TINGGANAI RU BANSA' 18 - Tanou Moonsoi Timugon

I Mika am bansa' ru Dan

¹ Paat raginio kolondo' poyo raja' giu' ra Israil. Bansa' ru Dan lakat poyo maguguyum ra intok saukon ra ayanan, sabap ra kalo poyo nokoowot ilo ra tana' koson ra bansa' ra bokon ralalom ru bansa' ru Israil.

² Ginio ra nampili' bansa' ru Dan ra limo ngaulun ondo' baani ra ngaangai' ru bansa' ralalom bansa' nilono ondo' minayan giu' ra Jora am Isytaol, am nangani' risilo ra kandoi koson mansigo ra pagun no. Ngaangai' ulun pinili' no minugar, am nakasaboi ra kabuluran Ipraim. Giu' no minayan ilo ra baloi ri Mika.

³ Paat ilo ra giu' no, nauligan nilo lalayuk ru ragu ru ungkuyon mamulok ru bansa' ru Liwi no. Ginio ra kuati' nilo io, “Kua giti kou? Atan kuayan muno? Osoi nagibit rirun ra giti?”

⁴ Taam ulun ru Liwi no, “Mokoondo' aku ra pangiawan ri Mika. Nampagaji' io raki' masauk ra imam nano.”

⁵ Konilo riso, “Kuati' i Aki Kapuuno', makasugut akai nua' kapoam kalo ralalom pangkiralanan mai ti.”

⁶ Taam imam no, “Pai' kaimamang. Tuhan mabaya' ramuyun ralalom pangkiralanan ragitio.”

⁷ Kopongo raginio naparayus kalimo-limo ngaulun no ra pangkiralanan minongoi ra bandar Lais. Nakito nilo ra kaayagan ru ulun ra giu' no mamimio koson ra kaayagan ru ulun ru Sidon. Mamagun ru Lais maayag ra mamimio am moonsoi, am kalo nantutula' ra osoi pana; mokoondo' ilo ra ngaangai' pakuan. Minayan ilo maalur intor ra ulun ru Sidon am kalo makapabukatan ra bansa' ru ati pana.

⁸ Paat ra limo ngaulun no siminaguli' ra Jora am Isytaol, kinitaak ilo mambala'.

⁹ Konilo, “Ibok bulunsar takau Lais. Nakito mai noyo bandar no. Tana' no malabung kaga'. Pai' kalibut. Ribaki'! Ibok gaawo' takau bandar no!

¹⁰ Paat ra akau makasaboi ra giu' no, makatuum kau ra ulun ra giu' no kalo manantam ra atan pana. Malangka' tana' no; ngaangai' no ondo' gogoton ru ulun mokoondo' ra giu' no. Mangintopot akai ra manaak i Aki Kapuuno' ramuyun ra tana' raginio.”

¹¹ Kopongo raginio onom ngaatus ngaulun intor ra bansa' ru Dan minugar intor ra Jora am Isytaol, nakatampos ra mangayou.

¹² Ongoi ilo ra tampilon kalasaan ru Kiryat-Jiarim giu' ra wilayah Jiuda am pangkim ra giu' no. Ginio sabap ra saboi raino intok raginio lakat poyo inggalanin ra Pangkiman ru Dan.

¹³ Intor ra giu' no minugar ilo narayus ra wilayah kabuluran Ipraim saboi ra baloi ri Mika.

¹⁴ Kopongo raginio limo ngaulun ondo' nansigo ra pagun giu' ra liliut ru Lais mindagu ra rangan-rangan nilo, “Nakapandai kau kia ra ralalom ru rondo' ra baloi ti mokoondo' rondo' sinungkalalaing intor ra tataun ondo' inangkupan ra pirok? Mokoondo' niayuk kukula' sinungkalalaing ra bokon am rondo' efod. Kinami' karaa' atan ondo' musiti' baalon takau.”

¹⁵ Ilo pana siminubol ra baloi ri Mika, intok inayanan ru ungkuyon mamulok ru Liwi no. Nanabi' ilo riso.

