TINGGANAI RU BANSA' 5 - Tanou Moonsoi Timugon

Rimbai ri Dibora am i Barak

¹ Paat orou raginio, narimbai i Dibora am i Barak anak ri Abinoam ra rimbai ragitio:

² Omporo' noyo Tuhan! Ulun tutumula' ru Israil nakatampos toojo koson mangayou; masaga' mamagun mangayou.

³ Rongogo' noyo, raja' kau ngai'! Ilai' toojo, pangnguasa' kau ngai'! Marimbai aku am mangkuli ra miujik tayar ru Tuhan i Aki Kapuuno' ru Israil.

⁴ Iou Tuhan, paat ra Okou nangiruan ra kagunungan Siir, paat ra Okou miningkual intor ra libung ru Idom, napuyu' tana' ti am riminatu' rasam intor ra limbowon. Kukuruas timug intor ra gaun-gaun.

⁵ Mauyog gunung ra saang ru Tuhan, pangnguasa' ru Sinai, giu' ra saang ru Tuhan i Aki Kapuuno' ru ulun ru Israil.

⁶ Bulintok ri Samgar anak ri Anat naayag, bulintok ri Jail niayuk naayag, kolondo' boo kafilah mansail ra pagun, ulun timinanggau minaya' ra ralan nagililikou.

⁷ Bandar-bandar giu' ra Israil iniruanan, okou Dibora, nasisiluk saboi okou minatong; minatong kou koson ra ina' ru ulun ru Israil.

⁸ Pangayawan pana nasauk giu' ra ralalom ru pagun paat ra ulun ru Israil tumalimpuun sumamba ra dewa. Kolondo' rondo' pana kinandoi mangayou kinayang ru apat ngoopor ngaribu ngaulun ru Israil.

⁹ Bansuk ru guang kuno ra ngaangai' panglima ru Israil am ra mamagun ondo' masaga' mangayou. Omporo' noyo Tuhan!

¹⁰ Potonowo' noyo baal raginio, akau ngai' ondo' nangura' ra kaladai mapulak, akau ondo' nanturung ra tampak ru palana, am akau ondo' nantatana'.

¹¹ Rongogo' noyo! Ulun masuang ra liput ru tulubong Tatanga' mampatanou ra kamanangan ru Tuhan, kamanangan ru ulun ru Israil! Ulun ru Tuhan pana baris tumuun intor ra bandar-bandar nilo.

¹² Luat noyo, okou Dibora, luat noyo! Luat noyo, am parimbai noyo! Sukal noyo, okou Barak anak ri Abinoam! Ibito' noyo ulun rinakop muno!

¹³ Kopongo raginio tingganai-tingganai ru bangsawan ondo' natatang matong ra tingganai nilo; minatong ulun ru Tuhan Riso, nakatampos koson mangayou.

¹⁴ Minatong ilo intor ra Ipraim mongoi ra pipit, sumunu' ra bansa' ru Binjamin ondo' minugar ra saang. Panglima-panglima minatong intor ra Makgir, Pagawai-pagawai ru saujor intor ra Jibulon.

¹⁵ Tingganai-tingganai ru bansa' ru Isakar minatong nababaya' ri Dibora, minatong tingganai ru bansa' ru Isakar am minaya' niayuk i Barak. Minaya' ilo riso saboi ra pipit. Kaa' bansa' ru Rubin natatayar, kalo naaru'-aru' ilo koson matong.

¹⁶ Kua kia kalo masaga' ilo maya', am mayan ra domba? Koson rumongog kia ra magagalung mampiau ra domba? Sotopot no bansa' ru Rubin natatayar, kalo naaru'-aru' ilo koson matong.

¹⁷ Bansa' ru Gad minayan giu' ra tampilon sirangon ru Sungoi Jordan, bansa' ru Dan minayan mamaar ra kapal-kapal. Bansa' ru Asyir minayan giu' ra gawar ru nagas; nagulayun ilo minayan ra giu' no.

¹⁸ Kaa' bansa' ru Jibulon am bansa' ru Naptali baani giminula' toojo giu' ra pangayawan.

¹⁹ Giu' ra Taanak, mamaar ra sungoi giu' ra Migido, raja'-raja' minatong koson mangayou; raja'-raja' ru Kanaan nangayou, kaa' kalo nangalap ilo ra pirok koson tinalingaau.

²⁰ Intor ra intok insiran ru butitin giu' ra limbowon, butitin niayuk nangayou manggal ri Sisira.

²¹ Timug maaug ru Sungoi Kison nangabas ra pantula'. Marayus aku jumalai ra kaikangan!

²² Kuda pana kumulubut ra maribok, mantutu-tutu ra palar.

²³ “Kaulas noyo Miros,” ragu ru malaikat ru Tuhan, “Kaulas noyo, kaulas noyo mamagun ra giu'. Kalo matong ilo mangindangan koson ra tutumula' ondo' mangayou tayar ru Tuhan.”

²⁴ Binarakat noyo i Jail, andu' ri Gibir, ulun ru Kini no. Io noyo ruandu' ondo' binarakat kaga' ra gino ngai' ru ngaangai' ruandu' ondo' minayan giu' ra kim.

²⁵ Nakitaak i Sisira ra timug, kaa' nangani' i Jail riso ra gatas, nangani' i Jail riso ra gatas masalut ralalom ru mangkuk ondo' moonsoi.

²⁶ Ra sapapa' ru kalindu' nampaguut io ra paku' makalu, ra kalindu' ondo' sapapa' poyo nampaguut io ra amar; pinopok ri Jail pusisingo ri Sisira, pinopok am tinutuk no ulu ri Sisira.

²⁷ Naratu' i Sisira am nakaranga' pakalangan; nakaranga' am minatoi io ra kalayam ri Jail.

²⁸ Minimpal ina' ri Sisira intor ra gigimpalan; nagimpal io intor ra basi' ru gigimpalan. Nangkuot io, “Kua kia ra kurita' kuda nano kalio poyo? Kua kia ra kuda nano mototoi kaga' muli'?”

²⁹ Taam mangngandoi ruandu' nano ondo' mapintar kaga', koson niayuk ra ruruli' io galama' minindagu,

³⁰ “Tatanga' ilo mangalap ra kuliamos tinalingaau koson ra tatayaron, maa' raginio moonong saujor makaalap rondo' kapoam ruo ngaulun ralaa; nakaalap i Sisira ra konoon mokologo, nakaalap andu' ru raja' ra sakiking makasulam ra mansalinut batik.”

³¹ Gama' ru ngaangai' pantula' Muno, iou Tuhan, matoi koson ri Sisira; kaa' gama' ru rangan Muno maantak koson ra mato ru orou giu' ra limbowon! Kopongo raginio mamimio pagun no buoi apat ngoopor ngambilor.