TINGGANAI RU BANSA' 8 - Tanou Moonsoi TimugonNakalaan ru ulun ru Midian 1 Kopongo raginio indagu bansa' ru Ipraim ri Gidion, “Kua kia kalo nampiau kou ramon paat okou namulunsar ra ulun ru Midian? Kua kia ra ginio boo pinamakuan muno ramon?” Koson raginio noyo ilo nambubutok ri Gidion. 2 Kaa' indagu i Gidion risilo, “Binaal kutu kalo kula' maatang amon ru pinogondo' ra binaal min. Kabalu' pana sanganu binaal ru ulun ru Ipraim mokologo poyo intor ra ngaangai' ondo' binaal ru ngaangai' bansa' ru Abiijir. 3 Ra kuasa' ri Aki Kapuuno' namatoi kau noyo ruo ngaulun panguasa' ru Midian no, i Orib am i Jiib. Atan binaal moonsoi kuno amon ru pinogondo' ra binaal mino!” Kopongo rinagu ri Gidion ginio, kalo boo siminangit ilo. 4 Paat raginio nababaya' i Gidion ra talu ngaatus ra ulun nano nakasaboi ra Sungoi Jordan am liminaup. Naagui ilo kaga', kaa' lakat poyo rinayus nilo nangilou ra pantula'. 5 Ilo pana nakasaboi giu' ra Sukot. Giu' no indagu i Gidion ra mamagun ru bandar Sukot, “Anii' ulun-ulun kuno ra sanganu akanon. Naagui ilo kaga', am lakat poyo mangilou akai ri Jiba am i Salmuna, raja'-raja' ru Midian.” 6 Kaa' indagu tingganai-tingganai ru bandar Sukot, “Kua kia pangani' akai ra akanon ra saujor muno? Kalo poyo narakop min i Jiba am i Salmuna!” 7 Ginio ra indagu i Gidion, “Ba iou! Paat ra Tuhan mapataak ri Jiba am i Salmuna raki', loposon ku inan min ra ruui am karuuyan intor ra tana' kaagisan!” 8 I Gidion pana namparayus ra pangkiralanan nano mongoi ra Pinuil. Giu' ra Pinuil nakiindangan io ra mamagun ru bandar no, kaa' taaman ru mamagun ru bandar no nogondo' koson ra taaman ru ulun Sukot. 9 Ginio ra indagu i Gidion risilo, “Muli' aku ra maayag. Paat raginio lunsayon ku manara ru bandar ragitio!” 10 Paat raginio, soroi i Jiba am i Salmuna giu' ra Karkor am ngaangai' saujor nilo. Intor ra ngaangai' ru saujor ru ulun ru tana' kaagisan no, olo'-olo' 15,000 ngaulun ayuk lakat poyo soroi; 120,000 ngaulun pinatoi noyo. 11 Nansusug i Gidion ra balitan ru tana' kaagisan giu' ra tampilon ru sirangon Noba am Jogbiga, am namulunsar ra saujor ru pantula' ra namulali'. 12 I Jiba am i Salmuna, ruo ngaulun raja' ru Midian no nagiru'. Kaa' inilou am rinakop ilo ri Gidion, saboi nalaa' ngaangai' saujor ru pantula'. 13 Kopongo raginio saguli' i Gidion intor ra pangayawan nansail ra Ginting Giris. 14 Giu' ra tanga' ralan rinakop ri Gidion sangulun buayoi intor ra Sukot am nakitaak riso mangani' ra inggalan ru tingganai-tingganai ru bandar no. Ulun no nanulis ra inggalan ru 77 ngaulun tingganai ru bandar Sukot tayar ri Gidion. 15 Kopongo raginio ongoi i Gidion ra tingganai-tingganai no am indagu, “Nakara' min kia ra kalo masaga' kau mangindangan raki' ragili? Kalo masaga' kau manaak ra akanon ra saujor-saujor kuno ondo' naagui, sabap ra minindagu kau raki' ra kalo poyo narakop ku i Jiba am i Salmuna. No', gitio noyo ilo!” 16 Alapo' boo ri Gidion ruui am karuuyan intor ra tana' kaagisan, am pinakai no koson mangukum ra tingganai-tingganai ru Sukot. 