UNTABAN 29 - Tanou Moonsoi Timugon

Taak paat ra Pangiantakan ra Bilor Bagu

¹ Paat ra orou kasaa' ra sila' katulu', akau musiti' tumimung ra sumambayang; pai' noyo pangandoi ra maagat. Paat ra orou raginio bujung-bujung musiti' samputin.

² Papataak ra taak simbalui koson mapabansuk ra guang ru Tuhan. Taak simbalui no iono sanginan sapi' gawayan mamulok, sanginan domba gawayan am tulu' ngainan domba gawayan ondo' umur no sambilor. Ngaangai' no kalo najamaran. Owou ru lisun ru taak simbalui no mapabansuk ra guang ru Tuhan.

³ Papataak niayuk ra taak simbalui koson paringkuanangan, sumugut ra atan ondo' inaru', iono taak no tapung moonsoi kaga' latakin ra umau jaitun: talu ngakilogram tapung ra tayar ru sapi' gawayan, ruo ngakilogram tayar ru domba gawayan,

⁴ am sakilogram ra tayar ru moonong sanginan anak domba gawayan.

⁵ Papataak noyo ra sanginan kambing gawayan ra tayar ru taak simbalui koson mangampun ra tula. Koon raginio noyo akau mambaal ra upacara pamasawan ra tayar ru ulun.

⁶ Ngaangai' ru taak simbalui no paruangon ra taak simbalui koson mapabansuk ra guang ru Tuhan, ondo' pataakon pabayaan ra taak simbalui koson paringkuanangan, paat ra orou kasaa' ra moonong sila', am niayuk paruangon ra taak simbalui ra moonong orou ondo' pataakon pabayaan ra taak simbalui koson paringkuanangan am taak simbalui wain. Owou ru taak akanon ti mapabansuk ra guang ru Tuhan.

Taak paat ra Orou Pangampunan ra Tula

⁷ Paat ra orou koopor sila' katulu', akau musiti' tumimung ra sumambayang. Paat ra orou raginio akau musiti' mampali am pai' pangandoi.

⁸ Papataak ra taak simbalui koson mapabansuk ra guang ru Tuhan. Taak simbalui no iono sanginan sapi' gawayan, sanginan domba gawayan am tulu' ngainan anak domba gawayan ondo' umur no sambilor. Ngaangai' no kalo najamaran. Owou ru lisun ru taak simbalui no mapabansuk ra guang ru Tuhan.

⁹ Papataak ra taak simbalui koson paringkuanangan, sumugut ra atan ondo' inaru', iono tapung moonsoi kaga' latakin ra umau jaitun: talu ngakilogram ra tayar ru sapi' gawayan, ruo ngakilogram ra tayar ru domba gawayan,

¹⁰ am sakilogram ra tayar ru moonong sanginan anak domba.

¹¹ Papataak niayuk ra sanginan kambing gawayan ra tayar ru taak simbalui koson mangampun ra tula ru ulun, pabayaan ra kambing gawayan ondo' pataakon ra tayar ru upacara pamasawan ra tayar ru ulun, am taak simbalui moonong orou pabayaan ra taak simbalui koson paringkuanangan am taak simbalui wain ondo' pataakon paat ra orou raginio.

Taak paat ra Pangiantakan Mangkalukub ra Raun

¹² Paat ra orou koopor am limo sila' katulu', akau musiti' tumimung ra sumambayang am pai' pangandoi. Akau musiti' mangiantak ra pangiantakan raginio buoi katuluan koson mangurumat ra Tuhan.

¹³ Paat ra orou ra kasaa' no, pataako' noyo taak simbalui koson mapabansuk ra guang ru Tuhan. Taak simbalui raginio iono mopor am talu ngainan sapi' gawayan, ruo ngainan domba gawayan am mopor am apat ngainan anak domba gawayan ondo' umur no sambilor. Ngaangai' no kalo najamaran. Owou ru taak akanon no mapabansuk ra guang ru Tuhan.

¹⁴ Pataako' niayuk taak simbalui koson paringkuanangan, sumugut ra atan ondo' inaru', iono taak simbalui raginio am tapung moonsoi kaga' latakin ra umau jaitun: talu ngakilogram gandum ra tayar ru moonong sanginan sapi' gawayan, ruo ngakilogram ra tayar ru moonong sanginan domba gawayan,

¹⁵ am sakilogram ra tayar ru moonong anak domba gawayan pabayaan ra taak simbalui wain ondo' inaru'.

