalaing ru ungkuyon, am nansawa' kou ra sinungkalalaing no.

¹⁸ Inalap mu bayang-bayang mokoondo' ra sulam ondo' pinataakan Kuno rirun am pinabayangan mu ginio ra sinungkalalaing. Sinungkalalaing no nampataakan muno ra umau jaitun am kaminyan ondo' inapu muno intor Raki'.

¹⁹ Inanian Tokou ra akanon moonsoi kaga', iono gandum, umau jaitun am ruu' ru maningot, kaa' ngaangai' no sinauk mu koson ra taak simbalui koson mapabansuk ra guang ru sinungkalalaing. Aku, Tuhan Raja' nakaindagu noyo.

²⁰ “Anak pana ra ungkuyon am ruandu' ondo' inanak muno Raki', pinataak mu ra sinungkalalaing. Kalo poyo kia sama' ra okou kalo giminagaya' Raki'?

²¹ Kua musiti' kou mampagaau ra anak-anak Kuno am pataakon ilo koson ra taak simbalui ra sinungkalalaing?

²² Buoi ru kaayagan muno koson ra ruandu' mantalan ra inan ondo' makauyuyu' no, kalo igondo' kou pangkara' paat ra okou boborok, bulintok okou nagibabaang am nambilor ralalom ru raraa' muno galama'.”

Kaayagan ru Jirusalim koson ra ruandu' mantalan ra inan

²³ Indagu Tuhan Raja', “Aibui boo rirun! Totopot ra aibui! Suai poyo ra ngaangai' ru kalaatan muno,

²⁴ nambaal kou niayuk ra intok koson sumamba ra sinungkalalaing am nantalan ra inan giu' ra igig ru ralan.

²⁵ Jinamalan mu kinantalur muno. Pinataak mu inan muno ra osoi ayuk ondo' mansail ra giu' no, am kalo langgain mu mantalan ra inan.

²⁶ Nantalan kou ra inan ra paginggaar muno ulun ru Misir ondo' masasawo no. Nantalan kou ra inan koson mampasangit Raki'.

²⁷ “Kaa' raino mimbuor Aku koson mangukum rirun am mangalap ra barakat ondo' pinataak Kuno rirun. Pinataak Tokou no ra ulun ru Palistin ondo' masisang rirun am niayuk majamalan ra binaal muno ondo' makauyuyu' no.

²⁸ “Sabap ra kalo najala' kou ra bokon no, inilou mu ulun ru Asyur. Nantalan kou ra inan, kaa' ulun ru Asyur kalo nakajala' rirun.

²⁹ Okou niayuk nasauk ra ruandu' mantalan ra inan ra ulun ru Babilonia, ulun-ulun mantalan no, kaa' ilo pana kalo nakajala' rirun.”

³⁰ Indagu Tuhan Raja', “Ngaangai' binaal muno koson ra binaal ru sangulun ruandu' mantalan ra inan ondo' kalo mapandai mauyu'.

³¹ Giu' ra moonong ralan nambaal kou ra intok koson sumamba ra sinungkalalaing am mantalan ra inan. Binaal mu ginio sala' ka mokoowot ra ruit koson ra ruandu' mantalan ra inan.

³² Okou koson ra andu' ondo' sumaindang ra ralaki am nansawa' ra ungkuyon ra bokon.

³³ Sangulun ruandu' mantalan ra inan nakaapu ra bayaran, kaa' nangani' kou ra tangguang ra ngaangai' kubayau muno. Nangambi' kou ra ulun intor ra ati ayuk intok maa' raginio marulug rirun.

³⁴ Okou ti ruandu' mantalan ra inan ondo' suai intor ra bokon! Kolondo' osoi pana nampajajal rirun sumauk ra ruandu' mantalan ra inan. Kalo binayaran kou, kaa' okou ondo' nambayar. Totopot okou ti sala' toojo!”

Ukuman ri Aki Kapuuno' tayar ru Jirusalim

³⁵ Okou Jirusalim, mantalan kou ra inan! Rongogo' noyo ragu ru Tuhan.

³⁶ Koon raginio noyo ragu ru Tuhan Raja', “Inalus mu bayang, am koson ra ruandu' mantalan ra inan pinataak mu inan ra kubayau-kubayau muno am ngaangai' sinungkalalaing muno ondo' makauyuyu' no. Namatoi kou ra anak muno am nampataak risilo koson ra taak simbalui ra sinungkalalaing.

³⁷ Ginio ra tinimung Ku ngaangai' ondo' ragili kubayau muno – ondo' kalaayan muno am niayuk ondo' kasisangin muno. Nanusub Aku risilo lumibung rirun, am aluson Ku bayang muno maa' raginio makito nilo inan muno ondo' nantilagas.

³⁸ Mangukum Aku rirun sabap ra pansawaan am niayuk pampatayan ondo' binaal muno. Sabap ra totopot Aku sumangit, ukumin Tokou ra matoi!

³⁹ Pataakon Tokou risilo, am lunsayon nilo intok-intok pantalanan muno ra inan am niayuk sumamba ra sinungkalalaing. Gaawon nilo bayang am limpor muno, saboi magibaang kou.

⁴⁰ “Manusuk ilo ra ulun masuang maa' raginio momobol rirun, am monotok ra inan muno ra ilang.

⁴¹ Solobon nilo baloi-baloi muno am mompoloso ra ruandu'-ruandu' makakito ra okou ukumin. Langgain Ku binaal muno ra mantalan ra inan no. Kalo boo mangani' Kou ra tangguang ra kubayau-kubayau muno.

