TOBIT 5 - Tanou Moonsoi Timugon

Tumampos ra mangkiralan

¹ Taam boo i Tobias ra ama' nano koson ragitio, “Baalon ku ngaangai' susuban muno ama'.

² Kaa' ati kulaan ku maalap ruit no intor ri Gabail? Kalo igondo' akai pakapantuum. Ati kulaan ku mapainono' riso ra osoi aku ti, saboi mangintopot io am manaak raki' ra ruit no? Mulu' poyo kalo makatanda' aku ra ralan mongoi ra Midia.”

³ Taam i Tobit, “Aku am i Gabail nabaya' siminain ra rondo' surat pambalaan. Surat no piniruo ku, am sigagama' mai nambuli ra sampiruo. Tayar ri Gabail binulian ku ralalom ru kantungan ru ruit ondo' pinabulian kuli. Sauk raginio ruo ngoopor ngambilor ra nakasail i. Raino ongoi noyo alapo' ruit no intor ri Gabail. Uyumon galing ulun ondo' maintopot am ondo' masaga' mamparangan rirun mongoi ra Midia. Gaji' nano bayarin takau paat ra okou makasaguli'.”

I Tobias nakatuum ri Rapail

⁴ I Tobias pana minongoi paguyum ra ulun ondo' makatanda' ra ralan mongoi ra Midia am ondo' masaga' mamparangan riso mongoi ra giu' no. Bagu ayuk io nakaingkual intor ra baloi nano, pakatuum io ri Rapail, kaa' kalo nakapandai i Tobias ra i Rapail malaikat ri Aki Kapuuno'.

⁵ Pangkuot boo i Tobias, “Ati intor mutu?” Taam i Rapail, “Ulun aku ru Israil. Lakat takau poyo mabukat. Minatong aku ra Niniwi ti maguyum ra kandoi.” Pangkuot i Tobias, “Nakatanda' kou kia ra ralan mongoi ra Midia?”

⁶ Taam i Rapail, “Nakatanda'. Masalok aku mongoi ra giu' am nakatanda' ra ngaangai' ralan no. Maindalom aku mayan ra baloi ri Gabail pabukat takau ondo' minayan giu' ra Ragai, bandar ru kabuluran giu' ra pagun Midia. Galur ru bandar Ragai no ruo ngoorou pangkiralanan intor ra bandar Ikbatana.”

⁷ Indagu boo Tobias ri Rapail, “Rangan, paginaa ragiti. Mumpos aku sangkinolor mambala' ra baal raginio ra ama' kuno. Mapara' bonsoi no amon ru maranganan mu aku mongoi ra Midia. Mampagaji' akai rirun ra pangkiralanan no.”

⁸ Taam i Rapail, “Iou. Maginaa aku, kaa' pai' kabuoi.”

⁹ Umpos i Tobias ra ralalom ru baloi am indagu ra ama' nano, “Ama', nakatuum aku no ra sangulun Israil ondo' mamparangan raki'.” Taam i Tobit, “Susubo' ulun no mumpos. Masaga' aku makapandai ra intor io ra sasambaloi ri osoi am ati ra bansa', maintopot kia io mamparangan rirun.”

Timinuum i Tobit ri Rapail

¹⁰ I Tobias pana miningkual am pampiau ri Rapail. Kono, “Masaga' ama' kuno tumuum rirun. I Rapail pana minumpos, am panabi' galing i Tobit. Pambalos i Rapail ra tabi' no, am indagu io, “Gama' ru maligag kou toojo.” Taam i Tobit, “Ati boo maligag aku? Bolou am kalo makakito aku ti, koson ulun minatoi ondo' kalo makakito ra sinda. Iou, soroi aku ralalom kalandaman koson ulun minatoi! Mokorongog aku ra ulun mindagu, kaa' kalo makakito risilo.” Taam i Rapail, “Kaikang no toojo, ama', Kalo boo mabuoi mamabas i Aki Kapuuno' rirun. Kaikango' noyo guang muno!” I Tobit pana mindagu, “Anak kuno i Tobias masaga' mongoi ra Midia. Makaaya' kou kia riso am manulu' ra ralan? Bayarin ku gaji' muno.” Taam i Rapail, “Ranganin ku anak muno. Masalok aku mongoi ra giu' am nakatanda' ra ngaangai' ralan giu' ra tana' limayak am giu' ra kabuluran.”

¹¹ Pangkuot poyo i Tobit, “Kinam tunungo', okou intor ra sasambaloi am bansa' ru ati?”

¹² Kaa' taam i Rapail, “Kua kuati' mu baal raginio?” Kon i Tobit, “Masaga' aku ayuk makapandai ra osoi kou am osoi inggalan muno.”

¹³ Taam i Rapail, “Ajaria aku, anak ri Ananias ondo' matutuo no, pabukat muno.”

¹⁴ Indagu boo i Tobit, “Kaansayan matong ra baloi mai! Pai' panginalu sabap mangkuot aku ra osoi kou am osoi sasambaloi muno. Napandayan ra intor kou ra pabukat ra moonsoi kaga' am akai po ngai'. I Ananias am i Natan, anak ri Simiya ondo' matutuo no, nauligan ku. Gumagaya' ilo ra ugama. Galing i maindalom akai mabaya' mongoi sambayang giu' ra Jirusalim. Pabukat-pabukat muno ulun ondo' urumaton kaga', am papag kou ru ulun moonsoi. Kaansayan matong!”

¹⁵ Indagu poyo i Tobit, “Bayarin tokou moonong orou makaaya' paruangon ra balanja' ru pangkiralanan min ruo.

¹⁶ Ongoi no mabaya' ra anak kuno, gaji' muno ruangin poyo.”

¹⁷ Indagu i Rapail, “Ranganin ku io. Kalo pana maimamang kou. Makasuku' akai ra giu' am muli' ra maayag, sabap ralan-ralan nano mongoonsoi.” Taam i Tobit, “Gama' ru barakaton kou ri Aki Kapuuno'.” Io pana nampiau ri Tobias am indagu riso, “Buayoi kuno, tomposo' ngaangai' ibiton muno ra pangkiralanan min ruo. Gama' ru i Aki Kapuuno' Ondo' Masawat Kaga' manindung ramuyun ruo ra giu' am mangator ramuyun muli' ra matanda'. Gama' ru mangampin malaikat ru Tuhan no ramuyun ralalom ru pangkiralanan min.” Pintor i Tobias giminanggol ra matuo nano ra kalo poyo minugar. Kon poyo ri Tobit, “Tumoojo!”

¹⁸ Kaa' tumalimpuun ina' nano mantangi'. Kono ri Tobit, “Kua susubo' mu anak kuno mugar? Io noyo sangulun ondo' lansanin to ra orou matong? Osoi kia ondo' magalung rito raino?

¹⁹ Maatang kia' kaga' ruit no rirun saboi painawo ru anak muno galama' kinibitin mu ra mangalap saguli' ra ruit no?

²⁰ Kalo kia maukop to maayag ra atan ondo' taakin ru Tuhan rito?”

²¹ Taam i Tobit, “Pai' kalaa', makasuku' io ra giu' am makasaguli' ra maayag. Makakito kou riso muli' ra maligag.

²² Pai' kaimamang, sabap bayaan i Tobias ru malaikat moonsoi. Makaampos pangkiralanan nano am muli' io ra maayag.”

²³ Pakaining raginio, longgo' i Anna nantangi'.