TINGGANAI RU BANSA' 9 - Tanou Moonsoi Timugon

Abimilik

¹ Sangarawan raginio, minongoi i Abimilik anak ri Gidion ra bandar Sikgim, intor ru pabukat ra bala ru ina' nano. Giu' no nanusub io risilo

² mangkuot ra mamagun ru Sikgim, “Ati kia ondo' moonsoi poyo? Parintaan ru tulu' ngoopor ngaulun anak ungkuyon ri Gidion kapoam ru sangulun ayuk? Karaa' noyo ra lakat poyo i Abimilik makapabukatan mamaar kaga' ramuyun.”

³ Pabukat-pabukat ri Abimilik nansunur ra baal raginio ra mamagun ru Sikgim tayar ri Abimilik. Mamagun ru Sikgim pana namatas koson maya' ri Abimilik, sabap ra io lakat poyo makapabukatan mamaar kaga' risilo.

⁴ Nanaak ilo ri Abimilik ra tulu' ngoopor ngampila' ruit pirok intor ra kuil Baal-Birit. Ra ruit raginio nampagaji' i Abimilik ra santimungan ulun malaat koson maguguum riso.

⁵ Kopongo raginio minongoi io ra baloi ru ama' nano giu' ra Opra. Giu' no, ra rasawat ru rondo' batu namatoi io ra tulu' ngoopor ngaulun anak ungkuyon ri Gidion, pabukat-pabukat nano. Kaa' i Jotam, anak ungkuyon ra pupusan ri Gidion, nansibuni saboi kalo napatoi.

⁶ Timung boo mamagun ru Sikgim am Bit-Milo. Minongoi ilo ra saau ru puun oak, iono puun karamat giu' ra Sikgim, am napasauk ri Abimilik ra raja'.

⁷ Pokorongog i Jotam ra baal raginio, bigor io ra tampak ru Gunung Girijim am golok risilo, “Rongogo' ragu kutu, akau ngai' mamagun ru Sikgim, maa' raginio rumongog niayuk i Aki Kapuuno' ramuyun!

⁸ Rondo' paat, tumimung puun-puun tataun koson mampili' rondo' ra gino ngai' ilo koson ra raja'. Mindagu ilo ra puun jaitun, ‘Sauk no ra raja' mai.’

⁹ Taam puun jaitun, ‘Kalo malanggaan ku manangampos ra umau ondo' pakayon koson mangurumat ra dewa am ulun, koson mamarinta ayuk toojo ramuyun.’

¹⁰ Indagu boo puun-puun tataun ra puun ara, ‘Okou ayuk pana masauk ra raja' mai.’

¹¹ Kaa' taam puun ara no, ‘Kalo malanggaan ku manangampos ra kawa' ondo' matamis, koson mamarinta ayuk toojo ramuyun.’

¹² Sabap raginio indagu puun-puun tataun ra puun ru anggur, ‘Okou ayuk pana masauk ra raja' mai.’

¹³ Kaa' taam puun ru anggur no, ‘Kalo malanggaan ku manangampos ra wain ondo' mapabansuk ra guang ru dewa am ulun, koson mamarinta ayuk toojo ramuyun.’

¹⁴ Sabap raginio, indagu ngaangai' puun tataun no ra bulungkut makaruui, ‘Okou ayuk pana masauk ra raja' mai.’

¹⁵ Taam bulungkut makaruui no, ‘Amon totopot guang min masaga' ra masauk aku ra raja' min, ibok no sindung ra saau kutu. Kaa' amon ru kalo, mingkual apui intor ra pango-pango kuno ondo' makaruui am monolob ra ngaangai' puun sidar giu' ra Libanon.’ ”

¹⁶ “Karaa' noyo toojo,” rayusi' poyo ri Jotam, “Totopot kia guang min paat akau napasauk ri Abimilik ra raja'? Mangurumat kau kia ri Gidion am moonsoi pamakuan min ra sasambaloi nano sabap binaal moonsoi nano?

¹⁷ Karaa' noyo ra namulunsar ama' kuno ra tayar min. Napakinibit io ra painawo nano koson mapalabus ramuyun intor ra ulun ru Midian.

¹⁸ Kaa' raino giminuor kau ra sasambaloi ru ama' kuno. Namatoi kau ra tulu' ngoopor ngaulun anak ungkuyon nano ra rasawat ru rondo' batu, am napasauk ayuk ri Abimilik ra raja' sabap io pabukat min. I Abimilik no anak ru ama' kuno intor ra ulipon ruandu' nano.

