UNTABAN 14 - Tanou Moonsoi Timugon

Mambutok ulun ru Israil

¹ Nosorondom ulun ru Israil nantatangi' sabap ra magalabo.

² Nambutok ilo ri Musa am i Arun am indagu, “Moonsoi poyo minatoi akai giu' ra Misir kapoam giti ra tana' kaagisan ti!

³ Kua kasaga' Tuhan magibit ramon giu' ra tana' no? Matoi akai ra pangayawan, am rokopon andu' anak mai. Kalo kia moonsoi poyo ru sumaguli' akai ra Misir?”

⁴ Ginio ra indagu ilo ra rondo' am bokon, “Ibok pilio' takau sangulun tingganai, am sumaguli' boo ra Misir!”

⁵ Kubu boo i Musa am i Arun ra saang ru ngaangai' ulun no.

⁶ Ruo ngaulun intor ra ulun pansigo no, i Josua anak ri Nun am i Kalib anak ri Jipuni, naparilak ra bayang nilo ra tayar ru tatandu' mangiluk guang.

⁷ Indagu ilo ra ulun no, “Tana' ondo' liniput mai no moonsoi toojo.

⁸ Amon ru mangiou Tuhan ritakau, magibit Io ritakau mongoi ra giu' am manaak ritakau ra tana' ondo' langkaya' am malabung no.

⁹ Pai' guor ra Tuhan, am pai' kalaa' ra mamagun ru tana' raginio. Makapangala takau risilo ra maluoi. Tuhan mabaya' ritakau, am nakapangala Io noyo ra mangampin risilo; ginio ra pai' no kalaa'.”

¹⁰ Ngaangai' ulun ru Israil mopololob koson momobol ri Josua am i Kalib saboi matoi, kaa' pulali' ru ulun no nakakito ra sinda katulayan ru Tuhan siminalula' ra rasawat ru Kim Nano.

Pakiasian ri Musa ra tayar ru ulun ru Israil

¹¹ Indagu Tuhan ri Musa, “Kula' poyo buoi ru ulun ti manggal Raki'? Saboi sanggilan ilo kalo masaga' mangintopot Raki', kabalu' pana nambaal Aku noyo masuang kaga' kaimuagan risilo?

¹² Maparatong Aku ra maruol am mamatoi risilo, kaa' mapasauk Aku rirun ra ama' ru rondo' bansa' ondo' maayo poyo am maikang poyo ka ilo!”

¹³ Kaa' indagu i Musa ra Tuhan, “Iou Tuhan, Okou noyo ondo' nagibit noyo ra ulun ti miningkual intor ra Misir mabaya' ra kuasa' Muno. Paat morongog ru ulun ru Misir ra atan binaal Muno ra ulun Muno,

¹⁴ mambala' ilo ra baal raginio ra mamagun ru tana' ragitio, am nokorongog ilo noyo ra Okou, Tuhan, mabaya' ramon. Naining nilo ra minintalang Kou paat ra muog gaun Muno ra rasawat mai, am ra mugar Kou giu' ra saang mai ralalom lugu' ru gaun paat ra matawang, am ralalom lugu' ru apui paat ra rondom.

¹⁵ Amon ru mamatoi kou ra ngaangai' ulun Muno raino, bansa' ra igondo' nokorongog ra inggalan maayo Muno mindagu

¹⁶ ra namatoi Kou ra ulun Muno giu' ra tana' kaagisan sabap ra kalo maalap Mu kaibit ilo ra tana' ondo' binantu' Mu noyo risilo.

¹⁷ Ginio ra, iou Tuhan, raino makitaak Aku, pakitono' noyo kuasa' Muno am baalo' noyo atan ondo' binantu' Muno paat ra Okou mindagu,

¹⁸ ‘Aku Tuhan, kalo mataki' sumangit. Mapakito Aku ra togom am gagaya' Kuno ondo' maayo. Mangampun Aku ra ulun ondo' makatula am ondo' manggal Raki'. Kabalu' pana raginio, tula ru matuo balasin Ku ra anak akupu nilo, saboi ra papag ondo' katalu am kaapat.’

¹⁹ Ginio ra iou Tuhan, ampuno' noyo tula ru ulun ti, sabap ra togom Muno maayo am kalo makulau, koson ra nangampun Kou noyo risilo intor ra ilo nangiruan ra Misir.”

²⁰ Taam Tuhan, “Mangampun Aku risilo sumugut ra kinitaak muno.

²¹ Kaa' nambantu' Aku sabap ra inan Kuno am sabap ra Aku ondo' maayag am makakuasa' ra tana' ti,

²² ra kolondo' sangulun pana ra ulun ti mongoi ra tana' raginio. Nakakito ilo noyo ra sinda ru katulayan Kuno am kaimuagan ondo' binaal Kuli giu' ra Misir am giu' ra tana' kaagisan, kaa' mararayus ilo mangkinam Raki', am marara' gumagaya' Raki'.

