Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

ဤစာအုပ်သည် ဘုရားသခင်မှ အားသွင်းပေးထားသော စာအုပ်မဟုတ်ပါ။ ၎င်းသည် ခရစ်ယာန်၏ ကာနွန် သို့မဟုတ် ယုဒလူမျိုး၏ တာနာ့ခ်၏ အစိတ်အပိုင်းမဟုတ်ပါ။ သမိုင်းနှင့် သုတေသန ရည်ရွယ်ချက်များအတွက်သာ ပြသထားပါသည်။ အပြည့်စုံသော ရှင်းလင်းချက်ကို ကြည့်ရန်

TOBIT 6 - Tanou Moonsoi Timugon


Namparakop i Tobias ra papait

1 I Tobias pana minugar nabaya' ra malaikat. Minaya' uku' ri Tobias risilo. Narayus ilo minugar saboi ra timinolop mato ru orou, am pombolong maar ra Sungoi Tigris.

2 Tuun i Tobias ra sungoi koson mambagu' ra kalayam nano. Pulusat ru papait ondo' maayo timinindak intor ralalom timug am kuminam manimpar ra kalayam nano. Golok io,

3 am indagu malaikat no riso, “Rokopo' papait no! Pai' labusi'!” Rokopo' ri Tobias ginio am ralaato' no ra lantur.

4 Indagu malaikat no, “Abui' papait no. Alapo' amparu, pusu' am angkayau no, am bulii' toojo, sabap ginio tatapis pamabas. Kaa' musiti' mu patirin suang ru tinai' no.”

5 Abui' ri Tobias papait no. Kaingkual amparu, pusu' am angkayau no, tunui' no papait no. Santayaran no inakan am santayaran no inusian koson ra lutu'.

6 Ilo ruo pana namparayus ra pangkiralanan saboi maar ra pagun Midia.

7 Pangkuot i Tobias, “Rangan ku Ajaria, atan maruol ondo' maalap kababas ra amparu, pusu' am angkayau ru papait no?”

8 Taam malaikat, “Amon solobon pusu' am angkayau ru papait no, lisun no makapangunjau ra riwato intor ra ulun subolon. Mugar ra mataki' riwato no, am kalo boo jojowon ulun no ra mantilayun.

9 Amparu ru papait no pamabas ra ulun ondo' mato nano nakulaupan ru bulangkung mapulak. Amon paluiton amparu ru papait no ra mato nano am sampuyon, bulangkung no pana mairu', am mababas ulun no.”


Pangkiralanan mongoi ra Ikbatana

10 Paat ilo nakasaboi giu' ra pagun Midia, am maar noyo ra bandar Ikbatana,

11 indagu i Rapail, “Rangan ku Tobias!” Taam i Tobias, “Atan ginio?” Indagu i Rapail, “Musiti' to mombolong giu' ra baloi ri Raguil. Okou po ngai' riso. Rondo' ayuk anak nano; sangulun ralaa makainggalan ri Sara.

12 Okou pabukat no ra mamaar kaga', am maaya' toojo koson maguot riso am manungkus ra ngaangai' kalangkayaan ru ama' nano. Ralaa raginio moonsoi guang, baani am mantalur kaga'. Ama' nano niayuk sangulun ondo' moonsoi guang.

13 Rondom raiti' mansunur aku ra ama' nano, maa' raginio mangiou io rirun manangandu' ra anak nano, sabap okou no maaya' kaga'. Bunsag ru paguatan baalon takau malupus ito makasaguli' intor ra bandar Ragai. Nakapandai i Raguil ra okou no maaya' kaga' manangandu' ra anak nano. Ginio ra kalo maimpayan no panamung muno kapoam manaak ra anak nano ra ulun bokon, sabap amon impayin no, lumungkang io ra Ukum ri Musa am musiti' ukumin ra matoi. Ginio ra iningo' bilin kutu. Rondom no mansunur aku am i Raguil intor ra ralaa no, am atangon mai pantamungan min. Makasaguli' to intor ra Ragai, ibiton to io muli'.”

14 Kaa' indagu i Tobias, “Rangan ku Ajaria, nakaining aku ra tunung ru katulu'-tulu' ngaulun ralaki nano ragili. Ngaangai' nilo minatoi giu' ra lamin pambalangan paat ra rondom parulugan ra kalo poyo makaparulug riso. Koon ru ulun, pinatoi ilo ru riwato.

15 Kalo jamarin no i Sara, kaa' moonong ulun ondo' masaga' lumampit ri Sara potoyon paat raginio. Aku ti anak langkuir, am amon ru matoi aku, maaru' kalumpusan ru matuo kuno magibit ra patayan nilo. Mulu' poyo kolondo' anak nilo ra bokon koson mompolobong risilo.”

16 Taam malaikat no, “Nalilianan mu noyo kia bilin ru ama' muli? Moogot io maa' raginio manambili' kou ra ralaa intor ra pabukat muno galama'. Iningo' toojo. Pai' lioo' riwato no. Tambilio' noyo ralaa no. Mangintopot aku ra rondom no pataakon i Sara masauk ra andu' muno.

17 Paat ra okou mumpos ra lamin pambalangan, musiti' kou magibit ra santayaran ra pusu' am angkayau ru papait, am patampako' ra intok panalaban ra kaminyan. Owou no mongowou ra titikop ru lamin no. Amon maalok ginio ru riwato no, magiru' io am kalo boo minggaar ri Sara ra sabuoi-buoi no.

18 Kaa' kalo poyo marulug kou ra andu' muno, musiti' akau ruo migor am makiasi' ra Tuhan Ondo' Masawat Kaga' maa' raginio makaasi' am magalung Io ramuyun. Pai' kalaa'. Intor ra talimpuun i ralaa no suput ru abuk muno. Mamayag kou riso am magibit riso ra baloi muno. Mangintopot aku ra okou am i Sara aniin ra anak masuang. Igondo' poyo, pai' kaimamang!”

19 Kaining ri Tobias ragu ri Rapail ra pabukat no poyo i Sara tampilon ra ama' nano, makaguang io riso am masaga' maguot riso.

Hakcipta © Bible Society of Malaysia, 2013.

Bible Society of Malaysia
ကြှနျုပျတို့နောကျလိုကျပါ:



ကြော်ငြာတွေ