YEHEZKIEL 13 - Tanou Moonsoi Timugon

Ragu manala' intor ra nabi ungkuyon ra siminalu

¹ Indagu Tuhan raki',

² “Okou ulun mapandai matoi, sawayo' ra malasang nabi-nabi ru Israil ondo' mindagu ra ragu manala' ondo' binaal nilo ayuk galama'. Susubo' ilo rumongog ra ragu ru Tuhan.”

³ Koon ragitio noyo ragu ru Tuhan Raja', “Aibui boo ra nabi-nabi sasambungon no! Ginuang nilono noowot intor ra kakaraan nilo galama' am pinaintalang risilo kalo motopot.

⁴ Akau ulun ru Israil, akau nabi ra kolondo' onong; ilo koson ra taani ondo' minayan giu' ra tatanga' ru nalunsai ra bandar.

⁵ Kalo nagalung ilo ra intok-intok ondo' napuut timbok no, kapoam mambaal saguli' ra timbok-timbok no, saboi ra Israil kalo maampin paat ra masauk pangayawan ra orou ra Aku, Tuhan matong mangukum.

⁶ Pinaintalang risilo no kalo motopot am ondo' inala' nilo pana kalo motopot. Mangiou ilo ra mampasaboi ra ragu Kuno, kaa' kalo nanusub Aku risilo. Kaa' malansan ilo maa' raginio ondo' inala' nilono masauk.

⁷ Indagu Aku risilo: Pinaintalang ramuyun no kalo motopot, am ondo' inala' mino kalo motopot. Kamin ra ngaangai' no ragu Kuno, kaa' kalo minindagu Aku ramuyun!”

⁸ Ginio ra indagu Tuhan Raja' risilo, “Sabap ra ragu-ragu mino kalo motopot am pinaintalang ramuyun no kalo motopot, anggalon Takamin.

⁹ Ukumin Takamin, nabi-nabi ondo' nakakito ra pinaintalang ra kalo motopot am niayuk nampasaboi ra ondo' inala' ra mampalayau. Kalo mababaya' kau ra ulun Kuno paat ra ilo mansusunur; inggalan mino kalo tulisin ra ralalom inggalan ru ngaangai' ulun ru Israil, am kalo makauli' kau ra intok mino galama'. Bagu no makapandai kau ra Aku noyo Tuhan Raja'.

¹⁰ “Nabi-nabi no nampalayau ra ulun Kuno ra minindagu ra ngaangai' no moonsoi ayuk, kaa' sotopot no ngaangai' no kalo moonsoi! Ulun Kuno nambaal ra timbok ondo' kalo maikang, nabi-nabi no pana minatong am pinulak ginio ra kapur.

¹¹ Balai' nabi-nabi no ra timbok nilo mapuut. Paratuon Ku rasam maawas. Timbok no tiwon ru bagiu' mapuor am malumpa' ru rasam batu.

¹² Mapuut boo timbok no, am mangkuot ulun ramuyun ra atan onong ru timbok no kinapulak ra kapur.”

¹³ Koon ragitio noyo ragu ru Tuhan Raja', “Paat ra Aku sumangit kaga', mamparatong Aku ra bagiu' mapuor, rasam maawas am rasam batu koson mamuso ra timbok no.

¹⁴ Kuayan Kuno koson mampalunsai ra timbok ondo' kinapuran nilo. Tutukon Ku ginio saboi batu maatang nano makito. Timbok no malunsai am mamatoi ramuyun ngaangai'. Bagu no moonong ulun makapandai ra Aku noyo Tuhan.

¹⁵ “Timbok no am ilo ondo' nangapur no makaliman ra kinoporos ru sangit Kuno. Bagu no balain Takamin ra timbok no am ulun nangapur no napuso,

¹⁶ iono nabi-nabi ondo' minindagu ra ragu manala' ra Jirusalim moonsoi, kaa' sotopot no kalo!” Koon raginio noyo ragu ru Tuhan Raja'.

Ragu manala' intor ra nabi ruandu' ra siminalu ayuk

¹⁷ Indagu Tuhan, “Okou ulun mapandai matoi, ilai' ruandu'-ruandu' ondo' siminalu ra nabi ra gino ngai' ru bansa' muno. Kalasango' sawai muno risilo,

¹⁸ am posoboyo' noyo atan ondo' paraguon Kuno, Tuhan Raja' risilo, ‘Aibui boo ramuyun! Nambaal kau ra golong jimat am rundung gimbaran, maa' raginio makuasa' min kaayagan ru ulun bokon. Gumogot kau manguasa' ra kaayagan patayan ru ulun Kuno koson ra kaatangan min galama'.

¹⁹ Magasab kau Raki' ra saang ru ulun Kuno koson makaalap ra sogonggom barli am kukula' ruti'. Ulun ondo' kalo musiti' matoi, potoyon min am ulun ondo' kalo musiti' maayag, polosoon min maayag. Akau pana nagabau ra ulun Kuno am mangintopot ilo ramuyun.’ ”

²⁰ Ginio ra indagu Tuhan Raja', “Masisang Aku ra golong jimat ondo' pakayon min koson manguasa' ra kaayagan patayan ru ulun bokon. Bungkayuton Ku golong no intor ra kalindu' mino am mampalabus ra ulun ondo' kinuasa' min.

²¹ Rilakon Ku rundung mino am palabuson Ku ulun Kuno intor ra kuasa' mino ra sabuoi-buoi no. Bagu no makapandai kau ra Aku noyo Tuhan.

²² “Nabaya' ra abau mino kinalawo min guang ru ulun moonsoi, ondo' kalo masaga' Ku jamarin. Nangunsu' kau ra ulun malaat maa' raginio marayus mambaal ra kalaatan saboi kalo mabayag ilo.

²³ Raino pinaintalang ra kalo motopot am ondo' ragu inala' mino ondo' nampakalayau no napupusan noyo. Tatanga' Aku mamayag ra ulun Kuno intor ra kuasa' mino maa' raginio makapandai kau ra Aku noyo Tuhan.”