¹⁹ Amon binaal mino ri Gidion am sasambaloi nano ra orou raiti' totopot binaal ra matanda' am mabanis, pakaansuk kano ri Abimilik, am polosoon io niayuk makaansuk ramuyun.

²⁰ Kaa' amon ru kalo, polosoon noyo apui mingkual intor ri Abimilik am monolob ra ngaangai' mamagun ru Sikgim am Bit-Milo. Koson raginio niayuk, polosoon apui mingkual intor ra mamagun ru Sikgim am Bit-Milo am monolob kakai' ri Abimilik.”

²¹ Kopongo raginio nagiru' i Jotam am minayan giu' ra Biir sabap malaa' io ri Abimilik, pabukat nano.

²² Namarinta i Abimilik ra Israil buoi talu ngambilor.

²³ Kopongo raginio napatabual Tuhan ra pansangaran ri Abimilik am mamagun ru Sikgim, saboi giminuor ilo ri Abimilik.

²⁴ Nasauk baal raginio maa' raginio mabalasan kalaatan ri Abimilik am mamagun ru Sikgim ondo' nanusuk riso namatoi ra tulu' ngoopor ngaulun anak ungkuyon ri Gidion.

²⁵ Mamagun ru Sikgim noposoroi ra ulun pagawang giu' ra tampak-tampak ru gunung koson mamparakop ri Abimilik. Moonong ulun ondo' mansail ra giu' no tinakawan ru ulun-ulun pagawang no. I Abimilik pana binalaan ra baal raginio.

²⁶ Paat raginio, minanding i Gaal anak ri Ibid ra Sikgim nababaya' ra pabukat-pabukat nano. Mamagun ru Sikgim mangintopot riso.

²⁷ Minongoi ilo ngaangai' ra umo ru anggur am nangupu' ra kawa' ru anggur. Pagaa' nilo boo kawa' ru anggur no, nambaal ra wain, am nambaal ra bunsag maayo. Nangakan nanginum ilo giu' ra ralalom kuil ru dewa nilo, liliwa' nagagasab ri Abimilik.

²⁸ Indagu i Gaal, “Itakau ti mamagun ru Sikgim. Kaa' osoi kia i Abimilik saboi itakau ti musiti' sumauk ra ulipon nano? Sala' ka kia anak io ri Gidion? I Abimilik am i Jibul, uakil nano, igondo' inulipon ri Gimor, ama' ri Sikgim, kinamatuaan takali. Kua musiti' uliponon takau ri Abimilik? Gagaya' noyo ra kinamatuaan takau i Gimor!

²⁹ Amon ru masauk aku ra tingganai ru mamagun ru Sikgim, maaru' luuson ku i Abimilik! Mindagu aku riso, ‘Kaikango' noyo saujor muno, am ingkual noyo ra mangayou!’ ”

³⁰ I Jibul, nanguasa' ra bandar Sikgim, siminangit paat nokorongog ra rinagu ri Gaal.

³¹ Nanusub i Jibul ra ulun nampasaboi ra bilin ragitio ri Abimilik giu' ra Aruma, “Minatong i Gaal anak ri Ibid am pabukat-pabukat nano ra Sikgim. Nanusuk ilo ra mamagun ru bandar ti maa' raginio manggal rirun.

³² Ginio ra, okou am ulun-ulun muno musiti' mongoi paat ra rondom ti am mansibuni giu' ra umo.

³³ Rumondom ra susuab no, paat sumirang mato ru orou, bulunsaro' bandar no ra mamulali'. Paat i Gaal am ulun-ulun nano mingkual manggal rirun, ginio noyo kaluagan muno koson mamulunsar risilo ra ngaangai' ru kaikangan!”

³⁴ I Abimilik am ulun-ulun nano pana minugar paat ra rondom. Tinayar nilo ra apat ngampulalai am minongoi pansibuni giu' ra liwar bandar ru Sikgim.

³⁵ Paat ra i Gaal mingkual am minigor ra kulobon garabang ru bandar, ingkual i Abimilik am ulun-ulun nano intor ra intok nansibunian.

³⁶ Paat nakito ri Gaal ilo, indagu io ri Jibul, “Ilai', mokoondo' ulun tumuun intor ra tampak ru gunung!” Kaa' indagu i Jibul, “O, babara' ayuk giu' ra gunung; sala' ka ulun.”

³⁷ Indagu poyo i Gaal, “Ilai' noyo, ulun tatanga' tumuun intor ra pipilon ru gunung, am santimungan ulun tatanga' sumaboi ragiti intor ra puun oak ru mangngilong!”

