TOBIT 3 - Tanou Moonsoi Timugon

Pakiasian ri Tobit

¹ Mangiluk kaga' guang kuno, saboi nantangi' aku. Ra lumpus kuno pakiasi' aku koson ragitio,

² “Matimpok Kou, iou Tuhan. Makaasi' Kou ralalom ru ngaangai' baalon Muno am gumagaya' ralalom ru ngaangai' timbalos Muno; Okou noyo mangakim ra limbowon am tana' ti.

^3-4 Koonsoi no raki' am pai' pangukum raki' sabap ra tula-tula kuno, am tula-tula ondo' nakasibuni. Kinamatuaan kuli giminuor am minanggal ra susuban Muno; pai' pangukum raki' sabap ra tula-tula nilai. Polosoon Mu akai takawin, rokopon am potoyon, tauyuon, iison am asabin giu' ra pagun-pagun intok akai pinatiran.

⁵ Motopot ngaangai' ukuman Muno, paat Okou mangukum ramon sabap ra kasalaan mai. Kalo gumagaya' akai; inimpayan mai susuban Muno am kalo naayag ra matanda' ra saang Muno.

⁶ Raino guguang Mu mambaal ra atan ayuk raki', alapo' noyo painawo kutu maa' raginio maliom aku intor ra tana' ti, am sumaguli' masauk ra kaau. Moonsoi poyo matoi raki' intor ra maayag, sabap ra marayus aku simbaalin ra ragu malaat, am asabin, am mangiluk toojo guang kutu. Iou Tuhan, polosoon noyo ngaangai' kapaganan ti mapupusan; ibito' aku noyo ra intok ayanan mantilayun. Pai' impayi' pakiasian kutu, iou Tuhan, sabap moonsoi poyo ra aku matoi intor ra maayag ra maimbolo' am marayus tauyuon.”

Kapaganan ri Sara

⁷ Paat orou raginio niayuk giu' ra bandar Ikbatana giu' ra Midia, i Sara anak ruandu' ri Raguil inasaban ru mangangandoi ruandu' ru ama' nano.

⁸ Intulu' noyo i Sara inuot, kaa' moonong ra kalo poyo makaparulug, riwato i Asmodius, mamatoi ra ralaki nano. Indagu mangangandoi no ri Sara, “Okou galama' namatoi ra ralaki-ralaki muli! Tulu' ngaulun noyo naguot rirun, kaa' minatoi ngaangai' ra kalo poyo nakapasimpung rirun.

⁹ Kua pangukum kou ramon sabap ra pinatayan nilai? Moonsoi poyo ru okou galama' sumunu' risilo, maa' raginio kalo makakito akai ra sangulun pana ra anak muno!”

¹⁰ Pokorongog koon raginio, mangiluk toojo i Sara. Sisikok io mantangi' am pagaloi ra rasawat ru baloi ru ama' nano koson mantuo. Kaa' pakapangkara', kono ralalom ru guang, “Pai'. Asabin ama' kuno ru ulun. Mindagu ilo riso, ‘Makaanak ruandu' kou ondo' tagamin muno kaga'. Kaa' nantuo io sabap kapaganan nano.’ Kangilukan boo ru ama' kuno ondo' matutuo noyo maaru' magibit ra patayan nano. Intor ra mantuo, moonsoi poyo makiasi' ra Tuhan maa' raginio matoi aku ayuk. Aku pana kalo boo mokorongog ra pagasaban raginio.”

Pakiasian ri Sara

¹¹ I Sara pana nompotoroi ra kalindu' tampilon ra pagimpalan am pakiasi' koson ragitio, “Koompor Kono, iou Aki Kapuuno' ra Motogom! Gama' ru masalok urumaton inggalan Muno. Gama' ru katulayon Kou ru titikop ru binaal Muno ra sabuoi-buoi no.

¹² Iou Tuhan, magilong aku Rirun am makiasi' Rirun.

¹³ Makitaak aku, polosoon aku matoi ayuk, maa' raginio kalo boo mokorongog aku ra pagasaban raginio.

¹⁴ Nakapandai kou, Tuhan, ra lakat aku poyo ralaa, kalo igondo' rulug ra ungkuyon.

¹⁵ Kalo igondo' ku jamali' inggalan kuno kapoam inggalan ru ama' kuno, buoi minayan ra tana' pamatiran ti. Anak langkuir aku ru ama' kuno, rorondo' ra manugul riso. Kolondo' pabukat ri ama' kapoam pabukat ra bokon ondo' maaya' manangandu' raki'. Nailusan aku noyo tulu' ngaulun ralaki; atan onong no ru maayag koson ragitio? Kaa' amon marara' Tuhan ra aku matoi, rongogo' noyo kalumpusan kutu, iou Tuhan!”

Nangiou Tuhan ra pakiasian ri Tobit am i Sara

¹⁶ Liliwa' makiasi' i Tobit am i Sara, momporongog Tuhan Ondo' Masawat Kaga' ra kitaakon nilo

¹⁷ am nanusub ri Rapail, malaikat Nano mangindangan risilo. Sinusub io koson mangiru' ra bulangkung mapulak intor ra mato ri Tobit maa' raginio makakito io poyo saguli'. Sinusub niayuk i Rapail koson manalingapu ra paguatan ri Sara am i Tobias anak ri Tobit. I Tobias noyo ulun ondo' maaya' kaga' maguot ri Sara. Sinusub niayuk i Rapail koson mapalabus ri Sara intor ra riwato Asmodius. Paat ri Tobit nangiruan ra liliut koson mumpos ralalom baloi nano, paat raginio niayuk i Sara ondo' giu' ra Ikbatana timinuun intor ra lamin rasawat.