¹⁶ Paat raginio, onom ngaatus ngaulun saujor bansa' ru Dan, ondo' nakatampos noyo mangayou miningor giu' ra tuma' ru kulobon garabang.

¹⁷ Kalimo-limo ngaulun pansigo no narayus minumpos ra baloi, am nangalap ra sinungkalalaing intor ra tataun ondo' inangkupan ra pirok no, sinungkalalaing ra bokon am efod. Tatanga' ungkuyon mamulok ru Liwi no migor nababaya' ra onom ngaatus ngaulun saujor no giu' ra kulobon garabang.

¹⁸ Paat ra limo ngaulun no minumpos ra ralalom baloi ri Mika am nangalap ra efod am niayuk sinungkalalaing no, pangkuot ungkuyon mamulok ru Liwi no risilo, “Kua kia baalo' min gitio?”

¹⁹ Taam ilo, “Pongkoror. Pai' pangkuot ra atan-atan! Baya' ramon am sauk no ra imam am pambibilin ramon. Sala' ka kia moonsoi poyo masauk kou ra imam tayar ru rondo' bansa' intor ra masauk ra imam tayar ru sambaloi ayuk?”

²⁰ Naansayan kaga' ungkuyon mamulok ru Liwi no ra atang raginio. Ginio ra alapo' no efod am sinungkalalaing no am baya' risilo.

²¹ Kopongo raginio pulalai raginio naparayus ra pangkiralanan, pinagulu lalaing, bibiag tinambiag am kuliamos nilo.

²² Kopongo ilo minugar ra maalur noyo, bagu no nangkimait i Mika ra pasambalayan nano nangilou ra ulun ru bansa' ru Dan. Pakainggaar risilo,

²³ gogolok i Mika am ngaangai' ulun nano risilo. Pangkaili ulun ru bansa' ru Dan am pangkuot ri Mika, “Atan kia guat? Kua ratong kau ra masuang kaga' ulun?”

²⁴ Taam i Mika, “Inalap min imam kuno am sinungkalalaing ondo' binaal kuno. Kolondo' boo atan-atan raki', am kamin boo, ‘Atan kia guat?’ ”

²⁵ Indagu ulun ru bansa' ru Dan riso, “Pongkoror! Amon ru kalo, sumangit ngaangai' ulun ti am mamulunsar rirun. Magu' okou am ngaangai' sasambaloi muno matoi.”

²⁶ Pakaindagu raginio, rayusi' nilo pangkiralanan. Nakito ri Mika ra ulun ru bansa' ru Dan maikang poyo intor riso, am uli' io ra baloi nano.

^27-28 Kaalap noyo ru ulun ru bansa' ru Dan ra imam am kuliamos ru sambayang binaal ri Mika no, minongoi ilo bulunsar ra Lais, bandar ru ulun ondo' mamimio am moonsoi. (Bandar no giu' ra Pipit ondo' nogondo' ra bandar Bit-Rigob.) Ulun ru bansa' ru Dan namatoi ra ngaangai' mamagun no am nonolob ra bandar no. Kolondo' sangulun pana ondo' namayag ra mamagun ru bandar no, sabap ra Lais maalur intor ra Sidon am ilo kolondo' pabukatan ra osoi pana. Ulun ru bansa' ru Dan pana nambaal saguli' ra bandar no, am ayan ilo ra giu' no.

²⁹ Inaligan nilo inggalan ru bandar no nasauk ra Dan, sumugut ra inggalan ru kinamatuaan nilo, i Dan anak ri Jakub.

³⁰ Giu' ra bandar no pinabigor nilo sinungkalalaing ondo' inibit nilono. Ilo pana napalantik ri Jonatan anak ri Girsom, akupu ri Musa koson imam nilo. Papag ri Girsom pana nasauk ra imam ru bansa' ru Dan saboi ra ulun ru Israil rinakop am pinatiran ra pagun ra bokon.

³¹ Sinungkalalaing binaal ri Mika nagulayun giu' ra Lais buoi ru Kim ru Tuhan, intok sambayangan ri Aki Kapuuno', giu' ra Silo.