TINGGANAI RU BANSA' 17 - Tanou Moonsoi Timugon

Sinungkalalaing ondo' sambaan ri Mika

¹ Mokoondo' sangulun ungkuyon makainggalan ri Mika ondo' minayan giu' ra kabuluran ru Ipraim.

² Sangarawan raiti indagu io ra ina' nano, “Paat ra ulun nantakou ra 1,100 ngampila' ruit pirok muno ragili, norongog ku nagulas kou ra mantatakou i. Aku noyo ondo' nantakou ra pirok i. Lakat poyo binulian ku.” Kon ru ina' nano, “Gama' ru barakaton kou ru Tuhan, anak kuno!”

³ Pinasaguli' ri Mika pirok no ra ina' nano. Kon poyo ru ina' nano, “Maa' raginio okou, anak kuno kalo masulung ra ulas ondo' rinagu ku ragili, pataakon ku pirok ti ra Tuhan. Pirok ti pakayon koson patapison ra sinungkalalaing intor ra tataun. Pasagulion ku rirun pirok no.”

⁴ Kopongo pinasaguli' ri Mika pirok no ra ina' nano, nangalap ina' nano ra ruo ngaatus ngampila' am pataako' no ra sangulun manukang ra pirok. Nanusub io ra manukang no mambaal ra rondo' sinungkalalaing intor ra tataun am patapiso' no ra pirok no. Paayano' boo sinungkalalaing no giu' ra baloi ri Mika.

⁵ Mokoondo' i Mika ra rondo' intok sambaan. Nambaal io ra kukula' sinungkalalaing am rondo' efod am pamalantik ra sangulun anak ungkuyon nano masauk ra imam.

⁶ Paat raginio ulun ru Israil lakat poyo kolondo' raja'. Moonong ulun mambaal ra atan ondo' karaan no ra motopot.

⁷ Paat raginio niayuk mokoondo' sangulun ungkuyon mamulok intor ra bansa' ru Liwi. Galing i minayan io giu' ra bandar Bitligim giu' ra wilayah Jiuda.

⁸ Kaa' raino nangiruan io noyo ra bandar no am tatanga' maguyum ra intok ayanan ra bokon. Ralalom pangkiralanan no nakasaboi io giu' ra baloi ri Mika giu' ra kabuluran Ipraim.

⁹ Pangkuot i Mika riso, “Ati intor mu?” Taam io, “Ulun aku ru Liwi intor ra Bitligim giu' ra Jiuda. Tatanga' aku maguyum ra intok ayanan.”

¹⁰ Kon ri Mika, “Ayan no raki'. Sauk no ra pambilin am imam kuno. Aniin tokou mopor ngampila' ruit pirok sambilor koson ra gaji', am niayuk bayang am akanon.”

¹¹ Ungkuyon mamulok intor ra bansa' ru Liwi no nangiou mayan ri Mika. Pamakuan ra ungkuyon mamulok no koson ayuk ra anak ri Mika galama'.

¹² Napalantik i Mika riso ra imam nano, am ayan io ra baloi ri Mika.

¹³ Kon ri Mika, “Raino nakapandai aku ra Tuhan mambaal ra moonsoi raki', sabap ra mokoondo' aku ra sangulun Liwi koson ra imam.”