17 I Gidion pana nampalunsai ra manara ru bandar Pinuil am namatoi ra ngaangai' ungkuyon ra bandar no. 18 Kopongo raginio kuati' ri Gidion i Jiba am i Salmuna, “Ati kulaan baal ru ulun ondo' pinatoi min giu' ra Tabor no?” Taam ilo, “Baal nilo nansalu rirun, koson ra papag ru raja'.” 19 Indagu i Gidion, “Pabukat ku ilo, anak ru ina' kuno. Nagibot aku ra amon ru kalo pinatoi min ilo, aku pana kalo mamatoi ramuyun.” 20 Indagu boo i Gidion ri Jitir, anak katuaan nano ra ungkuyon, “Potoyo' noyo ilo!” Kaa' kalo binutus ri Jitir ilang nano. Malaa' io sabap lakat io poyo mamulok. 21 Indagu i Jiba am i Salmuna ri Gidion, “Nian, amon ru ungkuyon kou, potoyo' noyo akai ra kalindu' muno galama'!” Ginio ra namatoi i Gidion risilo, am nangalap ra ngaangai' limpor ondo' soroi ra liog ru unta nilo. 22 Kopongo raginio indagu ulun ru Israil ri Gidion, “Namayag kou ramon intor ra kuasa' ru ulun ru Midian. Raino moonsoi masauk kou ra tingganai mai – okou am papag muno.” 23 Taam i Gidion, “Kalo masauk aku ra tingganai min; anak kuno pana kalo. Tuhan ondo' masauk ra tingganai min.” 24 Kaa' indagu poyo i Gidion, “Rondo' ayuk kitaakon kuno. Musiti' min pataakin raki' anting-anting ondo' ginaau min intor ra pantula'.” (Ulun ru Midian koson ra bansa'-bansa' ra bokon ondo' minayan ra tana' kaagisan, ngaangai' makaanting-anting mas.) 25 Taam ulun ru Israil, “Masaga' akai manaak raginio rirun.” Pinabingkal nilo rondo' konoon, am moonong ulun napabanta' ra anting-anting ondo' ginaau no ra giu' no. 26 Ngaangai' anting-anting mas ondo' nakataak ri Gidion paat raginio bagat no maar ruo ngoopor ngakilogram, kalo nakaaya' limpor-limpor, sisigot, am konoon matanggilung ondo' bayangon ru raja'-raja' ru Midian, am niayuk sisigot ondo' pinasisigot ra liog ru unta nilo. 27 Intor ra mas no, nambaal i Gidion ra rondo' sinungkalalaing, am paayano' no giu' ra Opra, intok namagunan nano. Ngaangai' ulun ru Israil minongoi ra giu' no koson sumamba ra sinungkalalaing no, saboi kalo boo sumamba ilo ri Aki Kapuuno'. Baal raginio nasauk ra landak tayar ri Gidion am sasambaloi nano. 28 Koson raginio noyo ulun ru Midian kinala ru ulun ru Israil. Ulun ru Midian kalo boo nasauk ra lolob risilo. Namimio pagun no buoi apat ngoopor ngambilor, buoi i Gidion lakat poyo naayag. Minatoi i Gidion 29 Kopongo pangayawan no, siminaguli' i Gidion ra intok namagunan nano am minayan ra giu'. 30 Mokoondo' io tulu' ngoopor ngaulun anak ungkuyon sabap ra masuang andu' nano. 31 Mokoondo' io niayuk ra sangulun ruandu' parulug giu' ra Sikgim. Parulug nano naganak ra sangulun anak ungkuyon tayar riso ondo' ininggalanan ri Abimilik. 32 Minatoi i Gidion anak ri Joas paat ra umur nano matutuo kaga'. Linobong io giu' ra kalabangan ru ama' nano, i Joas. Kalabangan no giu' ra Opra, bandar ru bansa' ru Abiijir. 33 Kopongo i Gidion minatoi, ulun ru Israil kalo boo giminagaya' ri Aki Kapuuno'. Sinamba nilo dewa-dewa Baal am napasauk ra Baal-Birit dewa nilo. 34 Kalo boo sumambayang ilo ra Tuhan i Aki Kapuuno' nilo, ondo' nampalabus risilo intor ra kuasa' ru pantula' ra libung nilo. 35 Kalo niayuk nambalos ilo ra ngaangai' ondo' binaal moonsoi ru sasambaloi ri Gidion ondo' binaal nano ra ulun ru Israil. |
Hakcipta © Bible Society of Malaysia, 2013.
Bible Society of Malaysia