¹⁶ Suai raginio pataako' noyo sanginan kambing gawayan ra tayar ru taak simbalui koson mangampun ra tula. Taak simbalui raginio am paruangon ra taak simbalui ra moonong orou pabayaan ra taak simbalui koson paringkuanangan am taak simbalui wain ondo' inaru'.

¹⁷ Paat ra orou ra karuo no, pataako' noyo mopor am ruo ngainan sapi' gawayan mamulok, ruo ngainan domba gawayan am mopor am apat ngainan anak domba gawayan ondo' umur no sambilor. Ngaangai' no kalo najamaran.

^18-19 Pataako' noyo taak-taak simbalui raginio pabayaan ra ngaangai' taak simbalui ra bokon ondo' inaru' ra tayar ru orou ra kasaa'.

²⁰ Paat ra orou ra katalu, pataako' noyo mopor am rondo' ngainan sapi' gawayan mamulok, ruo ngainan domba gawayan am mopor am apat ngainan anak domba gawayan ondo' umur no sambilor. Ngaangai' no kalo najamaran.

^21-22 Pataako' noyo taak-taak simbalui raginio pabayaan ra ngaangai' taak simbalui ondo' inaru' ra tayar ru orou ra kasaa'.

²³ Paat ra orou ra kaapat, pataako' noyo mopor ngainan sapi' gawayan mamulok, ruo ngainan domba gawayan am mopor am apat ngainan domba gawayan ondo' umur no sambilor. Ngaangai' no kalo najamaran.

^24-25 Pataako' noyo ra taak-taak simbalui raginio pabayaan ra ngaangai' taak simbalui ra bokon ondo' inaru' ra tayar ru orou ra kasaa'.

²⁶ Paat ra orou ra kalimo, pataako' noyo siam ngainan sapi' gawayan mamulok, ruo ngainan domba gawayan, am mopor am apat ngainan anak domba gawayan ondo' umur no sambilor. Ngaangai' no kalo najamaran.

^27-28 Pataako' noyo taak-taak simbalui raginio pabayaan ra ngaangai' taak simbalui ra bokon ondo' inaru' tayar ru orou ra kasaa'.

²⁹ Paat ra orou ra koonom, pataako' noyo balu' ngainan sapi' gawayan mamulok, ruo ngainan domba gawayan, am mopor am apat ngainan anak domba gawayan ondo' umur no sambilor. Ngaangai' no kalo najamaran.

^30-31 Pataako' noyo taak-taak raginio pabayaan ra ngaangai' taak simbalui ra bokon ondo' inaru' ra tayar ru orou ra kasaa'.

³² Paat ra orou ra katulu', pataako' noyo tulu' ngainan sapi' gawayan mamulok, ruo ngainan domba gawayan, am mopor am apat ngainan anak domba gawayan ondo' umur no sambilor. Ngaangai' no kalo najamaran.

^33-34 Pataako' noyo taak-taak raginio pabayaan ra ngaangai' taak simbalui ra bokon ondo' inaru' ra tayar ru orou ra kasaa'.

³⁵ Paat ra orou ra kabalu', akau musiti' tumimung ra sumambayang am pai' pangandoi ra maagat.

³⁶ Pataako' noyo taak simbalui koson mapabansuk ra guang ru Tuhan. Taak simbalui no am sanginan sapi' gawayan mamulok, sanginan domba gawayan am tulu' ngainan anak domba gawayan ondo' umur no sambilor. Ngaangai' no kalo najamaran. Taak akanon no mapabansuk ra guang ru Tuhan.

^37-38 Pataako' noyo taak-taak simbalui raginio pabayaan ra ngaangai' taak simbalui ra bokon ondo' inaru' ra tayar ru orou ra kasaa'.

³⁹ Ginio noyo aturan intor ra taak simbalui koson mapabansuk ra guang ru Tuhan, taak simbalui koson paringkuanangan, taak simbalui wain am niayuk taak simbalui makibarakat ra Tuhan. Ngaangai' taak simbalui no musiti' pataakon min ra Tuhan paat ra pangiantakan-pangiantakan ondo' inaru' noyo. Taak-taak simbalui raginio am paruangon ra taak simbalui ondo' pataakon min koson manugut ra nazar kapoam ondo' pataakon min ayuk toojo.

⁴⁰ Ngaangai' susuban ru Tuhan ri Musa no pinasaboi no ra ulun ru Israil.