UNTABAN 15 - Tanou Moonsoi Timugon

Aturan intor ra taak simbalui

¹ Nanaak Tuhan ri Musa

² ra aturan-aturan ragitio ondo' musiti' gagayaan ru ulun ru Israil giu' ra tana' ondo' taakin ru Tuhan risilo.

³ Tayar ru taak simbalui koson mapabansuk ra guang ru Tuhan, kapoam taak simbalui koson manugut ra nazar, kapoam taak simbalui toojo ayuk, kapoam taak simbalui paat ra pangiantakan ra kaindalaman, makapanaak kau ra bibiag ragitio ra Tuhan: Sanginan sapi' gawayan, sanginan domba gawayan, sanginan domba kapoam sanginan kambing. Owou ru taak akanon no mapabansuk ra guang ru Tuhan.

^4-5 Osoi ondo' mapataak ra domba kapoam kambing tayar ru taak simbalui koson mapabansuk ra guang ru Tuhan, musiti' niayuk mangani' ra sakilogram tapung moonsoi kaga' pinaratok ra salito umau ru jaitun koson taak simbalui koson paringkuanangan; pabayaan ra salito wain, koson pabayaan ra moonong bibiag ondo' pataakon.

⁶ Paat ra sanginan domba gawayan pataakon tayar ru taak simbalui, am musiti' pataakon niayuk ruo ngakilogram tapung moonsoi kaga' linatakan ra salito am maintanga' umau jaitun tayar ru taak simbalui koson paringkuanangan,

⁷ pabayaan ra salito am maintanga' wain. Owou ru lisun ru taak simbalui raginio mapabansuk ra guang ru Tuhan.

⁸ Paat ra sanginan sapi' gawayan pataakon ra Tuhan tayar ru taak simbalui koson mapabansuk ra guang ru Tuhan, kapoam tayar ru taak simbalui koson manugut ra nazar, kapoam tayar ru taak simbalui koson makibarakat ra Tuhan,

⁹ musiti' pataakon niayuk talu ngakilogram tapung linatakan ra ruo ngalito umau jaitun tayar ru taak simbalui koson paringkuanangan,

¹⁰ pabayaan ra ruo ngalito wain. Owou ru lisun ru taak-taak simbalui raginio mapabansuk ra guang ru Tuhan.

¹¹ Ginio noyo ondo' musiti' pataakon pabayaan ra moonong sapi' gawayan, domba gawayan, domba kapoam kambing.

¹² Amon ru ondo' pataakon no nasailan intor ra sanginan, am taak ra tapung moonsoi kaga', umau jaitun am wain no pana musiti' ruangin sumugut ra suang ondo' inaru'.

¹³ Baal ragitio musiti' baalon ru moonong ulun ru Israil paat ra io mapataak ra taak akanon, ondo' owou no mapabansuk ra guang ru Tuhan.

¹⁴ Sangulun bansa' ra bokon ondo' minayan simpung ramuyun, ra buoi ayuk kapoam lumayun, ulun no musiti' gumagaya' ra aturan ondo' nogondo' paat io mapataak ra taak akanon, ondo' owou no mapabansuk ra guang ru Tuhan.

¹⁵ Koson ra paat kolondo' pupus, aturan ra mogondo' masauk ramuyun am ra ulun bansa' ra bokon ondo' minayan ramuyun. Akau am ilo nogondo' ayuk ra saang ru Tuhan;

¹⁶ ukum am aturan ondo' nogondo' masauk ramuyun am ilo.

¹⁷ Nanaak Tuhan ri Musa

¹⁸ ra aturan-aturan ragitio koson gagayaan ru ulun ru Israil giu' ra tana' ondo' pataakon ru Tuhan risilo.

¹⁹ Paat ra akau mangakan ra akanon ondo' ampos ru tana' no, musiti' pasuayon santayaran ra akanon no tayar ru taak luntukon ra Tuhan.

²⁰ Intor ra gandum ondo' kumos galing no, tunui' ruti' intor ra adunan kasaa' ru gandum no; rondo' ruti' musiti' pataakon tayar ru taak luntukon ra Tuhan. Ralan mapataak raginio nogondo' ra ralan mapataak ra taak luntukon intor ra gandum ondo' agik galing mino.

²¹ Koson ra paat kolondo' pupus, ruti' intor ra adunan kasaa' no musiti' pataakon tayar ru taak luntukon ra Tuhan.

