YEHEZKIEL 12 - Tanou Moonsoi Timugon

I Yehezkiel koson ra ulun nagiru'

¹ Indagu Tuhan raki',

² “Okou ulun mapandai matoi, minayan kou ra tatanga' ru ulun gumuor. Mokoondo' ilo ra mato, kaa' kalo makakito; mokoondo' ilo ra talingo, kaa' kalo mokorongog, sabap ra masaga' ilo gumuor.

³ Ginio ra, okou ulun mapandai matoi, kumoso' kuliamos muno ralalom rondo' kuntil koson ondo' binaal ru sangulun nagiru', am ugar no ra kalo poyo molondom. Polosoo' ulun makakito rirun mangiruan ra bandar am mongoi ra intok ra bokon. Maaru' lair ulun-ulun gumuor no makakito rirun.

⁴ Paat ra lakat poyo matawang, kumoso' kuliamos ralalom rondo' kuntil koson ibiton mongoi ra intok pamatiran, am polosoo' ilo makakito rirun mambaal raginio. Polosoo' ilo makakito rirun mangiruan ra bandar paat ra mamai', koson okou tatanga' sumuku' ra intok pamatiran.

⁵ Tatanga' ilo magilong rirun, popolo' timbok ru baloi muno maa' raginio makaluang, am ibito' noyo kuntil muno mingkual intor ra luang no.

⁶ Polosoo' noyo ilo magilong rirun mansaan ra kuntil muno am mingkual mongoi ra intok ondo' molondom ra bulos sinilian maa' raginio kalo makito mu ralan bayaan. Binaal muno masauk ra pangkaraan ra ulun ru Israil.”

⁷ Binaal ku atan ondo' nanusuban ru Tuhan. Paat orou raginio mangkumos aku ra kuliamos kuno ralalom ru rondo' kuntil koson ondo' binaal ru sangulun nagiru'. Paat ra mamai' no, orou lumondom galing, kalindu' kutu pinomopol ku ra timbok ru baloi ku saboi makaluang, am miningkual aku minaya' ra luang no. Tatanga' ulun magilong, nansaan aku ra kuntil kuno am iruani' intok raginio.

⁸ Suabon no mindagu Tuhan raki',

⁹ “Okou ulun mapandai matoi, ulun-ulun gumuor no mangkuot rirun intor ra baal ondo' tatanga' muno baalon,

¹⁰ balai' ilo ra atan ondo' paraguon Kuno, Tuhan Raja' risilo. Tanou ti tayar ru raja' ondo' mamarinta giu' ra Jirusalim am tayar ru ngaangai' ulun ondo' minayan ra giu'.

¹¹ Balai' ilo ra binaal muno tatandu' ru baal ondo' masauk risilo. Masauk ilo ra ulun nagiru' am ulun rinakop.

¹² Raja' nilo mansaan ra kuntil nano paat ra rondom am magiru' maya' ra luang ondo' binaal nilo giu' ra timbok. Siliin ru raja' bulos nano saboi kalo makito ati angayan nano.

¹³ Kaa' paatangon Ku pamalandak koson mamparakop ra raja'. Aku boo magibit riso mongoi ra bandar Babil, am matoi io ra kalo makakito ra bandar no.

¹⁴ Ngaangai' ulun giu' ra istana nano pantutuliaron Ku, ulun-ulun mambibilin am ulun magalung ayuk riso. Ilowon am potoyon Ku ilo.

¹⁵ Pantutuliaron Ku ilo ra gino ngai' ru bansa'-bansa' ra bokon giu' ra pagun ra bokon, bagu no makaliman ilo ra Aku noyo Tuhan.

¹⁶ Polosoon Ku santayaran boborok intor risilo maayag intor ra pangayawan, bitilan am maruol tumapik maa' raginio giu' ra gino ngai' ru bansa'-bansa' ra bokon no, makaliman ilo ra mapara' laat ru binaal nilo, am mangiou boo ra Aku noyo Tuhan.”

I Yehezkiel tatandu' ru kalaanan ru mamagun

¹⁷ Indagu Tuhan riso,

¹⁸ “Okou ulun mapandai matoi, ponontol no paat ra okou mangakan, am ponontol no ra malaa' paat ra okou manginum.

¹⁹ Balai' ngaangai' bansa' ra gitio noyo ragu ru Tuhan Raja' ra mamagun ru Jirusalim ondo' lakat poyo minayan giu' ra pagun nilo: Monontol ilo paat ra ilo mangakan, am monontol ra malaa' paat ra ilo manginum. Pagun nilo mapuso am masauk ra kolondo' tutuu' sabap ra ngaangai' ulun minayan ra giu' minanggal ra ukum.

²⁰ Bandar-bandar ondo' raino nososok ra ulun mangapuso, am pagun no masauk ra tana' kaagisan. Paat raginio noyo bagu no makaliman ilo ra Aku noyo Tuhan.”

Bala' ru Tuhan musiti' masauk

²¹ Indagu Tuhan raki',

²² “Okou ulun mapandai matoi, kua kia ra ulun ru Israil manabit ayuk ra panginuuyan ragitio: ‘Orou nakasail, kaa' ragu manala' kalo masauk’?

²³ Ginio ra balai' ilo ra Aku, Tuhan Raja' nangani' ra taam ragitio: Pusoon Ku panginuuyan no saboi kalo boo raguon giu' ra Israil. Kaa' balai' ilo ra nasaboi noyo paat ra ragu-ragu manala' no masauk.

²⁴ Giu' ra Israil kolondo' boo pinaintalang ondo' kalo motopot kapoam ragu manala' ondo' mampalayau.

²⁵ Aku, Tuhan mindagu ra ulun ru Israil, am ngaangai' ondo' raguon Kuno musiti' masauk, ra kalo boo paginjul-ginjul. Akau ulun gumuor, paat ra okou maayag, suguton Ku atan ondo' pinakara' Kuno ramuyun. Aku, Tuhan Raja', nakaindagu noyo.”

²⁶ Indagu Tuhan raki',

²⁷ “Okou ulun mapandai matoi, indoson ru ulun ru Israil ra pinaintalang am ragu manala' muno intor ra orou matong ondo' mabuoi poyo.

²⁸ Ginio ra balai' ilo ra Aku, Tuhan Raja' minindagu: Ngaangai' ondo' raguon Kuno musiti' masauk, ra kalo boo paginjul-ginjul. Aku, Tuhan Raja' nakaindagu noyo!”