³⁸ Indagu i Jibul ri Gaal, “Na, buoi ti mindagu kou ra liminimbau. Ragili nangkuot kou, ‘Kua musiti' takau masauk ra ulipon ri Abimilik?’ Gitio noyo ilo ondo' inasaban muno. Ongoi, jalai no am bulunsaro' ilo.”

³⁹ Naningganai i Gaal ra ulun ru Sikgim mingkual ra gumula' ri Abimilik.

⁴⁰ Kaa' namulunsar i Abimilik ri Gaal saboi nagiru' io. Ulun ondo' napilatan nangaratu', saboi giu' ra tuma' ru kulobon garabang ru bandar.

⁴¹ Kopongo raginio siminaguli' i Abimilik ra Aruma, am liminayun ra giu'. Pinagiru' ri Jibul i Gaal am pabukat-pabukat nano saboi kalo boo makaayan ilo giu' ra Sikgim.

⁴² Suabon no, binalaan i Abimilik ra nangatang mamagun ru Sikgim koson mongoi ra umo.

⁴³ Ginio ra nagibit i Abimilik ra ulun-ulun nano, tinayar ilo ra talu pulalai, am nansibuni ra umo. Paat nakito ri Abimilik mamagun ru bandar no nangiruan ra bandar, ingkual io intor ra intok nansibunian am pamatoi risilo.

⁴⁴ Nagindibok i Abimilik am pulalai nano jiminalai namulunsar ra kulobon garabang ru bandar no. Liliwa' raginio ruo pulalai ra bokon namulunsar ra ulun giu' ra umo am namatoi risilo ngai'.

⁴⁵ Nonsongorou i Abimilik nangayou ra mamagun ru bandar no. Nampagaau io ra bandar no am namatoi ra mamagun no. Kopongo raginio binunsai no bandar raginio am tinaukan ra usi'.

⁴⁶ Paat baal raginio norongog ru ngaangai' tingganai giu' ra ralalom ru kubu giu' ra Sikgim, umpos ilo ra kubu ragana' ru kuil Il-Birit ra sumindung.

⁴⁷ Binalaan i Abimilik ra timinimung ilo ra giu' no.

⁴⁸ Ginio ra minongoi i Abimilik ra Gunung Jalmon nabaya' ra ulun-ulun nano. Giu' no namutul ilo ra raan ru tataun ra kapak, am nansaan ra raan-raan tataun. Nanusub io ra ulun-ulun nano nagindibok mambaal koson raginio niayuk.

⁴⁹ Sigagama' nongkolog ra raan-raan tataun, am sunu' ri Abimilik am patunturo' raan-raan no ra kabang ru kubu ru kuil. Kopongo raginio nansuru ilo ra raan-raan no paat ra ulun ru Sikgim lakat poyo soroi ra ralalom ru kubu. Ginio ra ngaangai' mamagun ru Sikgim minatoi – olo'-olo' saribu ngaulun ungkuyon am ruandu'.

⁵⁰ Kopongo raginio minongoi i Abimilik ra Tibis. Nagawang io ra bandar no am ginaau no.

⁵¹ Giu' ra tatanga' ru bandar no mokoondo' rondo' manara ondo' mapiot. Ngaangai' ungkuyon am ruandu' ru bandar no nakaaya' tingganai-tingganai, nagiru' ra manara no. Kinaputan nilo kulobon intor ra ralalom am nagaloi ra rasawat.

⁵² Kopongo raginio nakasaboi i Abimilik koson mamulunsar ra manara no. Paat ra io nakasaboi ra kulobon ru manara no am masaga' monolob,

⁵³ naparatu' sangulun ruandu' ra rondo' batu kinsaran ra tampak ru ulu ri Abimilik saboi nampalata' ra langgut ru ulu nano.

⁵⁴ Mataki' i Abimilik nampiau ra ungkuyon mamulok ondo' nagibit ra kinandoi mangayou nano, am indagu, “Butuso' ilang muno am potoyo' aku. Kalo masaga' aku raguon ru ulun ra pinatoi aku ru sangulun ruandu'.” Nonobok ungkuyon mamulok no riso, am patoi i Abimilik.

⁵⁵ Paat ra ulun ru Israil nakakito ra minatoi noyo i Abimilik, uli' ilo ngaangai'.

⁵⁶ Koson raginio noyo i Aki Kapuuno' nambalos ra kalaatan ri Abimilik ra ama' nano sabap ra namatoi ra tulu' ngoopor ngaulun pabukat nano.

⁵⁷ Nangkinibit i Aki Kapuuno' niayuk ra mamagun ru Sikgim naimbolo' sabap ra kalaatan nilo, koson ra rinagu ri Jotam anak ri Gidion paat io nagulas risilo.