UNTABAN 22 - Tanou Moonsoi Timugon

Nampiau raja' Moab ri Biliam

¹ Naparayus ulun ru Israil ra pangkiralanan am nangkim giu' ra tana' marata' ru Moab, tampilon ra sirangon ru Sungoi Jordan, giu' ra sandaup ru bandar Jiriko.

^2-3 Paat ra raja' Moab ondo' makainggalan ri Raja' Balak anak ri Jipor, nokorongog ra baal pinamakuan ru ulun ru Israil ra ulun ru Amori, am mapara' masuang kaga' ulun ru Israil no, nalaa' raja' am mamagun nano.

⁴ Indagu ulun ru Moab ra tingganai-tingganai ru ulun ru Midian, “Sampulalai ondo' maayo ti mangai' mataki' ra ngaangai' ondo' giu' ra libung takau, koson ra sapi' mangai' ra sakot giu' ra padang.” Ginio ra Raja' Balak no

⁵ nanusub ra ulun koson mampiau ri Biliam anak ri Bior, ondo' paat raginio minayan giu' ra Pitor mamaar ra Sungoi Iprat, giu' ra tana' Amau. Sinusub ilo nampasaboi ra bilin ri Balak ti ri Biliam, “Rondo' bansa' nakaratong noyo intor ra Misir, am raino ulun raginio soroi ra ngaangai' intok am niayuk mampajajou koson mampagaau ra tana' maiti.

⁶ Maikang ilo poyo intor ramon. Ginio sabap ra ratong noyo koson magulas risilo ra tayar kuno, maa' raginio gama' ru maalap mai ilo ra kala am mapagiru' risilo intor ra tana' maiti. Nakapandai aku ra ulun binarakat muno makabarakat, am ulun ulason muno maulas.”

⁷ Tingganai ru ulun ru Moab am ulun ru Midian pana nagibit ra bayaran ri Biliam maa' raginio makapagulas io ra ulun ru Israil. Pakaratong ilo ri Biliam, posoboyo' nilo bilin ru Raja' Balak no riso.

⁸ Kaa' indagu i Biliam, “Pombolong kano ragiti. Susuab no balain takamin ra bilin ru Tuhan raki'.” Pombolong boo tingganai-tingganai ru Moab no ra intok ri Biliam.

⁹ Ratong i Aki Kapuuno' ri Biliam am pangkuot, “Osoi kia ngaangai' ru ulun ragitio ondo' minayan rirun ti?”

¹⁰ Taam i Biliam, “Sinusub ilo ru Raja' Balak intor ra tana' Moab koson mambala' raki'

¹¹ ra rondo' bansa' nakaratong noyo intor ra Misir, am raino soroi bansa' no ra ngaangai' intok. Nakitaak Raja' Balak raki' magulas ra ulun no ra tayar riso, maa' raginio Raja' Balak no makaanggal am makapapagiru' risilo intor ra tana' nano.”

¹² Indagu i Aki Kapuuno' ri Biliam, “Pai' ongoi mabaya' risilo am pai' pagulas ra ulun ru Israil, sabap ra binarakat Ku noyo ilo.”

¹³ Iosusuab ru suabon no, tuumo' ri Biliam ulun-ulun sinusub ru Raja' Balak no am indagu, “Uli' kano, kalo mangiou Tuhan raki' mongoi mabaya' ramuyun.”

¹⁴ Ginio ra saguli' ilo ra Raja' Balak am pambala' riso ra kalo masaga' i Biliam matong mabaya' risilo.

¹⁵ Raja' Balak pana nanusub ra masuang poyo tingganai ondo' makapangkat masawat poyo intor ra sinusub galing no.

¹⁶ Minongoi ilo ri Biliam am nampasaboi ra bilin ru Raja' Balak ti riso, “Makitaak aku, ratong no am pai' impayi' kimait kutu.

¹⁷ Mambayar aku ra masuang kaga' am mangani' ra atan ayuk kitaakon muno. Ratong no am pagulas no ra ulun no ra tayar kuno.”

¹⁸ Kaa' taam i Biliam, “Kabalu' pana manaak Raja' Balak no raki' ra ngaangai' pirok am mas giu' ra istana nano, kalo makaanggal aku ra susuban ru Tuhan i Aki Kapuuno' ondo' sambaan kuno, am poyo ralalom ru baal boborok kaga' pana.

¹⁹ Kaa' moonsoi pombolong kau ragiti, koson ra binaal ru giali sinusub galing. Moogot aku makapandai ru lakat poyo makabilin Tuhan ondo' paraguon No raki'.”

²⁰ Paat ra rondom raginio indagu i Aki Kapuuno' ri Biliam, “Ngaangai' ulun no minatong noyo koson makitaak rirun mongoi mabaya' risilo. Ginio ra tampos no ra mongoi, kaa' baalo' ayuk ondo' raguon Kuno rirun.”