²³ Kalo noyo toojo mokoongoi ilo ra tana' ondo' binantu' Kuli ra kinamatuaan nilai. Kolondo' sangulun pana ondo' manggal Raki' mongoi ra giu' no.

²⁴ Kaa' paliso ri Kalib, ulipon Kuno suai; magulayun io gumagaya' Raki'. Ginio ra magibit Aku riso mongoi ra tana' ondo' liniput nano. Papag nano tatangan ra tana'

²⁵ ondo' tampilon ra limayak inayanan ru ulun ru Amalik am ulun ru Kanaan paat ra raino ti. Susuab no musiti' kau maruli' am mongoi ra tana' kaagisan mongoi ra Teluk Akaba.”

Nangukum Tuhan ra ulun ru Israil sabap ra nambutok

²⁶ Indagu Tuhan ri Musa am i Arun,

²⁷ “Saboi sanggilan kia ulun mangalaat ti mambutok Raki'? Norongog Ku noyo ngaangai' butok nilo!

²⁸ Raino taamo' ilo ra koson ragitio, ‘Nampator Aku sabap ra Aku ondo' maayag, ra mambaal Aku nontopot koson ra kinitaak min. Aku Tuhan nakaindagu noyo.

²⁹ Matoi kau am baangkai min rumumpalangan ra titikop ru tana' kaagisan ti. Ginio sabap ra mambutok kau Raki', kolondo' sangulun pana ra popolos min ondo' umur ruo ngoopor am nakasail mongoi ra tana' no.

³⁰ Nambantu' Aku noyo ra mapaayan ramuyun ra tana' ti, kaa' kolondo' sangulun pana ramuyun mayan ra giu' no ondo' ak am i Kalib am i Josua.

³¹ Minindagu kau ra rokopon anak mino, kaa' ilo noyo ondo' ibiton Ku mongoi ra tana' ondo' impayin mino. Masauk tana' no ra ayanan nilo,

³² kaa' akau matoi ra tana' kaagisan ti.

³³ Tumanggau anak mino ra tana' kaagisan buoi apat ngoopor ngambilor. Sabap ra kalo gumagaya' kau, maimbolo' anak-anak mino, saboi akau ngaangai' no matoi.

³⁴ Mansaan kau ra kinibit ru tula mino buoi apat ngoopor ngambilor, sambilor koson moonong orou intor ra apat ngoopor ngoorou ondo' pinakai min lumiput ra tana' no. Mapandayan min boo ra ati kulaan kalimanan no paat ra Aku manggal ramuyun.

³⁵ Nampator Aku ra mambaal ragitio ramuyun, ulun mangalaat ondo' naguguum manggal Raki'. Akau ngaangai' no matoi ra tana' kaagisan ti. Aku Tuhan nakaindagu noyo.’ ”

^36-37 Ulun ondo' sinusub ri Musa liminiput ra tana' no nambala' ra ondo' kalo motopot, am baal raginio nangkinibit ra ulun ru Israil nambutok ra Tuhan. Ginio ra nangukum Tuhan risilo ra maruol, am ilo pana minatoi.

³⁸ I Josua am i Kalib ayuk lakat poyo naayag ra gino ngai' ru mopor am ruo ngaulun ra ulun pansigo no.

Pangkinaman kasaa' koson mamulunsar ra tana' no

³⁹ Kopongo i Musa nampasaboi ra bala' ru Tuhan ra ulun ru Israil, nanulaboi ilo ra mangiluk guang.

⁴⁰ Suabon no, nokorondom ra susuab ti, timinampos ilo koson mamulunsar ra libung kabuluran. Indagu ilo, “Mangiou akai ra makatula noyo. Kaa' raino nakatampos akai noyo mongoi ra intok ondo' nanuluan ru Tuhan.”

⁴¹ Kaa' taam i Musa, “Kua kia anggal kau raino ra susuban ru Tuhan? Kalo mamanang kau!

⁴² Pai' noyo ongoi, sabap ra Tuhan kalo mabaya' ramuyun. Kalaan kau ru pantula' mino.

⁴³ Paat ra akau makapaguma' ra ulun ru Amalik am ulun ru Kanaan, matoi kau ra pangayawan. Kalo mabaya' Tuhan ramuyun sabap ra kalo gumagaya' kau Riso.”

⁴⁴ Kaa' lakat poyo niayuk ulun ru Israil gumogot mongoi ra libung kabuluran, kabalu' pana Kaban Nabantuan ru Tuhan am i Musa kalo nangiruan ra pangkiman.

⁴⁵ Kopongo raginio ulun ru Amalik am ulun ru Kanaan ondo' minayan ra giu' no namulunsar risilo am napakala risilo, am nangilou risilo saboi ra Orma.