⁴² Aku pana mokororo' am sangit Kuno sumalui. Kalo boo sumangit kapoam maingot Aku.

⁴³ Nalilianan mu ati kulaan pinamakuan Kuno rirun paat ra okou boborok ayuk poyo, am napasingkual kou ra sangit Kuno ra ngaangai' binaal muno. Ginio sabap no ra musiti' kou mansaan ra ukuman no. Kua kia pansawa' kou poyo malupus nambaal ra ngaangai' baal ra bokon ondo' makauyuyu' no?” Tuhan Raja' minindagu noyo.

Koson ra ina' nano, koson raginio niayuk anak nano

⁴⁴ Indagu Tuhan, “Ulun ondo' mamakai ra ragu panginuuyan ti rirun Jirusalim: ‘Koson ra ina' nano, koson raginio niayuk anak nano.’

⁴⁵ Sotopot no okou noyo anak ru ina' muno. Masisang ina' muno ra ralaki am anak-anak nano. Koson kou ra pabukat-pabukat ruandu' muno ondo' masisang ra ralaki am anak nilo. Ina' muno ulun ru Git am ama' muno ulun ru Amori.

⁴⁶ “Maayo ruandu' muno iono Samaria giu' ra tampilon ralayo am pekan-pekan ra mamaar riso. Boborok ruandu' muno Sodom giu' ra tampilon rabugus am pekan-pekan ra mamaar riso.

⁴⁷ Kalo majala' kou tumilu risilo ondo' makauyuyu' no. Sangkinolor ayuk am okou pana manampaliso ra malaat poyo intor risilo.”

⁴⁸ “Sabap ra Aku, i Aki Kapuuno' ondo' maayag,” ragu ru Tuhan Raja', “boborok muno, Sodom am pekan-pekan ra mamaar riso, kalo poyo igondo' nambaal ra kalaatan ondo' binaal muno nababaya' ra pekan-pekan giu' ra mamaar muno.

⁴⁹ Liminimbau Sodom am anak nano sabap ra masuang akanon nilo am maayag ra moonsoi am mamimio. Kaa' kalo nangindangan ilo ra ulun musikin am mapagon.

⁵⁰ Liminimbau ilo am bambalingatan, am niayuk nambaal ra baal-baal ondo' kasisangin Kuno. Ginio ra pusoon Ku ilo, koson ra ondo' napandayan muno.

⁵¹ “Tula ru Samaria kalo saboi sampiruo intor ra tula muno. Binaal muno makauyuyu' poyo intor ra ngaangai' binaal nano. Sabap ra totopot malaat kou, ilain koson Samaria am Sodom kolondo' sala amon ru pogondoon rirun.

⁵² Raino nansaan kou kalalaat ra uyu'. Maayo poyo tula muno ka tula ru pabukat-pabukat muno. Ilain ayuk koson ilo kolondo' sala amon ru pogondoon rirun. Musiti' kou mauyu' am mansaan ra uyu', sabap ra pabukat-pabukat muno ilain mapasau.”

Sodom am Samaria patapulion

⁵³ Indagu Tuhan ra Jirusalim, “Patapulion Ku kalangkayaan ru Sodom am pekan-pekan ra mamaar riso; koon niayuk ra Samaria am niayuk pekan-pekan ra mamaar riso. Okou pana saukon Ku ra langkaya'.

⁵⁴ Mauyu' kou ra inan muno galama'. Sabap ra baal muno ondo' makauyuyu' no, pabukat-pabukat muno makaliman ra mapara' bonsoi ru baal nilo.

⁵⁵ Masauk ilo ra langkaya' saguli', am okou am niayuk pekan-pekan muno pana patapulion.

⁵⁶ Sala' ka kia igondo' kou pakakurit ra Sodom paat ra okou lakat poyo malilimbau ragili,

⁵⁷ am kalaatan muno kalo poyo nakatabual? Raino nogondo' kou koson riso; nasauk kou ra kukuritin ru ulun ru Idom, Palistin, am pagun-pagun ra mamaar ondo' masisang rirun.

⁵⁸ Raino musiti' kou maimbolo' kinibit ru binaal muno ondo' malaat am makauyuyu'.” Tuhan nakaindagu noyo.

Nabantuan ondo' mantilayun

⁵⁹ Indagu Tuhan Raja', “Kalo namimii' pamakuan Kuno rirun, sabap ra liminungkang kou ra bantu'-bantu' muno am niayuk inanggal mu nabantuan ondo' binaal Kuno rirun.

⁶⁰ Kaa' suguton Ku nabantuan ondo' binaal Kuno rirun paat ra okou mamulok ayuk poyo. Baalon Ku nabantuan ondo' masauk ra sabuoi-buoi no rirun.

⁶¹ Makara' mu boo binaal muno, am mauyu' paat ra pabukat-pabukat muno muli' rirun. Iowon Ku ilo masauk koson ra anak-anak muno kabalu' pana baal raginio kalo nakaaya' ralalom ru nabantuan Kuno rirun.

⁶² Talimbaguin Ku nabantuan Kuno rirun, am makapandai kou boo ra Aku noyo Tuhan.

⁶³ Ampunon Ku ngaangai' kasalaan muno, kaa' karaan mu boo ginio am totopot mauyu' saboi kalo baani kou mangukab ra kabang.” Tuhan Raja' nakaindagu noyo.