²² Amon ru sasangulun ra kalo singonon kalo nagagaya' rondo' aturan ondo' tinaakan ru Tuhan ri Musa,

²³ kapoam amon ru paat ra matong no ulun ti kalo nakapambaal ra ngaangai' ondo' sinusub ru Tuhan ra pinasaboi galing ri Musa,

²⁴ am amon ru kasalaan no binaal sabap ulun kalo nakapandai ra aturan, am ilo musiti' mapataak ra sanginan sapi' gawayan tayar ru taak simbalui koson mapabansuk ra guang ru Tuhan, ondo' owou ru lisun no mapabansuk ra guang Nano. Pabayaan ra taak simbalui no ilo musiti' mapataak niayuk ra taak simbalui koson paringkuanangan am taak simbalui wain koson ra ondo' inaru'. Suai raginio, musiti' ilo mapataak ra sanginan domba gawayan tayar ru taak simbalui koson mangampun ra tula.

²⁵ Mapaugar imam ra upacara pamasawan tayar ru ulun. Koson raginio noyo ilo ampunon sabap ra kasalaan raginio binaal ra kalo siningon, am taak simbalui koson mangampun ra tula tayar ru taak akanon pinataak noyo ra Tuhan.

²⁶ Ngaangai' ulun ru Israil am ulun bansa' ra bokon ondo' minayan ramuyun ampunon, sabap ra ilo ngaangai' nakalabit ra kasalaan ondo' kalo siningon no.

²⁷ Paat ra sangulun ayuk ondo' makatula am kalo singonon, musiti' io mapataak ra sanginan kambing ruandu' ondo' umur no sambilor tayar ru taak simbalui koson mangampun ra tula.

²⁸ Imam musiti' mapaugar ra upacara pamasawan giu' ra altar maa' raginio kapasawon ulun no intor ra tula nano am ampunon io.

²⁹ Aturan ra nogondo' masauk ra ngaangai' ulun ondo' makatula am kalo singonon, iou ra ulun ru Israil am niayuk ulun bansa' ru bokon ondo' minayan ramuyun.

³⁰ Kaa' osoi ayuk, iou ra ulun ru Israil kapoam ulun bansa' ru bokon ondo' sumingon mambaal ra tula, magasab ulun no ra Tuhan. Ulun no musiti' ukumin ra matoi,

³¹ sabap ra mansang io ra bala' ru Tuhan am sumingon manggal rondo' ra susuban Nano. Matoi ulun no sabap ra kasalaan nano galama'.

Ulun ondo' manggal ra aturan orou Sabat

³² Paat ra rondo' orou, paat ulun ru Israil lakat poyo giu' ra tana' kaagisan, narampatan sangulun ungkuyon nanimung ra luton paat ra orou Sabat.

³³ Inibit ulun no muma' ri Musa, i Arun am ngaangai' ulun,

³⁴ am inaput boo ulun no sabap ra kalo poyo naimumuyan atan baalon riso.

³⁵ Indagu boo Tuhan ri Musa, “Ulun no musiti' ukumin ra matoi. Musiti' io ibiton ra liwar ru pangkiman am giu' no ngaangai' ulun musiti' momobol riso saboi matoi.”

³⁶ Ginio ra ngaangai' ulun nagibit riso giu' ra liwar pangkiman, am pomobol riso saboi matoi, koson ra ondo' nanusuban ru Tuhan.

Aturan intor ra rumbai

³⁷ Nanusub Tuhan ri Musa

³⁸ maa' raginio mambala' ra ulun ru Israil, “Pambaal noyo ra rumbai ra pompor ru bayang mino, am pobongkoso' tali motomou ra moonong rumbai. Musiti' min baalon gitio ra paat kolondo' pupus.

³⁹ Rumbai-rumbai no, masauk ra pangkaraan, maa' raginio moonong min makito ginio, makara' min ngaangai' susuban Kuno am gumagaya' raginio. Ginio ra kalo mangiruan kau Raki' koson gumagaya' ra kasaga' am gogot ru guang min galama'.

⁴⁰ Rumbai-rumbai no mapakara' ramuyun koson gumagaya' ra ngaangai' susuban Kuno, saboi ra masauk kau ra Aku tatangan.

⁴¹ Aku noyo Tuhan i Aki Kapuuno' min; nagibit Aku ramuyun miningkual intor ra Misir maa' raginio masauk Aku ri Aki Kapuuno' min. Aku noyo Tuhan.”