²¹ Iosusuab ru suabon no paatango' ri Biliam pelana ra kaladai nano, am ongoi nabaya' ra tingganai-tingganai ru Moab no.

I Biliam am kaladai nano

²² Siminangit i Aki Kapuuno' sabap minugar i Biliam. Liliwa' nangura' i Biliam ra kaladai nano, binaya' ru ruo ngaulun ulipon nano, minigor malaikat ru Tuhan ra tanga' ru ralan koson mongompong riso.

²³ Paat ra kaladai no nakakito ra malaikat ru Tuhan minigor ra giu' no liliwa' nananggal ra rondo' ilang, lisang kaladai no ra umo. Linamba' ri Biliam kaladai nano am inibit no saguli' ra ralan.

²⁴ Malaikat ru Tuhan no pana minigor ra tayar ru ralan ondo' mapisok, lolot ru ruo umo ru anggur am timbok batu ra sapapa' mansapapa'.

²⁵ Paat ra kaladai no nakakito ra malaikat ra giu' no, ingkiing kaladai no saboi nakasisip kalayam ri Biliam ra timbok. Igondo' poyo linamba' ri Biliam kaladai nano.

²⁶ Jalai poyo malaikat ru Tuhan am minigor ra intok ondo' mapisok poyo, saboi kolondo' ralan lumisang ra pamiris kapoam ra kait.

²⁷ Raino ti, paat ra kaladai no nakakito ra malaikat ru Tuhan, gabaa' ru kaladai no inan. Siminangit i Biliam am linamba' no boo kaladai no ra jujuga' nano.

²⁸ Tuhan pana nambaal boo ra kaladai no mapandai mindagu, am indagu boo kaladai no ri Biliam, “Atan kia kasalaan kutu? Kua kia lambaa' mu aku saboi intalu?”

²⁹ Taam i Biliam, “Ginio sabap ra inanja' mu aku! Amon ru makailang aku, maaru' potoyon tokou.”

³⁰ Taam kaladai no, “Sala' ka kia nangura' kou raki' buoi ru bayag muno? Igondo' aku kia pambaal rirun koson ragitio?” Taam i Biliam, “Kalo.”

³¹ Tuhan pana nambaal ri Biliam makakito ra malaikat ru Tuhan ondo' minigor ra giu' no nananggal ra ilang, am kubu boo i Biliam ra sumamba.

³² Indagu malaikat no, “Kua kia lambaa' mu kaladai muno saboi intalu? Aku ondo' nongompong ra pangkiralanan muno, sabap ra kalo musiti' no mugar kou.

³³ Kaa' kaladai muno nakakito raki' am miningkiing kaladai no intalu. Amon ru kalo, maaru' potoyon tokou am kaladai muno polosoon maayag.”

³⁴ Taam i Biliam, “Makatula aku noyo. Kalo nakapandai aku ra minigor kou ra saang koson mongompong raki'. Amon ru guang muno, kalo musiti' no mugar aku, gino poyo muli' aku.”

³⁵ Kaa' indagu malaikat ru Tuhan, “Ongoi no mabaya' ra ngaangai' ulun ti, kaa' raguo' ayuk atan ondo' panusuban kuno raguon mu.” Ginio ra rinayus i Biliam pangkiralanan nano nabaya' ra ngaangai' ulun no.

Nanguma' Raja' Balak ri Biliam

³⁶ Paat ra norongog ru Raja' Balak ra minatong i Biliam, ongoi io uma' riso giu' ra Ar, bandar giu' ra kiing ru Sungoi Arnon giu' ra balitan ru tana' Moab.

³⁷ Indagu Raja' Balak ri Biliam, “Paat ra aku nampiau rirun ra kasaa', kua kalo minatong kou? Mangkara' kou kia ra kalo makabayar aku ra pangayup rirun?”

³⁸ Taam i Biliam, “Raino minatong aku noyo, kaa' kalo makakuasa' aku mindagu ra atan pana ondo' ayuk am ondo' sinusub ri Aki Kapuuno'.”

³⁹ Ugar boo i Biliam nabaya' ra Raja' Balak minongoi ra bandar Gujot.

⁴⁰ Giu' no nanimbalui Raja' Balak ra kukula' ngainan sapi' am domba tayar ru taak simbalui. Nanaak Raja' Balak ra santayaran intor ra kual no ri Biliam am tingganai ondo' nabaya' ra raja' no.

Ragu inala' ri Biliam ondo' kasaa'

⁴¹ Iosusuab ru suabon no nagibit Raja' Balak ri Biliam mongoi ra Bamot-Baal. Giu' no nakakito ri Biliam ra santayaran intor ra ulun ru Israil.